વડોદરામાં દૂષિત પાણીની સમસ્યા હજુ પણ યથાવત છે. વડોદરાના પૂર્વ અને દક્ષિણ વિસ્તારના 5 લાખ લોકો દૂષિત પાણી પીવા મજબૂર બન્યા છે. વાઘોડિયા રોડ પર ભાથુજી નગર અને મોતી નગરમાં દૂષિત પાણી આવે છે. પીળા કલરનું દુર્ગંધ મારતું પાણી આવે છે જેને લઇ લોકોએ સ્વચ્છ પાણી માટે ટેન્કરનો સહારો લેવો પડી રહ્યો છે.
રાજ્યમાં પાણીની ગંભીર સમસ્યા સર્જાઈ છે. ત્યારે વડોદરા મહાનગર પાલિકાની બેદરકારી સામે આવી છે. જેમાં વડોદરાના પૂર્વ અને દક્ષિણ વિસ્તારના 5 લાખ લોકો દૂષિત પાણી પીવા મજબૂર બન્યા છે. ત્યારે નાલંદા વિસ્તારની પાણીની ટાંકીના અંડર ગ્રાઉન્ડ ટાંકાનો લેબ તૂટેલી હાલતમાં હોવાનું સામે આવ્યુ હતું. મળતી માહિતી મુજબ નિમેટાથી શુદ્ધ થયેલું પાણી આ ટાંકીમાં આવે છે. ત્યારબાદ આ પાણીનું વિતરણ કરવામાં આવે છે. જો કે આ ટાંકી ખૂબ જ ખરાબ હાલતમાં હોવાથી અહીં શુદ્ધ પાણી પણ દૂષિત થઈ જાય છે.
મહત્વનું છે કે, આ વિસ્તારના કોર્પોરેટર અને ડભોઈના ધારાસભ્ય શૈલેષ મહેતાએ અનેકવાર રજૂઆતો કરવા છતાં તંત્ર દ્વારા કોઈ કાર્યવાહી કરવામાં આવી નથી. જેને લઈને છેલ્લા બે વર્ષથી તૂટેલા સંપનું પાણી વડોદરાવાસીઓને પીવડાવવામાં આવી રહ્યું હોવાનો આક્ષેપ કરવામાં આવી રહ્યો છે.
પ્લાન્ટની સફાઈ થવા છતા આજે પણ આવ્યુ દુષિત પાણી
વડોદરાના પૂર્વ વિસ્તારમાં દુષિત પાણીની સમસ્યાના કારણે તંત્ર દ્વારા થોડા દિવસ અગાઉ પ્લાન્ટની સફાઈ કરવામાં આવી હતી. પ્લાન્ટની સફાઈ કર્યા બાદ પણ હજી સુધી દૂષિત પાણીની સમસ્યા યથાવત્ છે. પ્લાન્ટની સફાઈ થયા બાદ સરદાર એસ્ટેટની સોસાયટીમાં દુષિત પાણી આવ્યું હતું. તંત્ર દ્વારા શુદ્ધ પાણીના દાવા કરવામાં આવ્યા હતા. તંત્ર દ્વારા કરવામાં આવેલા દાવા પોકળ સાબિત થયા છે. પ્લાન્ટની સફાઈ બાદ પણ દુષિત પાણી આવતા સ્થાનિકોમાં રોષ જોવા મળ્યો છે.
પાણીની સમસ્યાનો મામલે નાયબમુખ્યમંત્રીએ મેળવ્યો ચિતાર
વડોદરા શહેર અને જિલ્લામાં પાણીની સમસ્યાને લઈને નાયબ મુખ્યમંત્રી નીતીન પટેલે ભાજપના હોદ્દેદારો અને ચૂંટાયેલા નેતાઓ સાથે બેઠક કરી હતી. વડોદરા શહેર અને જિલ્લામાં ઘણા દિવસોથી લોકો પાણી માટે બુમરાણ મચાવી રહ્યા છે. રાજ્યમાં પણ પાણીની તંગી છે ત્યારે વડોદરા જિલ્લાના પ્રભારી અને નાયબ મુખ્યમંત્રી નીતીન પટેલે વડોદરા ભાજપ કાર્યાલયે જિલ્લા અને શહેરના ભાજપના હોદ્દેદારો અને ચૂંટાયેલા નેતાઓ સાથે બેઠક કરી હતી. બેઠકમાં તમામ ધારાસભ્યો, કોર્પોરેટરો અને જિલ્લા સંગઠનના નેતાઓ હાજર રહ્યા હતા. બેઠકમાં નીતિન પટેલે વડોદરામાં પાણીની સમસ્યા, સ્થિતિનો ચિતાર મેળવ્યો હતો.