માંડવી બીચ ખાતે સહેલાણીઓ સાથેની સ્પીડ બોટ પલટી મારી જતા એક જ પરિવારના 6 સભ્યો ડૂબ્યા હતા. જોકે, સ્થાનિક તરવૈયાઓએ તુરંત બનાવ સ્થળે પહોંચી તમામ લોકોને ઉપર ખેંચી ડૂબતા બચાવી લીધા હતા.
સ્થાનિક તરવૈયાની મદદથી તમામ પ્રવાસીઓને બચાવી લેવાયા
પર્યટન ક્ષેત્રે પ્રવાસી વર્ગમાં આકર્ષણ ધરાવતા કચ્છ જિલ્લામાં હવે બારેમાસ સ્થાનિક અને બહારના પ્રવાસીઓ જાણીતા સ્થળોની મુલાકાત લેતા રહે છે. ત્યારે આજે માંડવી બીચ ખાતે સહેલાણીઓ સાથેની સ્પીડ બોટ પલટી મારી જતા અફરાતફરીનો માહોલ છવાયો હતો. જોકે, સ્થાનિક તરવૈયાઓની મદદથી તમામને બચાવી લેવાયા હતા.
વાંકાનેરનો એક પરિવાર દુર્ઘટનાનો શિકાર બન્યો
પશ્ચિમ કચ્છના માંડવી બીચ ખાતે ગતરોજ વાંકાનેરનો એક પરિવાર દુર્ઘટનાનો શિકાર બન્યો હતો. વાંકાનેરથી કચ્છ ફરવા આવેલો એક પરિવાર માંડવીના દરિયામાં બોટિંગની મજા માણી રહ્યો હતો. આ દરમિયાન બોટ પલટી મારી ગઈ હતી, જેના કારણે બોટમાં સવાર એક જ પરિવારના 6 લોકો પાણી ખાબક્યા હતા.
દુર્ઘટનાના પગલે કિનારે ઉભેલા લોકોમાં ગભરાટ સાથે અફરાતફરીનો માહોલ છવાઈ ગયો હતો. જોકે માંડવી બીચ પર હાજર સ્થાનિક તરવૈયા અને અન્ય બોટની મદદથી તમામ લોકોને ડૂબતા બચાવી લેવામાં આવ્યા હતા. સદભાગ્યે જાનહાની ટળી હતી.
મહિલાને સારવાર અર્થે હોસ્પિટલમાં ખસેડાઈ
એવું કહેવામાં આવી રહ્યું છે કે, દુર્ઘટનાનો શિકાર બનેલા એક પરિવારના 6 સભ્યો પૈકી એક મહિલાને ઈજા થતાં તાત્કાલિક સારવાર અર્થે હોસ્પિટલમાં ખસેડવામાં આવી હતી.