અરબી સમુદ્રમાંથી કોસ્ટગાર્ડે મોટી માત્રામાં ડ્રગ્સ જપ્ત કર્યું છે. કોસ્ટગાર્ડે DRIની માહિતીના આધારે કચ્છના જખૌ બંદર પાસે સમુદ્રમાં સર્ચ ઓપરેશન હાથ ધર્યું હતું. પાકિસ્તાન તરફથી આવતા એક જહાજમાં સર્ચ ઓપરેશન દરમિયાન 194 પેકેટ ડ્રગ્સ જપ્ત કર્યું છે. જેની માર્કેટ કિંમત 600 કરોડની આસપાસ આંકવામાં આવી રહી છે.
ડ્રગ્સ સાથે પાકિસ્તાનના કરાચીથી આવતા જહાજને કચ્છના જખૌ નજીકથી ઝડપી પાડવામાં આવ્યું છે. આ ડ્રગ્સ કરાચીથી ગુજરાત પહોંચવાનું હતું.
મળતી માહિતી મુજબ જહાજમાંથી કોસ્ટગાર્ડે 13 આરોપીની ધરપકડ કરી છે. આ આ જહાજ પાકિસ્તાનના કરાંચી બોર્ડરથી નીકળી હતી. જહાજનું નામ અલ મદિના હોવાનું સામે આવ્યું છે. કોસ્ટગાર્ડે સવારે 9 વાગ્યાની આસપાસ આ ઓપરેશન પાર પાડ્યું હતું.
મહત્વનુ છે કે, અગાઉ દ્વારકાના જામસલાયામાંથી 1500 કરોડ રૂપિયાનુ ડ્રગ્સ ઝડપાયુ હતું. આ મામલે પોલીસે આરોપીઓની પણ ધરપકડ કરી હતી. ત્યારે ATSએ હેરોઈન કેસમાં વોન્ટેડ આરોપી મંજૂર અહેમદની પણ ધરપકડ કરી હતી.
અવારનવાર ગુજરાતમાંથી લાખો-કરોડોના ડ્રગ્સ ઝડપાવાના કિસ્સાઓ સામે આવી રહ્યા છે. ત્યારે ગુજરાતનું યુવાધન ડ્રગ્સ તરફ વળ્યું હોય તેવું જણાઇ રહ્યું છે. પંજાબની જેમ ગુજરાતના યુવાધનને બરબાદ કરવા ડ્રગ્સનો ઉપયોગ કરવામાં આવી રહ્યો છે. યુવાનો દારૂ બાદ ડ્રગ્સના રવાડે ચડ્યા છે, ત્યારે આ મામલે તંત્ર અને સરકાર શું પગલા લે તે જોવું રહ્યું.
નાર્કોટિક્સ વિભાગના જણાવ્યા અનુસાર, ગુજરાતના અમદાવાદ, વડોદરા, સુરત અને રાજકોટમાં સૌથી વધુ ડ્રગ્સનો ઉપયોગ થાય છે. મોટા શહેરોમાં પાર્ટીની આડમાં શાળા-કોલેજોની આસપાસ યુવાનો ડ્રગ્સનું સેવન કરી રહ્યા છે. ગુજરાતનું યુવાધન બરબાદ થાય તે પહેલા યુવાનોમાં જાગૃતિ લાવવી જરૂરી છે.