મોતના ઘૂંટ / ઝેરી દારૂથી મોતનો સિલસિલો યથાવત્: છપરામાં 24 જ કલાકમાં 5 લોકોના મોત, 2ની હાલત ગંભીર 

• બિહારના છપરામાં પ્રતિબંધિત ઝેરી દારૂએ હાહાકાર મચાવ્યો 
• છેલ્લા 24 કલાકમાં ઝેરી દારૂ પીવાના કારણે 5 લોકોના શંકાસ્પદ મોત
• ઝેરી દારૂ પીને બે લોકો ગંભીર રીતે બિમાર પડતાં હોસ્પિટલ ખસેડાયા 

બિહારમાં ફરી એકવાર પ્રતિબંધિત ઝેરી દારૂએ હાહાકાર મચાવ્યો હોય તેમ છેલ્લા 24 કલાકમાં ઝેરી દારૂ પીવાના કારણે 5 લોકોના શંકાસ્પદ મોતની ઘટના સામે આવી છે. જેમાં ઝેરી દારૂ પીને બે લોકો ગંભીર રીતે બિમાર પડ્યા છે, જેમને હોસ્પિટલમાં સારવાર આપવામાં આવી રહી છે. આ તરફ સ્થાનિક પોલીસે મૃતદેહોને કબજામાં લઈ પોસ્ટમોર્ટમ માટે મોકલી આપ્યા છે. નોંધનીય છે કે, ઓગસ્ટની શરૂઆતમાં પણ જિલ્લામાં નકલી દારૂ પીવાથી 10થી વધુ લોકોના મોત થયા હતા.  

બિહારના છપરામાં કથિત રીતે ઝેરી દારૂ પીવાથી 5 લોકોના શંકાસ્પદ મોત થયા છે. ઘટનાની વિગત એવી છે કે, ગરખા પોલીસ સ્ટેશન વિસ્તારના ભુઆલપુર ગામમાં કથિત રીતે કેટલાક લોકોએ મુચકનપુર પાસે ગેરકાયદેસર દારૂ વેચનાર પાસેથી દારૂ ખરીદ્યો હતો. જે પીધા બાદ અચાનક એકસાથે બધાની તબિયત બગડી હતી. જેમાં છેલ્લા 24 કલાકમાં 5 લોકોના મોત પણ થઈ ચૂક્યા છે. મૃતકના પરિજનોએ પણ દારૂ પીવાની વાતને સમર્થન આપ્યું છે. આ તરફ જ ગામમાં 5 લોકોના મોત બાદ સ્થાનિક વહીવટી તંત્ર હરકતમાં આવ્યું છે. તમામ મૃતદેહોને પોસ્ટમોર્ટમ માટે છપરા હોસ્પિટલમાં લાવવામાં આવ્યા છે. જોકે હવ પોસ્ટમોર્ટમ બાદ સાચું કારણ સ્પષ્ટ થશે.

મૃતકોની ઓળખ થઈ 

છપરામાં કથિત રીતે ઝેરી દારૂ પીવાથી મોત થયેલા વ્યક્તિઓમાં રામજીવન રામ, રોહિત સિંહ, લોહા સિંહ, પપ્પુ સિંહ અને અલ્લાઉદ્દીનનો સમાવેશ થાય છે.  આ તરફ ઝેરી દારૂ પીવાથી સતત મોત થતા ગામમાં ખળભળાટ મચી ગયો છે. લોકો પોતપોતાના પરિવારજનોને સારવાર માટે હોસ્પિટલ લઈ જઈ રહ્યા છે. જોકે ઘટનાની માહિતી મળતાં જ પોલીસે વિસ્તારમાં ધામા નાખ્યા હતા અને આરોપીઓને પકડવા માટે દરોડા શરૂ કરી દીધા હતા. 

સમગ્ર મામલે આબકારી અધિક્ષક રજનીશ કુમારે જણાવ્યું કે, ઘટનાની માહિતી મળતા જ વિભાગની ટીમ ગામમાં પહોંચી અને તપાસ શરૂ કરી. તેમણે કહ્યું કે, તપાસ બાદ જ સ્પષ્ટ થશે કે મામલો શું છે. જોકે, તાજેતરમાં માકરમાં ઝેરી દારૂના કારણે 13 લોકોના મોત થયા બાદ ગરખામાં પણ આવો જ એક કિસ્સો સામે આવતાં દારૂબંધી પર સવાલો ઉઠી રહ્યા છે.

1 વર્ષમાં ઝેરી દારૂએ અનેકનો ભોગ લીધો 

સ્થાનિક વિગતો મુજબ છેલ્લા એક વર્ષમાં છપરામાં દારૂના કારણે 50થી વધુ લોકોના મોત થયા છે. આમાંના ઘણા મૃત્યુ પ્રશાસનની નજરમાં પણ નથી. છપરાના માકરમાં દારૂના કૌભાંડની ઘટના બાદ ફરી એકવાર મહિલાઓની આંખમાં આંસુ આવી ગયા છે અને મહિલાઓ સવાલ કરી રહી છે કે, સરકાર જણાવે કે,  દારૂબંધી સફળ કેમ નથી થતી ? હજુ મામલો થાળે પડ્યો ન હતો કે ભુલપુર ગામમાં દારૂની ઘટના બની હતી.