ક્રિકેટ / આ છે IPL ઈતિહાસના ટાઇ ટાઇ ફિશ કેપ્ટનઃ સંગાકારા સૌથી નિષ્ફળ કેપ્ટન

ટી-૨૦ ક્રિકેટમાં સારો કેપ્ટન કોઈપણ ટીમની સફળતાનું મુખ્ય કારણ હોય છે. આનું તાજું જ ઉદાહરણ વર્તમાન આઇપીએલમાં મહેન્દ્રસિંહ ધોનીના રૂપમાં જોઈ શકાય છે. ચેન્નઈ સુપર કિંગ્સને 'બુઢ્ઢાઓ'ની ટીમ કહેવામાં આવે છે, આમ છતાં કેપ્ટન ધોનીએ તેને ટોચના સ્થાને પહોંચાડી દીધી છે. યોગ્ય સમયે બોલિંગમાં પરિવર્તન, બેટ્સમેનોનો યોગ્ય બેટિંગ ક્રમ નક્કી કરવો, મેચનું પ્રેશર ખુદ પર લઈ લેવું. આ બધું કેપ્ટનના હાથમાં હોય છે અને આઈપીએલ જેવી મોટી ટૂર્નામેન્ટમાં તો કેપ્ટનનું મહત્વ વધારે વધી જાય છે, કારણ કે ટૂર્નામેન્ટ લગભગ બે મહિના સુધી ચાલે છે. આજે આપણે નજર કરીએ આઇપીએલ ઇતિહાસના પાંચ સૌથી નિષ્ફળ પર.

• કુમાર સંગાકારાઃ નિષ્ફળ કેપ્ટનની યાદીમાં શ્રીલંકાનો દિગ્ગજ કુમાર સંગાકારા ટોચના સ્થાને છે. સંગાકારાએ કિંગ્સ ઇલેવન પંજાબ, ડેક્કન ચાર્જર્સ (હવે સનરાઇઝર્સ હૈદરાબાદ) ટીમનું નેતૃત્વ સંભાળ્યું છે, જેમાં તેનો રેકોર્ડ કંઈક આવો છે. મેચ-૪૭, જીત-૧૫, હાર-૩૦, ટાઈ-૨, આઇપીએલમાં સંગાકારાની જીતની ટકાવારી માત્ર ૩૧.૯૧ ટકા જ છે.

• માહેલા જયવર્ધનેઃ શ્રીલંકાનો જ જયવર્ધને કિંગ્સ ઇલેવન પંજાબ, કોચ્ચિ ટસ્કર્સ કેરળ અને દિલ્હી ડેયરડેવિલ્સ (હવે દિલ્હી કેપિટલ)નો કેપ્ટન રહી ચૂક્યો છે. આઇપીએલમાં જયવર્ધનેનો રેકોર્ડ કંઈક આવો છે. મેચ-૩૦, જીત-૧૦, હાર-૧૯. જયવર્ધનેની જીતની ટકાવારી ૩૩.૩૩ ટકા છે.

• સૌરવ ગાંગુલીઃ કોલકાતાના પ્રિન્સ કહેવાતા સૌરવ ગાંગુલીએ કોલકાતા નાઇટ રાઇડર્સ, પુણે વાેરિયર્સ ટીમનું નેતૃત્વ સંભાળ્યું હતું. જેમાં તેણે કેપ્ટન તરીકેની ૪૨ મેચમાં ૧૭ જીત અને ૨૫ મેચમાં હારનો સામનો કર્યો છે. સૌરવની જીતની ટકાવારી ૪૦.૪૮ ટકા છે.

• જ્યોર્જ બેઇલી: બેઇલીએ માત્ર કિંગ્સ ઇલેવન પંજાબ ટીમની કેપ્ટનશિપ સંભાળી છે. જેમાં તેણે ૩૬ મેચમાંથી ૧૬ મેચમાં જીત, ૧૯ મેચમાં હારનો સામનો કર્યો છે. બેઇલની કેપ્ટનશિપમાં એક મેચ ટાઇમાં પરિણમી છે.  આમ તેની જીતની ટકાવારી ૪૪.૪૪ ટકા છે.

• રાહુલ દ્રવિડ: ધ વોલના નામથી જાણીતા રાહુલ દ્રવિડે આરસીબી, રાજસ્થાન રોયલ્સ ટીમનું નેતૃત્વ સંભાળ્યું છે, જેમાં તેનો રેકોર્ડ આ પ્રમાણે છે. મેચ-૪૮, જીત-૨૨, હાર-૨૬. રાહુલની જીતની ટકાવારી ૪૫.૮૩ ટકા છે.