આશ્ચર્ય / છ વર્ષની ઉંમરમાં સિક્સ પેક?  ઇરાનના આ બાળકને 'મેસ્સી' બનવુ છે

•  આરતના ઇન્સ્ટાગ્રામ પર 40 લાખ ફોલોઅર
• લોકો સમજી બેસે છે છોકરી

    
માત્ર છ વર્ષની ઉંમરમાં સિક્સ પેક એબ બનાવનાર આરત હોસેની હવે ઇન્સ્ટાગ્રામ સ્ટાર પણ બની ગયો છે. તે સોકર પ્લેયર અને જિમ્નાસ્ટ પણ છે. લોકો ઘણીવાર તેને છોકરી સમજી બેસે છે. ઈરાનના બાબોલ શહેરમાં રહેતો આરત તેના સિક્સ પેક એબ અને સોકરના કારણે સોશિયલ મીડિયા સ્ટાર બની ચુક્યો છે.

આરતના પિતા મોહમ્મદે તેને નાની ઉંમરમાં જ ટ્રેનિંગ આપવાનું શરૂ કરી દીધું હતું. આરત નવ મહિનાનો હતો ત્યારથી તેને જિમ્નાસ્ટિક કરાવવાનું શરૂ કરી દીધું હતું અને બે વર્ષની ઉંમર પૂરી થાય ત્યાં સુધી તો આંતરરાષ્ટ્રીય મીડિયામાં તે ચમકી ચૂક્યો હતો. આરતને સોકર રમવું ખૂબ પસંદ હતું, પરંતુ ચર્ચામાં તે પોતાના શરીરના કારણે આવ્યો. આરતનો જન્મ ઇંગ્લેન્ડના લિવરપુલમાં થયો હતો. હવે તે લિવરપુલ એકેડેમીમાં સ્પોર્ટ્સની ટ્રેનિંગ લઇ રહ્યો છે. સોશિયલ મીડિયા પર આરતનું ફેન ફોલોઇંગ વિશાળ છે. 

માત્ર ઇન્સ્ટાગ્રામ પર તેના ૪૦ લાખ ફોલોઅર છે. તેની લગભગ દરેક પોસ્ટ પર એક મિલિયન લાઇક આવી છે. આરતના પિતાનું કહેવું છે કે દીકરામાં અનોખા ટેલેન્ટને જોયા બાદ આસપાસના લોકોએ સલાહ આપી કે ઈન્સ્ટાગ્રામ પર તેનું એક પેજ બનવું જોઇએ. પેજ બન્યા બાદ લોકો ઝડપથી તેને પસંદ કરવા લાગ્યા અને તેના લાખો ફોલોઅર પણ બની ગયા. આરત દીવાલ પર ચઢવાની કળામાં પણ માહેર છે. હવે તેનું સપનું છે કે મોટા થઇને તે બાર્સિલોના સોકર ક્લબ માટે રમે, તેના પસંદગીના ખેલાડીઓમાં લિયોનલ મેસી સામેલ છે. તે મેસીની જેમ રમવા ઇચ્છે છે.