અપહરણ કરાયેલ બાળકી 5 કલાકમાં જ સુરક્ષિત મળી, આરોપીને પોલીસે ઝડપ્યો, દાદાને માર મારીને બાળકીનું કર્યું હતું અપહરણ
ગોધરામાં 7 વર્ષની બાળકીનું અપહરણ
અજાણ્યા બાઈક સવાર અપહરણ કરી ભાગ્યો
શહેરાના આધેડ પૌત્રીને લઈ સામાનની ખરીદી કરવા આવ્યા હતા
આજે ગુજરાતની દીકરી એક દાનવના હાથમાં છૂટી છે, આજે ફૂલ જેવી બાળકીને કરમાતા ગોધરા પોલીસે બચાવી લીધી છે. પંચમહાલના ગોધરામાં 7 વર્ષની અપહ્યત બાળકીને અજાણ્યા બાઈક સવાર અપહરણ કરી ભાગી છૂટયો હતો. જે બાદ બાદ પોલીસે તપાસનો ધમધમાટ કરતાં મોટી સફળતા મળી હતી અને બાળકીનું પાંચ કલાકમાં જ પરિવાર સાથે મિલન થયું હતું.
અજાણ્યો બાઈક સવાર અપહરણ કરી ભાગ્યો હતો
પંચમહાલમાં શહેરાથી દાદા સાથે બાળકી ખરીદી કરવા આવી હતી. પૌત્રીને સાથે લઈને ચીજ-વસ્તુઓની ખરીદી કરવા કર્યા બાદ બાળકી દાદા તેને લઈ જઈ રહ્યા હતા તેવામાં જ બાઈક સવાર યુવકે બાળકીના દાદાને ભોળવી બાળકી સાથે બાઈક પર બેસાડી દીધા હતા. પણ અચાનક જ યુવકે તેનો રંગ દેખાડવાનો શરૂ કર્યું હતું અને GIDC પાછળ બાળકીના દાદાને ઢોર માર મારી બાળકીને લઈ ભાગી છૂટયો હતો. બાળકીના દાદાને તાત્કાલિક સારવાર અર્થે હોસ્પિટલમાં ખસેડવામાં આવ્યા હતા અને સમગ્ર બનાવની પોલીસને શબ્દ સ: જાણ કરવામા આવી હતી.
CCTV ફૂટેજની મદદથી બાળકી સલામત શોધી કાઢવામાં આવી
બીજી તરફ ઘટનાની ગંભીરતા જોઈ જિલ્લા પોલીસ વડા, DYSP સહિતની ટીમનો પોલીસ કાફલો આખાય શહેરમાં ફરી ફરી વાળ્યો હતો. બાઇક સવાર જે તરફ બાળકનું અપહરણ કરી નાસી છૂટયો હતો તે તરફના તમામ સીસીટીવી ચેક કરવામાં આવ્યા હતા. જેમાં CCTV ફૂટેજની મદદથી 5 કલાકમાં જ પોલીસને આરોપીને શોધી કાઢવામાં સફળતા મળી હતી. બાળકી સુરક્ષિત રીતે પાછી મળતા પરિવાર સહિત પોલીસ ટીમે હાશકારો અનુભવ્યો હતો. બાળકી ધ્રુસકેને ધ્રુસકે રડતી હતી જે બાદ બાળકીનું પરિવાર સાથે મિલન થતાં લાગણીસભર દ્રશ્યો સર્જાયા હતા. પોલીસે આરોપીને દબોચી આગળની તપાસ હાથ ધરી છે. શું બદઈરાદાથી બાળકીનું અપહરણ થયું હતું કે કેમ? કે પછી અન્ય કારણોસર તેની પણ પૂછપરછ કરવામાં આવી રહી છે.