દુર્ઘટના / વડોદરા માટે મંગળવાર બન્યો અમંગળ: છકડો અને કન્ટેનર વચ્ચે ગંભીર અકસ્માત સર્જાતા 7ના કમકમાટીભર્યા મોત

• વડોદરામાં એકસાથે બે ગંભીર અકસ્માતો સર્જાયા
• દરજીપુરા એરફોર્સ નજીક સર્જાયો ગંભીર અકસ્માત
• છકડો અને કન્ટેનર વચ્ચે અકસ્માત સર્જાતા 7નાં મોત

વડોદરા માટે આજે જાણે કે મંગળવાર ગોઝારો બન્યો હોય તેવું લાગી રહ્યું છે. કારણ કે આજે એક જ દિવસમાં શહેરમાં બે ગંભીર અકસ્માત સર્જાયા છે. જેમાં એક અકસ્માત શહેરના દરજીપુરા એરફોર્સ પાસે સર્જાયો છે. છકડો અને કન્ટેનર વચ્ચે ગંભીર અકસ્માત સર્જાતા 7 લોકોના છકડામાં દબાઈ જવાથી મૃત્યુ નિપજ્યાં છે. આ મૃતદેહોને છકડાના પતરા કાપીને બહાર કાઢવામાં આવ્યા છે. આ મૃતદેહોને ફાયર બ્રિગેડ અને એરફોર્સના જવાનો દ્વારા બહાર કાઢવાની કામગીરી હાથ ધરાઇ હતી.

અમદાવાદ-વડોદરા એક્સપ્રેસ-વે બસ અને ટ્રક વચ્ચે અકસ્માત સર્જાયો

બીજી બાજુ આજે અમદાવાદ-વડોદરા એક્સપ્રેસ-વે પર બોદજ ગામ નજીક બસ અને ટ્રક વચ્ચે ગંભીર અકસ્માત સર્જાયો હતો. જેમાં બસમાં સવાર મુસાફરોને નાની-મોટી ઈજાઓ પહોંચી હતી. જોકે આ અકસ્માતના કારણે 4 કિલોમીટર સુધીનો લાંબો ટ્રાફિકજામ સર્જાયો હતો. ટ્રાફિકજામ સર્જાવાના કારણે વડોદરા જતા વાહનોની લાંબી કતારો લાગી ગઇ હતી. જોકે બાદમાં ટ્રાફિક પોલીસ દ્વારા ટ્રાફિકને હળવો કરાયો હતો. તેમજ પોલીસનો કાફલો પણ ઘટનાસ્થળે પહોંચી જતા જાહેર પબ્લિક માટે રસ્તો ખુલ્લો કરાયો હતો.

જાણો આજે કઇ જગ્યાએ અકસ્માત સર્જાયા?

સુરતના વરિયાવ રોડ ખાતે રિવર્સમાં આવતી કારચાલકે બાળકીને અડફેટમાં લેતા 2 વર્ષની બાળકીનું મોત નિપજ્યું છે. બાંધકામ સાઈટ પર આ ઘટના ઘટી હતી. જોકે આ ઘટનામાં અમરોલી પોલીસે કાર ચાલકની ધરપકડ કરી હતી.

અમદાવાદના બોપલમાં પણ અકસ્માતની ઘટના ઘટી

બીજી બાજુ આજે અમદાવાદના બોપલ વિસ્તારમાં પણ અકસ્માતની ઘટના ઘટી હતી. શહેરના VIP રોડ ઉપર આ ઘટના ઘટી હતી. જેમાં એક ડમ્પરે વાહન ચાલકોને ટક્કર મારી હતી. જેના CCTV પણ સામે આવ્યા હતા. આ અકસ્માતને લઇને ટ્રાફિક પોલીસે વધુ તપાસ હાથ ધરી હતી.