ઈંગ્લેન્ડ સામે બીજી ટેસ્ટમાં ટીમ ઇન્ડિયા તરફથી અક્ષર પટેલને ટેસ્ટ ક્રિકેટમાં પદાર્પણ કરવાની તક મળી. ભારતીય ટીમ ૮૯ વર્ષથી ટેસ્ટ ક્રિકેટ રમી રહી છે અને અક્ષર દેશનો ૩૦૨મો ટેસ્ટ ક્રિકેટર બન્યો. ૨૦૨૧માં ટેસ્ટ ડેબ્યૂ કરનારો તે ચોથો ભારતીય છે. આ વર્ષે અક્ષર પહેલાં વોશિંગ્ટન સુંદર, ટી. નટરાજન અને નવદીપ સૈનીએ ઓસ્ટ્રેલિયા પ્રવાસ દરમિયાન ડેબ્યૂ કર્યું હતું.
ઓછી ટેસ્ટ રમનાર પ્લેયરને ભવિષ્યમાં તક મળશે કે નહીં તે પ્રશ્ન
ઘણાં ફાસ્ટ બોલરો મેદાનમાં એક્ટિવ પણ ટીમમાં પરત ફરે તેવી શક્યતા મુશ્કેલ
ગાવસ્કરની કેપ્ટનશિપમાં સૌથી વધારે ખેલાડીઓએ ડેબ્યૂ કર્યું
૧૫૦ ભારતીય ખેલાડી ફક્ત એકથી છ ટેસ્ટ રમી શક્યા
ભારત તરફથી અત્યાર સુધીમાં જે ૩૦૨ ક્રિકેટરે ટેસ્ટ મેચ રમી છે, તેમાંના ૧૫૦ ખેલાડી વધુમાં વધુ છ ટેસ્ટ રમી શક્યા છે. આવા ક્રિકેટરની કરિયર છ ટેસ્ટ બાદ સમાપ્ત થઈ ગઈ. આમાં ટીમ ઇન્ડિયાના વર્તમાન બેટિંગ કોચ વિક્રમ રાઠોડ, મીડિયમ પેસર પ્રવીણકુમાર અને વિકેટકીપર-બેટ્સમેન અજય રાત્રા જેવા ખેલાડીનો સમાવેશ થાય છે. પૃથ્વી શો, શુભમન ગિલ, મોહંમદ સિરાઝ અને વોશિંગ્ટન સુંદર જેવા યુવા ખેલાડીઓ પણ હજુ છથી ઓછી ટેસ્ટ રમ્યા છે, પરંતુ હજુ આ ખેલાડીઓને તક મળશે એ નક્કી છે.
૫૧ ખેલાડીએ માત્ર એક ટેસ્ટ જ ટેસ્ટ રમી
અત્યાર સુધીમાં ૫૧ એવા ભારતીય ક્રિકેટર છે, જેઓ માત્ર એક જ ટેસ્ટ રમી શક્યા છે. આમાં કેટલાક યુવા ખેલાડી પણ સામેલ છે, જેમને હજુ પણ તક મળી શકે તેમ છે. જયદેવ ઉનડકટ અને વિનયકુમાર જેવા ફાસ્ટ બોલર હજુ પણ મેદાનમાં એક્ટિવ છે, પરંતુ તેમને ટેસ્ટ ટીમમાં ફરી તક મળે એ બહુ મુશ્કેલ લાગી રહ્યું છે. એક ટેસ્ટ મેચ બાદ ટીમની બહાર થઈ ગયેલા ખેલાડીઓમાં સબા કરીમ પણ સામેલ છે. અનિલ કુંબલેનો બોલ આંખ પર વાગવાના કારણે સબા કરીમનું કરિયર સમાપ્ત થઈ ગયું હતું.
૧૦ ખેલાડી જ ટેસ્ટ મેચ રમવામાં સદી ફટકારી શક્યા
ભારત તરફથી અત્યાર સુધીમાં માત્ર ૧૦ એવા ક્રિકેટર છે, જેઓ ૧૦૦ કે તેથી વધુ ટેસ્ટ મેચ રમી શક્યા છે. ૨૦૦ ટેસ્ટ સાથે સચીન ટોચના સ્થાને છે. રાહુલ દ્રવિડે ૧૬૩ અને લક્ષ્મણે ૧૩૪ ટેસ્ટ મેચ રમી છે.
સૌથી વધુ ૨૭ ખેલાડીનું ડેબ્યૂ ગાવસ્કરની કેપ્ટનશિપમાં થયું
ભારતીય ટેસ્ટ ક્રિકેટના ઇતિહાસમાં સૌથી વધુ ૨૭ ખેલાડીઓએ સુનીલ ગાવસ્કરની કેપ્ટનશિપમાં ડેબ્યૂ કર્યું છે. મોહંમદ અઝહરુદ્દીનની કેપ્ટનશિપમાં ૨૬ અને મહેન્દ્રસિંહ ધોનીની કેપ્ટનશિપમાં ૨૫ ખેલાડીએ પદાર્પણ કર્યું છે. આ ઉપરાંત લાલા અમરનાથ (૨૪), સી. કે. નાયડુ (૨૧), મન્સુર અલી ખાન પટૌડી (૨૧) પણ એવા કેપ્ટન રહી ચૂક્યા છે, જેમની કેપ્ટનશિપમાં ૨૦થી વધુ ખેલાડીઓએ ટેસ્ટ ડેબ્યૂ કર્યું છે. સૌરવ ગાંગુલીના નેતૃત્વમાં ૧૯, સચીન તેંડુલકરના નેતૃત્વમાં ૧૪ અને વિરાટ કોહલીના નેતૃત્વમાં ૧૩ ખેલાડી ડેબ્યૂ કરી ચૂક્યા છે. અજિંક્ય રહાણેની કેપ્ટનશિપમાં છ ખેલાડીએ ટેસ્ટ ક્રિકેટમાં પદાર્પણ કર્યું છે.
૩૦૨ ખેલાડીઓએ મળીને ૨.૬૦ લાખથી વધુ રન બનાવ્યા અને ૭,૮૮૭ વિકેટ ઝડપી
ટેસ્ટ ક્રિકેટમાં ભારત તરફથી ૩૦૨ ખેલાડીઓએ મળીને કુલ ૨.૬૦ લાખથી વધુ રન બનાવ્યા છે અને ૭,૮૮૭ વિકેટ ઝડપી છે. રન બનાવવામાં મામલામાં સૌથી આગળ માત્ર ઈંગ્લેન્ડ અને ઓસ્ટ્રેલિયાના જ બેટ્સમેન જ છે. જ્યારે વિકેટ ઝડપવાના મામલામાં ઈંગ્લેન્ડ, ઓસ્ટ્રેલિયા અને વિન્ડીઝના બોલર હજુ પણ ભારતીય ખેલાડીઓથી આગળ છે. ઈંગ્લેન્ડ તરફથી અત્યાર સુધીમાં ૬૯૬, ઓસ્ટ્રેલિયા તરફથી ૪૬૦ અને વિન્ડીઝ તરફથી ૩૨૫ ખેલાડી ટેસ્ટ ક્રિકેટ રમી ચૂક્યા છે.