દક્ષિણ ગુજરાતમાં આવી પહોંચી મેઘસવારી, વાવણી લાયક વરસાદ થતા ખેડૂતોમાં આનંદની લાગણી, તો બીજી તરફ નદીઓ-ચેકડેમ થયા ઓવરફ્લો
ગુજરાતમાં મેઘો મહેરબાન
સુરત અને વલસાડમાં ધોધમાર વરસાદ
ઉમરપાડા અને કપરાડામાં વધુ વરસાદ
ગુજરાતમાં હવામાન વિભાગની આગાહી મુજબ વરસાદી માહોલ જોવા મળી રહ્યો છે. સુરત, નવસારી, વલસાડ, અરવલ્લી, મહીસાગરમાં વરસાદનું આગમન થયું છે.મહત્વનું છેકે હવામાન વિભાગે આગામી 4 દિવસ વરસાદની આગાહી કરી છે ત્યારે આજે રાજ્યના કયા વિસ્તારોમાં વરસાદની સ્થિતિ શું છે તે વિશે વાત કરીએ,
ઉમરપાડામાં 6 કલાકમાં 6 ઈંચ
આજે અત્યારસુધીમાં સૌથી વધારે વરસાદ સુરતના ઉમરપાડામાં નોંધાયો છે. ઉમરપાડામાં 6 કલાકમાં 6 ઇંચ વરસાદ પડતા વીરા અને મોહન નદી બે કાંઠે વહી છે. ઉમરપાડાના ગોંદલિયા ગામ પાસેથી પસાર થતી વીરા નદીમાં નવા નીર આવ્યા. તેમજ નસારપુર ગામમાં આવેલો ચેકડેમ ઓવરફલો થયો. બીજી તરફ નદી પરનો લૉ-લેવલ બ્રિજ પાણીમાં ગરકાવ થતા વાહનચાલકો અટવાયા હતા.
કાપોદ્રામાં ઘૂંટણસમા પાણી ભરાયા
સુરતમાં વહેલી સવારથી જ વરસાદ વરસતા કાપોદ્રા ચાર રસ્તા ખાતે ઘૂંટણ સમા પાણી ભરાયા હતા. પાણી ભરાવવાને કારણે વાહનચાલકોને હાલાકી વેઠવાનો વારો આવ્યો હતો. અંદાજિત એક કિમી સુધીનો ટ્રાફિક જામ થયો. ઠેર ઠેર પાણી ભરાવવાના લીધે વાહનો પણ બંધ પડી જતા ધક્કા મારવાનો વારો આવ્યો હતો.
કામરેજમાં મેઘો ધોધમાર
આ તરફ કામરેજમાં પણ ધોધમાર વરસાદને પગલે સર્વિસ રોડ પર પાણી ભરાતા તે રોડ બંધકરવાની ફરજ પડી. વરસાદી પાણીના યોગ્ય નિકાલના અભાવને લીધે ઠેર ઠેર પાણી ભરેલા જોવા મળ્યા.
સુરત ગ્રામ્યમાં વરસાદ : ખેડૂતો ખુશખુશાલ
સુરત ગ્રામ્યમાં પણ વરસાદી માહોલ જામતા ખેડૂતો ખુશખુશાલ થયા. માંગરોળમાં 2ઇંચ વરસાદ વરસ્યો આ ઉપરાંત ઉમરપાડા, માંડવી, ઓલપાડમાં વરસાદ થયો. વાવણીલાયક વરસાદ થતા ખેડૂતોના ચહેરા પર આનંદની લાગણી જોવા મળી.
