આજે દેશભરમાં બેંકોમાં હડતાળ રહેશે. બેંકોમાં બે સંગઠન સાથે જોડાયેલા કર્મચારીઓ આજે હડતાળ પર ઉતરશે. આ ઉપરાંત દિવાળીની રજાઓના કારણે બેંક 3 દિવસ બંધ રહેશે. એક તરફ દિવાળી નજીક આવી રહી છે. તેવા સમયે જ બેંકો બંધ રહેતા લોકોને ભારે મુશ્કેલીનો સામનો કરવો પડી શકે છે. આ હડતાળથી બેંકિંગ સેવાઓ પર અસર પડવાની સંભાવના છે. જોકે ભારતીય સ્ટેટ બેંકના કર્મચારીઓ આ હડતાળમાં નહીં જોડાય.
આજે બેંક કર્મચારીઓ હડતાળ પર
દિવાળી પહેલા હડતાળથી હાલાકી
26- 27 ઓક્ટોબર બેંકો રહેશે બંધ
28 ઓક્ટોબરે કેટલીક બેંકો રહી શકે છે બંધ
29 ઓક્ટોબરે બેંકોમાં રજા રહેશે
બેંકોના સાત સંગઠન આ હડતાળમાં ભાગ નહીં લે
ઓલ ઈન્ડિયા બેંક એમ્પલોય યુનિયન અને બેંક એમ્પલોય ફેડરેશન ઓફ ઈન્ડિયાએ હડતાળની જાહેરાત કરી છે. બેંકોનું વિલિનીકરણ અને બેંકોમાં જમા રૂપિયા પર વ્યાજદર ઘટવાના વિરોધમાં આ હડતાળની જાહેરાત કરાઈ છે. બેંક ઓફ બરોડા, બેંક ઓફ મહારાષ્ટ્ર અને સિન્ડિકેન્ટ બેંક જેવી સરકારી બેંકોમાં આ હડતાળની અસર જોવા મળશે. જોકે બેંકોના 9માંથી 2 સંગઠન આ હડતાળમાં ભાગ નહીં લે.
દિવાળીના તહેવારે 4 દિવસ બેંકોમાં રહેશે રજા
આ સાથે જ દિવાળીના તહેવારના કારણે પણ બેંકોમાં રજા રહેશે. જેમાં 26 ઓક્ટોબરે મહિનાનો ચોથો શનિવાર છે જેથી રજા રહેશે. તો 27 ઓક્ટોબરે રવિવાર અને દિવાળી હોવાથી રજા રહેશે. જ્યારે 28 ઓક્ટોબરે બેંક ચાલુ રહી શકે છે. જ્યારે 29 ઓક્ટોબરે ફરીથી બેંકોમાં રજા રહેશે. 22 ઓક્ટોબરની હડતાળ બાદ 23થી 25 ઓક્ટોબર સુધી જ બેંકો ખુલ્લી રહેશે. જેથી આ ત્રણ દિવસમાં બેંકોના કામકાજ પૂર્ણ કરવા હોય તો કરી શકો છો.
એટીએમ અને ચેક ક્લિયરિંગમાં રહેશે તકલીફ
બેંકો બંધ રહેવાના કારણે એટીએમથી કેશ કાઢવામાં ખાતેદારોને તકલીફ પડી શકે છે. એટીએમમાં 2 દિવસને માટેની કેશ રિઝર્વ હોય છે. આ પછી કેશ માટે તકલીફ પડી શકે છે. આ રીતે ચેક ક્લીઅર કરવામાં પણ સમય લાગી શકે છે.