આપઘાતનો પ્રયાસ / હડકંપ: માગ પુરી નહીં થતાં શિક્ષણ વિભાગની બહાર 5 શિક્ષિકાએ પીધુ ઝેર, જાણો ક્યાં બની ઘટના

• પશ્ચિમ બંગાળમાં 5 શિક્ષિકાએ પીધુ ઝેર
• વિરોધ પ્રદર્શન કરતી વખતે કર્યો આપઘાતનો પ્રયાસ 
• શિક્ષિકાઓ હાલ હોસ્પિટલમાં સારવાર હેઠળ 

પશ્ચિમ બંગાળની પ્રાથમિક શાળાની પાચ શિક્ષિકાઓએ મંગળવારે શિક્ષા વિભાગના મુખ્યાલયની બહાર ઉભા રહીને ઝેર પી લીધું હોવાની માહિતી સામે આવી છે. જે શિક્ષીકાઓએ ઝેર પી લીધું છે, તે તેમની માંગને લઈને શિક્ષા વિભાગના મુખ્યાલયની બહાર પ્રદર્શન કરી રહી હતી. શિક્ષિકાઓને તુરંત હોસ્પિટલમાં ખસેડવામાં આવી છે. જોકે પાંચ પૈકી 2 શિક્ષિકાની હાલત હાલમાં ગંભીર છે. 

પોલીસ આવતા ઝેર પી લીધુ

આ ઘટના સમયે પોલીસ સ્થળ પર પહોચી હતી અને આંદોલનમાં બેસેલા લોકોને વિખેરવાનો પ્રયાસ કરી રહી હતી. જોકે તે સમયે આ પાંચ મહિલાઓએ ઝેર પી લીધું જેના કારણે પોલીસ પણ દોડતી થઈ ગઈ હતી.

પોલીસે શિક્ષિકાઓને તુરંત હોસ્પિટલ ખસેડી 

પોલીસના કહેવા પ્રમાણે પાચ પૈકી 3 શિક્ષિકાઓ તો સ્થળ પરજ બેભાન થઈ ઘઈ હતી. જેથી તેમને તાત્કાલીક નજીકમાં આવેલ વિઘાનગર ઉપમંડલ હોસ્પિટલમાં ખસેડવામાં આવી જોકે તેમની હાલત વધારે ખરાબ થતા તેમને એનઆરએસ મેડિકલ કોલેજ અને હોસ્પિટલમાં ખસેડવામાં આવી હતી. 

વેતન વધારાની માગ પર કરી રહ્યા હતા વિરોધ પ્રદર્શન 

જે શિક્ષિકો સરકારી પે રોલ પર નથી તેમને 10 થી 15 હજાર સુધીનું વેતન આપવામાં આવે છે. જે વેતનમાં વધારાની માગ છેલ્લા કેટલાય સમયથી શિક્ષકો કરી રહ્યા છે. જે શિક્ષકો સરકારી પે રોલ પર નથી તેમનું કહેવું છે કે નવી શિક્ષા નીતિને કારણે તેમને રોજગાર પૂરો નથી મળી રહ્યો. જેથી તેઓ લાંબા સમયથી વેતન વધારવાની માગ કરી રહ્યા છે. વધુમાં પ્રદર્શન કરનાર શિક્ષકોએ એવું પણ કીધું કે જ્યારે વિરોધ કરવાનું શરૂ કર્યું તો તેમની બદલી કરી દેવામાં આવી હતી. 

રાજકારણમાં આવ્યો ગરમાવો 

ઉલ્લેખનીય છે કે આ ઘટનાને લઈને પશ્ચિમ બંગાળમાં રાજકારણ ગરમાયું છે, જેમા ભાજપ નેતા અને પ્રવક્તા શમિક ભટ્ટાચાર્યએ કહ્યું કે સરકાર શિક્ષકોનું સન્માન નથી કરી રહી જેના કારણે આ ઘટના ઘટી છે. તો બીજી તરફ તૃણમૂલ કોંગ્રેસના પ્રવક્તા કુણાલ ઘોષે આ બનાવની નિંદા કરતા કહ્યું કે શિક્ષકોને ઝેર પીવા કોણે પ્રેરીત કર્યા તે જાણવું જરૂરી છે.