ક્રિકેટ / આ IPLમાં નિષ્ફળ રહ્યા આ 9 સ્ટાર ખેલાડીઓ; ધોનીનો એક રન પડ્યો સાડા સાત લાખનો!

મહેન્દ્રસિંહ ધોની (ચેન્નઈ સુપર કિંગ્સ): આ સિઝનમાં એમ પણ ધોની પાસેથી સારા પ્રદર્શનની આશા નહોતી, કારણ કે તે વર્ષથી વધુ સમય સુધી કોઈ પ્રોફેશનલ ક્રિકેટ રમ્યો નહોતો અને IPL શરૂ થયાના એક મહિના પહેલાં જ ધોનીએ આંતરરાષ્ટ્રીય ક્રિકેટમાંથી નિવૃત્તિ જાહેર કરી દીધી હતી. ચેન્નઈ માટે ધોનીનું આ સૌથી ખરાબ વર્ષ રહ્યું. ધોનીએ ૧૨ ઇનિંગ્સમાં માત્ર ૨૦૦ રન જ બનાવ્યા. ધોનીને એક સિઝનના રૂ. ૧૫ કરોડ ચૂકવવામાં આવે છે. આમ કિંમતની દૃષ્ટિ જોવામાં આવે તો ધોનીનો એક CSKને સાડા સાત લાખ રૂપિયામાં પડ્યો. આ સિઝનમાં તેનો સર્વોચ્ચ સ્કોર અણનમ ૪૭ રનનો રહ્યો. આ વર્ષે ચેન્નઈની નિષ્ફળતાનું કારણ પણ ધોનીની ખરાબ બેટિંગ જ રહી.

ગ્લેન મેક્સવેલ (કિંગ્સ ઈલેવન પંજાબ): વારંવાર નિષ્ફળ જવા છતાં કિંગ્સ ઈલેવન પંજાબ સમગ્ર સિઝનમાં મેક્સવેલને તક આપતી રહી, પરંતુ મેક્સવેલનું બેટ શાંત જ રહ્યું. આ સિઝનમાં મેક્સવેલનો સર્વોચ્ચ સ્કોર ૨૪ બોલમાં માત્ર ૩૨ રનનો રહ્યો. તેણે આ સિઝનમાં માત્ર ૧૦૮ રન જ બનાવ્યા. મેક્સવેલને પંજાબની ટીમે ૧૦.૭૫ કરોડ જેટલી અધધ કિંમતે ખરીદ્યો હતો.  આમ મેક્સવેલનો એક રન પ્રીતિ ઝિન્ટાને ૯.૯૫ લાખમાં પડ્યો.અને આ જ કારણે પંજાબની ટીમ પ્લેઓફ સુધી પણ પહોંચી શકી નહીં.

આન્દ્રે રસેલ (કોલકાતા નાઇટ રાઇડર્સ): વિન્ડીઝના આ વિસ્ફોટક ખેલાડી માટે ૨૦૨૦ની આઇપીએલ સૌથી ખરાબ રહી છે. ૨૦૧૯ની સિઝન રસેલ માટે શાનદાર રહી હતી, જ્યારે તેણે ૫૬.૬૭ની સરેરાશથી ૫૧૦ રન ફટકારી દીધા હતા. ૨૦૨૦ની આઇપીએલમાં માત્ર ૧૩.૦૦ની સરેરાશથી રસેલ ૧૧૭ રન જ બનાવી શક્યો અને તેનો સર્વોચ્ચ સ્કોર ૨૫ રનનો રહ્યો. આ ઉપરાંત બોલિંગમાં તે માત્ર છ જ વિકેટ ઝડપી શક્યો.

એરોન ફિંચ (રોયલ ચેલેન્જર્સ બેંગલુરુ): ઓસ્ટ્રેલિયાના વન ડે અને ટી-૨૦ કેપ્ટન એરોન ફિંચનું કંગાળ ફોર્મ RCB માટે માથાનો  દુખાવો સાબિત થયું. કંગાળ ફોર્મને કારણે ફિંચને એક-બે વાર ટીમમાંથી પડતો પણ મૂકવામાં આવ્યો. ફિંચે લીગ રાઉન્ડની મેચમાં માત્ર ૨૩૬ રન બનાવ્યા, જ્યારે પ્લેઓફની મેચમાં હૈદરાબાદ સામે ફિંચે ૩૦ બોલમાં ૩૨ રનની ઇનિંગ્સ રમી. આમ ૨૦૨૦ની IPLમાં ફિંચ ૨૬૮ રન જ બનાવી શક્યો.

