અમદાવાદમાં ઢગાએ હેવાનીયતની તમામ હદ વટાવી પોતાની પૌત્રીની ઉંમરની બાળકી સાથે શારીરિક ચેનચાળા કરતા પોલીસે તેને દબોચી લીધો હતો.
અમદાવાદમાં ગોદરેજ ગાર્ડન સિટીમાં બાળકી સાથે છેડતીની ઘટના
9 વર્ષની બાળકની સાથે વૃદ્ધે કરી છેડતી
લિફ્ટમાં બાળકી સાથે વૃદ્ધે છેડતી કરતા ચકચાર
અમદાવાદના ચાંદખેડા વિસ્તારમાં 62 વર્ષીય વૃદ્ધે હેવાનિયતની હદ વટાવી દીધી હોવાની ઘટના સામે આવી છે. નવ વર્ષની બાળકી શાળાએથી પરત ફરી લિફ્ટમાં પોતાના ઘરે જઈ રહી હતી તે સમયે લિફ્ટમાં બાળકીની એકલતાનો લાભ લઈને વૃદ્ધે તેની સાથે અડપલાં કર્યા હતા. જોકે આ ઘટના સંદર્ભે બાળકીએ માતા-પિતાને જાણ કરતા પોલીસ ફરિયાદ નોંધાતા ચાંદખેડા પોલીસે આરોપીની ધરપકડ કરી છે.
ભાનુપ્રતાપ રાણા નામના શખ્સ સામે નોંધાયો ગુનો
આ અંગે જાણવા મળતી વિગત અનુસાર ભાનુપ્રતાપ રાણા નામના 62 વર્ષીય શખ્સે હેવાનિયતની તમામ હદો વટાવી દીધી હતી. ચાંદખેડા પોલીસ સ્ટેશન વિસ્તારમાં આવતા ગોદરેજ ગાર્ડન સિટીમાં રહેતા પરિવારની 9 વર્ષની દીકરી જે ધોરણ 4 માં અભ્યાસ કરે છે, તે શાળાએથી છૂટીને ઘરે પરત ફરી હતી અને લિફ્ટમાં 11માં માળે જઈ રહી હતી, તે સમયે લિફ્ટમાં તેની સાથે સામેલ આ આરોપીએ બાળકીની એકલતાનો લાભ લઈને તેની સાથે અડપલા અને છેડતી કરી હતી. આથી ડરી ગયેલી બાળકીએ માતાને જાણ કરી હતી.
છેડતીના CCTV સામે આવ્યા
જે ઘટનાને લઈને બાળકીની માતાએ આ અંગે પરિવારને જાણ કરી લિફ્ટમાં લાગેલા સીસીટીવી ફૂટે ચેક કરતા તેમાં નરાધમની હરકતો કેદ થઈ હતી. આથી આ ઘટના સંદર્ભે ચાંદખેડા પોલીસ સ્ટેશનમાં ભાનુપ્રતાપ રાણા નામના આરોપી સામે પોકસોની કલમો હેઠળ ફરિયાદ નોંધાતા પોલીસે આરોપીને અટકાયત કરી ધરપકડ કરવાની તજવીજ શરૂ કરી છે. મહત્વનું છે કે પોલીસની પ્રાથમિક તપાસમાં સામે આવ્યુ કે આરોપીના પુત્રોને ઘરે પણ સંતાનો છે. વધુ આરોપી હાલ નિવૃત જીવન ગુજારે છે, અને એમકોમ પાર્ટ વન સુધી અભ્યાસ કર્યો છે અને ગોદરેજ ગાર્ડન સિટીમાં પત્ની અને દીકરા સાથે રહે છે. ત્યારે આ મામલે પોલીસે આરોપીનો મોબાઇલ ફોન પણ કબજે કરી એફએસએલમાં મોકલ્યો છે અને આરોપીએ અગાઉ કોઈપણ બાળકી સાથે આ પ્રકારે દુષ્કૃત્ય કર્યું છે કે કેમ તે દિશામાં પૂછપરછ હાથ ધરવામાં આવી છે.