ભારત સરકારે ડિઝિટલ પેમેન્ટને વધારવા માટે ભીમ એપને લોન્ચ કરી છે. ભીમ એપ UPI પર આધારિત છે. ભારતમાં કરોડોનો લોકો ભીમ એપનો ઉપયોગ કરે છે. પરંતુ આ લોકોની ખાનગી માહિતી હવે ખતરામાં છે.
આધાર કાર્ડ જેવી ખાનગી માહિતી થઇ સાર્વજનિક
BHIM એપ પર ડેટા અપલોડ કરતા સમયે માહિતી થઈ લીક
લગભગ 409 GB ડેટા લીક થયો હોવાનો કરાયો દાવો
ઇઝરાયલની સિક્યોરિટી ફર્મ VPNMENTORએ પોતાના રિપોર્ટમાં દાવો કર્યો છે કે ભારતના લગભગ 70 લાખ ભીમ એપ યૂઝર્સનો ડેટા લીક થયો છે. કંપનીનો દાવો છે કે આ ડેટા ત્યારે લીક થયા જ્યારે યૂઝર્સ ભીમ એપ પર માહિતી અપલોડ કરી રહ્યાં હતા. સિક્યોરિટી ફર્મના રિપોર્ટ મુજબ કુલ 409 GB ડેટા લીક થયો છે. જેમાં યૂઝર્સના આધાર કાર્ડ, જાતિ પ્રમાણપત્ર, રહેઠાણનું સરનામું, બેંકનો રેકોર્ડ સહિત પ્રોફાઇલ માહિતી પણ લીક થઇ છે.
રિપોર્ટમાં કહેવાયું છે કે જે વેબસાઇટ પરથી આ માહિતી લીક થઇ છે તેનો ઉપયોગ ભીમ એપના પ્રચાર માટે અભિયાન કરવામાં આવી રહ્યું હતું. આ દરમિયાન ભીમ એપમાં બિઝનેસ અને યૂઝર્સને એપ સાથે જોડવામાં આવી રહ્યાં હતા. ડેટા અપલોડ કરતા સમયે કેટલીક માહિતી અમેઝૉન વેબ સર્વિસ એસ-3 બકેટમાં સ્ટોર થઇ રહી હતી.
આ સમગ્ર ખેલ ફેબ્રુઆરી 2019માં થયો. આ ડેટા લીક બાદ ભારતના કરોડો ભીમ એપ યૂઝર્સની ખાનગી જાણકારી હેકર્સ પાસે પહોંચી ગઇ છે. હેકર્સ પાસે તમારા આધારકાર્ડથી લઇ બેંકની જાણકારી છે. આવા સમયે તમને સરળ રીતે હેકિંગનો શિકાર બનાવી શકાય છે. જો કે આ ખામીને ગયા એપ્રિલમાં ઠીક કરી લેવામાં આવી હતી. પરંતુ જે લોકોની માહિતી લીક થઇ છે તેમની પર ખતરો મંડરાઇ રહ્યો છે. આ ડેટા લીક પર ભીમ એપને બનાવનાર નેશનલ પેમેન્ટ્સ કોર્પોરેશન અને કમ્પ્યૂટર ઇમરજન્સી રિસ્પોન્સ ટીમ દ્વારા કોઇ નિવેદન આપવામાં આવ્યું નથી.