શહેરમાં ગુનાખોરીનો ગ્રાફ ઘટવાની જગ્યાએ વધી રહ્યો છે. ચોરી, લૂંટ જેવી ઘટનાઓ હવે શહેરમાં સામાન્ય બની છે. પોલીસ ઘરફોડ ચોર તેમજ લૂંટારુઓને પકડવા માટે એડીચોટીનું જોર લગાવી રહી છે ત્યાર શહેરમાં કાર તેમજ એક્ટિવાની ડેકી તોડી ચોરી કરતી ગેંગ ફરી સક્રિય થઈ છે. સતાધાર ચાર રસ્તા પાસે જે.જી. ઇન્ટરનેશનલ સ્કૂલની સામે પાન પાર્લર પર ગયેલા પીજીના સંચાલકના એક્ટિવાની ડેકી તોડી રૂ. પાંચ લાખની રોકડ રકમની ચોરી કરીને બે શખ્સ ફરાર ગયા હોવાની ઘટના પ્રકાશમાં આવી છે.
એક્ટિવાની ડેકી તોડી રૂ. પાંચ લાખની રોકડ રકમની ચોરી
આજથી ત્રણ મહિના પહેલાં પાટણ ખાતે આવેલ મકાન ભાવેશભાઈ ઠક્કરને વેચાણ કર્યું હતું
સીસીટીવી ફૂટેજમાં બે અજાણ્યા શખ્સ એક્ટિવાની ડેકી તોડીને પૈસા લઇ જતા કેમેરા કેદ થઇ ગયા
હરેશભાઇ સીજીરોડ અને ગુરુકુળ ખાતે પીજી ચલાવે છે
ચાણક્યપુરી વિસ્તારમાં આવેલા શાયોના સિટી, વિભાગ-૧માં રહેતા હરેશભાઇ ઠક્કરે બે અજાણ્યા શખ્સ વિરુદ્ધમાં સોલા પોલીસ સ્ટેશનમાં ફરિયાદ કરી છે. હરેશભાઇ સીજીરોડ અને ગુરુકુળ ખાતે પીજી ચલાવે છે. હરેશભાઇએ આજથી ત્રણ મહિના પહેલાં પાટણ ખાતે આવેલ મકાન ભાવેશભાઈ ઠક્કરને વેચાણ કર્યું હતું, જેના પાંચ લાખ રૂપિયા હરેશભાઈને ભાવેશભાઈ પાસે લેવાના હોવાથી બે-ત્રણ દિવસ પહેલાં આંગડિયા પેઢી મારફતે મોકલી આપવાની વાત કરી હતી.
જિગર ઠક્કર એક્ટિવા લઈને પેમેન્ટ લેવા સાયન્સ સિટી પરોઠા ગલીમાં આવેલ વી પટેલ આંગડિયા પેઢી પર ગયા હતા
ગઈ કાલે સાંજના પાંચ વાગ્યાની આસપાસ હરેશભાઇ પર વી. પટેલ આંગડિયા પેઢીમાંથી ફોન આવ્યો હતો કે તમારું પાંચ લાખનું પેમેન્ટ આવેલ છે તો આવીને લઇ જાઓ. આમ વાત થતાં હરેશભાઇ અને તેમનો મિત્ર જિગર ઠક્કર એક્ટિવા લઈને પેમેન્ટ લેવા સાયન્સ સિટી પરોઠા ગલીમાં આવેલ વી પટેલ આંગડિયા પેઢી પર ગયા હતા અને રૂપિયા લઈને એક્ટિવાની ડેકીમાં મૂકીને ઘરે જતા હતા તે દરમિયાનમાં હરેશભાઇ અને તેમનો મિત્ર જે.જી. ઇન્ટરનેશનલ સ્કૂલની સામેના પાન પાર્લર પર મસાલો ખાવા જવાનું હોવાથી તેમનું એક્ટિવા પાર્ક કરીને ગયા હતા.
બે અજાણ્યા ઇસમ એક્ટિવાનું લોક તોડી ડેકીમાંથી પાંચ લાખની રોકડ રકમ લઈને ફરાર
હરેશભાઈ મસાલો ખાઈને એક્ટિવા પાસે ગયા ત્યારે એક્ટિવાની નંબર પ્લેટ તૂટેલી હાલતમાં જોવા મળતાં હરેશભાઇએ ડેકી ખોલી તો તેમાં મૂકેલા રૂપિયા ગાયબ હતા. હરેશભાઈ પાન પાર્લર પર ગયા હતા તે દરમિયાન બે અજાણ્યા ઇસમ એક્ટિવાનું લોક તોડી ડેકીમાંથી પાંચ લાખની રોકડ રકમ લઈને ફરાર થઇ ગયા હતા. આથી હરેશભાઈએ તુરંત જ આ મામલે પોલીસને જાણ કરી હતી. ત્યારબાદ પોલીસ પણ આ ઘટનાને લઇ સક્રિય થઇ ગઇ હતી અને આસપાસના લાગેલા સીસીટીવી ફૂટેજમાં બે અજાણ્યા શખ્સ એક્ટિવાની ડેકી તોડીને પૈસા લઇ જતા કેમેરા કેદ થઇ ગયા હતા. સોલા પોલીસે સીસીટીવી ફૂટેજના આધારે બે શખ્સોની શોધખોળ શરૂ કરી છે.