સુરત શહેરમાં ધીમીધારે વરસાદ
આ તરફ સુરત શહેરમાં પણ ધીમીધારે વરસાદની શરૂઆત થઇ. અઠવા લાઈન્સ, સ્ટેશન વિસ્તાર, નાનપુરા, રિંગરોડ વિસ્તાર, તથા કતારગામ, મગદલ્લા વિસ્તારમાં વરસાદ પડ્યો. આ ઉપરાંત સહારા દરવાજા, ઉધના દરવાજા વિસ્તારમાં વરસાદ પડતા વાતાવરણમાં ઠંડકની લહેર ફરી વળી. શહેરીજનોએ વરસાદ આવતા રાહતનો શ્વાસ લીધો હતો. જો કે વરસાદી પાણીના યોગ્ય નિકાલના અભાવને કારણે વરાછાના ન્યૂ બરોડા પ્રિસ્ટેજ વિસ્તારમાં પાણી ભરાયા હતા.
નવસારી જિલ્લામાં વાવણીલાયક વરસાદ
નવસારી જિલ્લામાં વાવણીલાયક વરસાદ થતા ખેડૂતો હરખાયા. ચીખલી, જલાલપોર તાલુકામાં પોણા ઈંચ જેટલો વરસાદ થયો. આ તરફ નવસારી શહેરમાં પણ ધીમીધારે વરસાદ વરસ્યો. એપીએમસી માર્કેટ રોડ સહિતના વિસ્તારમાં વરસાદ પડતા શહેરીજનોને કાળઝાળ ગરમીમાંથી રાહત મળી હતી.
વલસાડમાં ધોધમાર વરસાદ
વલસાડ જિલ્લામાં મોડી રાત્રે 6.4 ઈંચ જેટલો વરસાદ વરસ્યો. કપરાડા અને ધરમપુરમાં 1 ઇંચ વરસાદ નોંધાયો જ્યારે પારડીમાં 3.6 ઇંચ અને વાપીમાં 1.44 ઇંચ વરસાદ નોંધાયો. ભારે વરસાદને કારણે તિથલ રોડ,એમ.જી રોડ,છીપવાડમાં પાણી ભરાયા. હાલાર રોડ,સિવિલ હોસ્પિટલ રોડ,સ્ટેશન રોડ પણ પાણી પાણી થયા હતા. મોગરાવાડી વિસ્તાર અને રેલવે ગરનાળામાં ભરાયા પાણી ભરાતા વાહનચાલકો પરેશાન થયા હતા.
28 ગામને જોડતો અંડરપાસ બંધ
તો વલસાડમાં ભારે વરસાદને કારણે નીચાણવાળા વિસ્તારમાં પાણી ભરાયા. તેમાં પણ 28 ગામને જોડતો અંડરપાસ પાણી ભરાતા બંધ થયો. પરિણામે વાહનચાલકોને ભારે પરેશાની વેઠવાનો વારો આવ્યો. તો આ તરફ રસ્તા પર પણ પાણી ભરાતા સ્થાનિકો પરેશાન થયા. પારનેરા પારડીના મુખ્ય માર્ગમાં ભરાયા પાણી ભરાતા લોકોએ હાલાકી વેઠવાનો વારો આવ્યો.
મહીસાગર જિલ્લામાં વરસાદ
મહીસાગર ઉપરાંત રાજસ્થાનની સરહદ તરફના વિસ્તારમાં વરસાદી માહોલ જોવા મળ્યો. પુનાવાડા, બચકરીયા, રાઠ સહિતના વિસ્તારમાં વરસાદ થતા ખેડૂતોએ રાહતનો શ્વાસ લીધો. સારા વરસાદને પગલે વધુ ઉત્પાદન થાય તેવી આશા બંધાઇ.
અરવલ્લીમાં વરસાદી માહોલ
આ તરફ અરવલ્લીમાં વહેલી સવારથી જ વરસાદી માહોલ જોવા મળ્યો. વરસાદનું આગમન થતા ખેડૂતોમાં ખુશી છવાઇ. ભિલોડા, સાવરકુંડલા, અને ખાંભા સહિત ગ્રામ્ય વિસ્તારમાં સારો વરસાદ થયો. છાપરી, ભાડ, નાનુડી સહિતના વિસ્તારમાં ભારે વરસાદ થતા ખેતરો પાણી પાણી થયા હતા.