સુરત: ઉધનામાં થયેલ ફાયરિંગ મામલો પોલીસે કરી 5 આરોપીની ધરપકડ

સુરતઃ ઉધના વિસ્તારમાં સિલિકોન શોપર્સ મોલમાં થયેલા ફાયરિંગના મામલે પોલીસે ફાયરિંગ કરનારા 5 આરોપીઓની ધરપકડ કરી છે. મહત્વનું છે કે આ પાંચ આરોપીઓમાંથી 2 આરોપીઓ સગીર વયના છે. ધરપકડ કરાયેલા આ તમામ આરોપીઓ વરાછા વિસ્તારના છે. પોલીસે મોબાઈલ સ્નેચરના ગુનામાં સામેલ આરોપીઓની અટકાયત કરતા પોલીસને ફાયરિંગની કડી મળી હતી. જો કે આ ફાયરિંગની ઘટના CCTV કેમેરામાં કેદ થઈ હતી.  

ઉલ્લેખનીય છે કે શહેરના સતત ધમધમતા ઉધના મેઇનરોડ ઉપર આવેલા સિલિકોન શોપર્સમાં થોડો દિવસ અગાઉ ફાયરિંગ કરવાની ઘટના બની હતી. આ ઘટનાને પગલે સ્થાનિક પોલીસે તપાસના ઘોડા દોડાવતા ગતરોજ મોડી સાંજે 5 જેટલા આરોપીઓની ધરપકડ કરી હતી. 

સુરતની ઉધના પોલીસના હાથે ઝડપાયેલા 5 આરોપીઓમાં 2 આરોપીઓ સગીર વયના હોવાથી તેમની પ્રાથમિક તપાસ હાથ ધરીને તેમને બાળ અદાલતને સોંપવાની પણ તજવીજ હાથ ધરવામાં આવી હતી. પકડાયેલા આરોપીઓની પ્રાથમિક તપાસ કરવામાં આવતા આ આરોપીઓ સુરતના વરાછા વિસ્તારના હોવાનું માલૂમ પડ્યું હતુ. જો કે પોલીસે આ આરોપીઓ સામે ગુનો દાખલ કરીને કાયદેસરની કાર્યવાહી હાથ ધરી હતી.