પેટ કમિન્સ (કોલકાતા નાઇટ રાઇડર્સ): IPLની હરાજીમાં રેકોર્ડ બ્રેક રૂ. ૧૫.૫૦ કરોડની કિંમતે વેચાયેલો કમિન્સ શરૂઆતની ૧૦ મેચમાં માત્ર ત્રણ જ વિકેટ ઝડપી શક્યો નહતો. ત્યાર બાદ છેલ્લી ચાર મેચમાં તેણે નવ વિકેટ ઝડપી. આમ કમિન્સે માત્ર ૧૨ જ વિકેટ ઝડપી અને બેટિંગમાં તેણે ૨૦.૮૫ની સરેરાશથી ૧૪૬ રન બનાવ્યા. ૧૫.૫૦ કરોડની કિંમતે વેચાયેલા કમિન્સની એક વિકેટ KKRને રૂ. ૧.૨૯ કરોડમાં પડી.

શેલ્ડન કોટ્રેલ (કિંગ્સ ઈલેવન પંજાબ): વિન્ડીઝના ડાબેરી ફાસ્ટ બોલર શેલ્ડન કોટ્રેલને કિંગ્સ ઈલેવન પંજાબે ૮.૫૦ કરોડમાં ખરીદ્યો હતો, પરંતુ આ બોલર વિકેટ ઝડપવાના બદલે તેના 'સલામી' આપવાના અંદાજને કારણે ચર્ચામાં રહ્યો. કોટ્રેલ માત્ર છ જ મેચ રમ્યો અને તેણે ફેંકેલી ૨૦ ઓવરમાં છ જ વિકેટ ઝડપી. આમ શેલ્ડનની એક વિકેટ કિંગ્સ ઈલેવનને ૧.૪૧ કરોડમાં પડી.

ક્રિસ મોરિસ (RCB): ક્રિસ મોરિસને ૧૦ કરોડ રૂપિયામાં ખરીદવામાં આવ્યો હતો,  જેને શરૂઆતની મેચોમાં મેદાનમાં ઊતરવાની તક મળી નહીં. પછી તેને મેદાનમાં ઉતારવામાં આવ્યો અને મોરિસ નવ મેચમાં ૧૧ વિકેટ જ ઝડપી શક્યો. આ સ્થિતિમાં બેંગલુરુને મોરિસની એક વિકેટ ૯૦ લાખ ઉપરની પડી.

શેન વોટસન (ચેન્નઈ સુપર કિંગ્સ): વોટસન અને ફાફ ડુ પ્લેસિસની ૧૮૧ રનની ભાગીદારીએ ચેન્નઈને ઓક્ટોબરની શરૂઆતમાં કિંગ્સ ઈલેવન પંજાબ સામે ૧૦ વિકેટે વિજય અપાવ્યો. એ દિવસે એવું લાગતું હતું કે CSKના આ ચેમ્પિયને વાપસી કરી છે. જોકે ત્યાર બાદ વોટસન છ ઇનિંગ્સમાં સાવ નિષ્ફળ રહ્યો. તેણે ચેન્નઈ તરફથી અંતિમ લીગ મેચ રમ્યા બાદ ક્રિકેટનાં બધાં ફોર્મેટમાંથી નિવૃત્તિની જાહેરાત કરી દીધી.

પૃથ્વી શો (દિલ્હી કેપિટલ્સ): RCB સામે ૫ ઓક્ટોબરે પૃથ્વી શોની ૨૩ બોલમાં ૪૨ રનની ઇનિંગ્સથી ચાહકો તેને IPLનો ભાવિ સ્ટાર ગણાવવા માંડ્યા હતા, પરંતુ ત્યાર બાદ પૃથ્વીનું પ્રદર્શન ૫, ૬૪, ૨, ૬૬ રનનું જ રહ્યું. ત્યાર પછીની પાંચ ઇનિંગ્સનો સ્કોર ૧૯, ૪, ૦, ૦ અને ૭ રનનો જ રહ્યો. આવા કંગાળ પ્રદર્શનને કારણે છેવટે બે મેચ માટે પૃથ્વીના સ્થાને અજિંક્ય રહાણેને ટીમમાં સામેલ કરવામાં આવ્યો. પૃથ્વી આ સિઝનમાં માત્ર ૨૨૮ રન જ બનાવી શક્યો છે.