રાજ્યમાં ભાવનગર અને આણંદમાં એકસાથે બે અલગ-અલગ અકસ્માતમાં કુલ 6 લોકોના મોત નિપજ્યાં છે.
ભાવનગરમાં ડમ્પર અને કાર વચ્ચે ગંભીર અકસ્માત
અકસ્માતમાં ઘટનાસ્થળે જ 4 લોકોનાં મોત નિપજ્યાં
આણંદમાં પણ અજાણ્યા વાહનની ટક્કરે 2નાં મોત
રાજ્યમાં અવાર-નવાર અકસ્માતની ઘટનાઓ સામે આવતી રહે છે. ત્યારે આજે વધુ એક અકસ્માત થયાની ઘટના આજે સામે આવી છે. જેમાં ભાવનગરમાં એક ડમ્પર અને કાર વચ્ચે ગંભીર અકસ્માત સર્જાયો છે. જેમાં 4 લોકોના મોત નિપજ્યાં છે. ભાવનગર શહેરના નવા બંદર રોડ નજીક આ અકસ્માત સર્જાયો છે. જો કે આ ઘટનાની જાણ પોલીસને થતા તુરંત ઘટનાસ્થળે પોલીસ અને 108 સહિતનો કાફલો પહોંચી ગયો હતો.
સ્વિફ્ટ કાર અને ડમ્પર વચ્ચે અકસ્માત થતા 4નાં ઘટનાસ્થળે જ મોત
નોંધનીય છે કે, ભાવનગરના નવાબંદર રોડ પર એક સ્વિફ્ટ કાર અને ડમ્પર વચ્ચે ગમખ્વાર અકસ્માત સર્જાયો. જેમાં ચાર લોકોના ઘટનાસ્થળે જ મોત નિપજ્યા છે. જો કે આ ઘટનાની જાણ થતા જ તુરંત ઘટનાસ્થળે સ્થાનિક લોકોના ટોળેટોળાં એકઠા થઇ ગયા હતા. ત્યાર બાદ પોલીસને જાણ કરાતા પોલીસ ટીમ પણ ઘટના સ્થળે પહોંચી ગઇ હતી. આ ઘટનામાં ભોગ બનેલા મૃતકોને બહાર કાઢવા ફાયર વિભાગની પણ મદદ લેવાઇ હોવાની માહિતી મળી રહી છે. ત્યાર બાદ પોલીસે મૃતદેહોને બહાર કાઢી પોતાના કબજામાં લઈ પોસ્ટમોર્ટમ માટે આગળની કાર્યવાહી હાથ ધરી છે.
આણંદમાં પણ ગમખ્વાર અકસ્માતમાં બે યુવાનોના મોત
તો બીજી બાજુ આણંદમાં પણ ગમખ્વાર અકસ્માત સર્જાયો છે. આ અકસ્માતમાં મળતી માહિતી પ્રમાણે વઘાસી નજીક નેશનલ હાઇ-વે પર હિટ એન્ડ રનની ઘટના ઘટી છે. જેમાં અજાણ્યા વાહનની ટકકરે બે યુવકોના કરૂણ મોત નિપજ્યા છે. મળતી માહિતી પ્રમાણે પુરપાટ ઝડપે જતા વાહને ટક્કર મારતા બંને યુવાનો 15 ફૂટ દૂર સુધી ફંગોળાયા હતા. જેમાં તેઓના કરૂણ મોત નિપજ્યાં છે. મૃતક યુવાનો મૂળ ઉત્તરપ્રદેશ અને બિહારના રહેવાસી હોવાનું જાણવા મળી રહ્યું છે અને વઘાસી નજીક તેઓ ખાનગી કંપનીમાં નોકરી કરતા હતા. બાદમાં પોલીસે ઘટનાસ્થળે પહોંચી બંને યુવાનોના મૃતદેહને PM માટે ખસેડ્યા હતા. આ ઘટનામાં આણંદ ગ્રામ્ય પોલીસે અજાણ્યા વાહન ચાલક વિરુદ્ધ ગુનો નોંધ્યો છે.