સુંદર દેખાવું કોને ન ગમે. કુદરતે દરેક વ્યક્તિને સુંદર બનાવી છે, પરંતુ આપણે વધુ સુંદર દેખાવા માટે મેકઅપનો સહારો લેતા હોઇએ છીએ. મેકઅપ લગાવવો એક કળા છે. એક નાનકડી મેકઅપ મિસ્ટેક તમારી બ્યુટી પર ગ્રહણ લગાવી શકે છે. મેકઅપ કરતી વખતે તમારે કેટલીક સામાન્ય પરંતુ મહત્ત્વની ભુલો ન થાય તેનું ધ્યાન રાખવું જોઇએ.
ફાઉન્ડેશનના શેડની પસંદગી
કેટલાક લોકો મુંઝવણમાં હોય છે કે ફાઉન્ડેશન તો ખરીદવું છે, પણ કયો શેડ લેવો. તેનો સૌથી સહેલો જવાબ છે કે તમારા સ્કિન ટોનથી સૌથી નજીકનો શેડ પસંદ કરવો જોઇએ. જો સ્કીન ટોન કરતા તે વધુ લાઇટ કે વધુ ડાર્ક હશે તો તમે છો તેના કરતા વધુ લાઇટ કે ડાર્ક દેખાશો.
કન્સીલર શેડની સાચી પસંદગી
આપણે કન્સીલર આંખો નીચેના કાળા કુંડાળાને ઢાંકવા, ખીલ કે એક્નેના ડાઘને કવર કરવા લગાવીએ છીએ. કન્સીલર હંમેશા આપણા સ્કીન ટોનથી માત્ર એક જ શેડ લાઇટ પસંદ કરવું જોઇએ. જો વધુ લાઇટ શેડ લગાવશો તો સ્કીન સાથે ભળી ન જતા સફેદ ડાઘ જેવું દેખાશે.
દિવસે હળવા મેકઅપનો ઉપયોગ
દિવસે હળવા મેકઅપનો ઉપયોગ કરવો જરુરી છે. દિવસ કરમિયાન બહુ હેવી મેકઅપ સારો લાગતો નથી. ન્યુડ લિપસ્ટિક, મેટ અને ન્યુડ આઇશેડો વધુ સુટ કરશે. ડાર્ક લિપસ્ટિક, હેવી ફાઉન્ડેશન, ડાર્ક બ્લશ કે આઇબ્રો દિવસ કરતા રાતના ફંકશનમાં વધુ સારું લાગે છે.
મોઇશ્વરાઇઝરનો ઉપયોગ
મેકઅપની શરુઆત કરતા પહેલા ફેસને તૈયાર કરવો પડે છે. જો ડ્રાય સ્કીન હોય તો ફેસ ક્રીમ અને ઓઇલીથી મીડિયમ સ્કિનવાળાએ એલોવીરા જેલ લગાવ્યા બાદ મેકઅપ શરુ કરવો. નહીં તો ડ્રાય સ્કીનવાળી વ્યક્તિના ચહેરા પર ડ્રાય પેચિસ આવશે અને ઓઇલી સ્કીન હશે તો મેકઅપ વધુ ટકશે નહીં. તમારી સ્કીન ટાઇપ પ્રમાણે પ્રાઇમર લગાવીને મેકઅપની શરુઆત કરી શકો.
લિપબામનો ઉપયોગ
તમારી લિપસ્ટીક ક્રીમી હોય તો વાંધો નહીં, પરંતુ જો મેટ લિપસ્ટિક લગાવવાના હો તો પહેલા લિપબામ કે જેલી લગાવો, પછી જ મેટ લિપસ્ટીક લગાવો. ઠંડીમા મેટ લિપસ્ટિકનો ઉપયોગ ટાળો. લિપ સ્ક્રબથી તમે ડેડ સ્કીન રિમુવ કરી શકો છો.
બ્લેન્ડીંગનું મહત્ત્વ
ફાઉન્ડેશન લગાવો કે બ્લશ કે કોન્ટુઅર કરો. એ બરાબર લગાવ્યુ નહીં હોય તો પણ બહુ ખરાબ લાગશે. તમે બ્રશથી લગાવતા હો કે આંગળીઓ વડે, પરંતુ તે સ્કીનમાં મિક્સ થાય એ ખુબ જરુરી છે.
આઇબ્રો પેન્સિલ
જો તમારી આઇબ્રો આછી હોય તો તેના પર આઇબ્રો પેન્સિલ, જેલ કે પાવડર લગાવીને તેને યોગ્ય આકાર આપી શકાય છે. તમારા વાળનો જે કલર હોય તેને મળતો આવતો કલર લગાવવો જોઇએ. વધુ ડાર્ક કલરથી આઇબ્રો નેચરલ નહીં લાગે.