અમદાવાદમાં મળેલી સ્ટેન્ડિંગ કમિટીની મિટિંગમાં આજે ૬૨૦ લાખથી વધુ રકમનાં કામોને લીલીઝંડી આપવામાં આવી છે.
અમદાવાદ મનપાની સ્ટેન્ડિંગ કમિટીની બેઠક યોજાઇ
6.20 કરોડ રૂપિયાને વિકાસ કામોને મંજૂરી
શહેરનો વિકાસ બનશે વેગવંતો
અમદાવાદ મ્યુનિસિપલ કોર્પોરેશનની સ્ટેન્ડિંગ કમિટીની બેઠક મળી હતી. જેમાં રૂ. ૬૨૦ લાખથી વધુ રકમનાં કામોને મંજૂરીની મહોર લગાવવામાં આવી હતી. સ્ટેન્ડિંગ કમિટી ચેરમેન હિતેશ બારોટ, માહિતી આપતા જણાવ્યું કે સ્ટેન્ડિંગ કમિટીમાં રીક્રીએશનલ, કલ્ચરલ એન્ડ હેરીટેજ અને મટીરીયલ મેનેજમેન્ટ એન્ડ પરચેઇઝ કમિટીના કામોને મંજૂરી આપી છે.
રીક્રીએશનલ, કલ્ચરલ એન્ડ હેરીટેજ કમિટીના કામોને મંજૂરી
સ્ટેન્ડિંગ કમિટીની મિટીંગમાં રીક્રીએશનલ, કલ્ચરલ એન્ડ હેરીટેજ કમિટી દ્વારા રજૂ કરવામાં આવેલ કામો પૈકી પશ્ચિમ ઝોનના જુદા જુદા વોર્ડમાં ટ્રાન્સપોર્ટેશન તથા બગીચા ખાતાને લગતી અન્ય કામગીરીઓ માટે લોડીંગ ટેમ્પો તથા મજુરો સપ્લાય કરવાનું કામ કરાશે. તેમજ મિશન મીલીયન ટ્રીઝ અભિયાન અંતર્ગત પૂર્વ તથા પશ્ચિમ વિસ્તારમાં ઉપલબ્ધ પ્લાન્ટેશન કરવાના થતા પ્લોટ તથા અન્ય જરૂરીયાતની જગ્યાઓ પર તેમજ રોડની બંને બાજુના ગ્રીન પેચની ફરતે પ્લાન્ટેશનના રક્ષણ માટે ફેન્સીંગ કરવાના વાર્ષિક રેટ કોન્ટ્રાક્ટનું કામ મંજૂર કરાયું છે. વધુમાં બગીચા ખાતા દ્વારા ઉત્તર પશ્ચિમ ઝોન, દક્ષિણ ઝોન, પશ્ચિમ ઝોન, ઉત્તર ઝોન અને પૂર્વ ઝોનના વિવિધ પ્લોટોમાં મીયાવાકી પદ્ધતિથી પ્લાન્ટેશન કરી એક વર્ષ સુધી તેના મેઇન્ટેનન્સની કામગીરી માટે કુલ મળી રૂા. ૫૪૦ લાખથી વધુના કામોને મંજુરી આપવામાં આવી છે.
મટીરીયલ મેનેજમેન્ટ એન્ડ પરચેઇઝ કમિટીના કામોને પણ મંજૂરી
તેમજ મટીરીયલ મેનેજમેન્ટ એન્ડ પરચેઇઝ કમિટી દ્વારા રજૂ થયેલ કામો પૈકી વપરાશકર્તા ખાતાની જરૂરિયાત માટે ૪૭૫ નંગ યુ-પીવીસી કોલમ પાઈપ તેમજ મેલોથીઓન ૫% ડસ્ટ પાવડર ખરીદ કરવા માટે કુલ રૂા. ૮૫ લાખથી વધુના કામોને મંજુરી આપવામાં આવી હોવાનું સત્તાવાર રીતે જાહેર થવા પામ્યું છે.