લોકશાહીની જીત! છત્તીસગઢમાં 2 નક્સલી હુમલા છતા પ્રથમ તબક્કામાં 18 બેઠકો પર 70 ટકા મતદાન

નવી દિલ્હીઃ છત્તીસગઢમાં નક્સલ પ્રભાવિત ગણાતી 18 બેઠકો પર વિધાનસભાની ચૂંટણીનું મતદાન થયું. જેમાં અંદાજિત 70 ટકા મતદાન થયું છે. ચૂંટણી પંચના જણાવ્યા અનુસાર પ્રથમ તબક્કામાં રાજ્યના 8 જિલ્લાની 18 બેઠકો પર 70 ટકા મતદાન થયું. મતદાન બાદ તુરંત મુખ્યમંત્રી રમણસિંહે પ્રથમ તબક્કાની 18માંથી 14 બેઠકો પર ભાજપની જીતનો દાવો કર્યો છે.

પ્રથમ તબક્કાનું મતદાન માત્ર રાજકીય પક્ષો માટે જ નહીં ચૂંટણીપંચ સુરક્ષાકર્મીઓ અને સ્થાનિક લોકો માટે પણ મહત્વનું હતું. કારણ કે ઘણા વિસ્તારમાં નક્સલીઓએ લોકોને મતદાન ન કરવાની ધમકી આપી હતી. છતાં લોકો ઘરની બહાર નિકળ્યા અને મતદાન કર્યું.

નક્સલી હુમલા વચ્ચે ચૂંટણી
મતદાન દરમિયાન નક્સલ પ્રભાવિત બીજાપુર જિલ્લામાં કેન્દ્રીય રિઝર્વ પોલીસ દળ અને નક્સલીઓ વચ્ચે અલગ-અલગ અથડામણમાં સીઆરપીએફના બે અધિકારીઓ સહિત પાંચ સુરક્ષાકર્મીઓ ઇજાગ્રસ્ત થયા છે. ત્યારે દંતેવાડા જિલ્લામાં નક્સલીઓએ સુરંગમાં વિસ્ફોટ કરીને સેનાને નુકસાન પહોંચાડવાની કોશિશ કરી હતી. છત્તીસગઢના નક્સલ પ્રભાવિત બસ્તર વિસ્તારના સાત જિલ્લા અને રાજનાંદગામ જિલ્લાની 18 વિધાનસભા બેઠકો માટે મતદાન થયું. રાજ્યમાં નક્સલીઓએ ચૂંટણી બહિષ્કારની જાહેરાત કરી હતી અને સેનાને નુકસાન પહોંચાડવાનો પણ પ્રયાસ કર્યો હતો.