હવામાન વિભાગની આગાહી અનુસાર, આગામી ત્રણ દિવસ રાજ્યમાં વરસાદી માહોલ રહેશે. ઉત્તર ગુજરાત અને કચ્છમાં ભારે વરસાદની આગાહી
રાજ્યમાં વરસાદને લઇ આગાહી
ઉત્તર ગુજરાત, કચ્છમાં ભારે વરસાદની આગાહી
કચ્છમાં 2 દિવસ ભારે વરસાદની આગાહી
રાજ્યમાં વરસાદને લઇ હવામાન વિભાગે આગાહી કરી છે. હવામાન વિભાગની આગાહી અનુસાર, આગામી ત્રણ દિવસ રાજ્યમાં વરસાદી માહોલ રહેશે. જેમાં ઉત્તર ગુજરાત અને કચ્છમાં ભારે વરસાદની આગાહી કરવામાં આવી છે. કચ્છમાં આગામી 2 દિવસ અતિભારે વરસાદ થવાની સંભાવના છે. સાથે સૌરાષ્ટ્ર, બનસકાંઠા, સાબરકાંઠા, વલસાડ, તાપીમાં ભારે વરસાદની આગાહી કરવામાં આવી છે. સાથે મધ્ય ગુજરાત, અમદાવાદ અને ગાંધીનગરમાં સામાન્ય વરસાદ થવાની શક્યતા છે.
ગુજરાતમાં ગઇકાલથી જ વરસાદે અનેક જિલ્લાઓમાં મેઘરાજાએ ધમાકેદાર બેટિંગ કરી છે ત્યારે સમગ્ર રાજ્યમાં આગામી 24 કલાક માટે અતિભારે વરસાદની હવામાન વિભાગે આગાહી કરી છે. હવામાન વિભાગે ઉત્તર ગુજરાત અને દક્ષિણ ગુજરાતમાં સારા એવા વરસાદની આગાહી કરી છે. સાથે સૌરાષ્ટ્ર અને કચ્છમાં પણ સારો એવો વરસાદ વરસશે. હવામાન વિભાગે આગાહી કરતા જણાવ્યું કે, ગુજરાત માટે 24 કલાક અતિભારે છે. ગુજરાતમાં આજે કચ્છ, બનાસકાંઠા, સાબરકાંઠા, મોરબી, જામનગર, દ્વારકા, ભરૂચ, સુરત, આણંદ, વલસાડ અને દમણ સહિતના વિસ્તારોમાં હવામાન વિભાગે ભારે વરસાદની આગાહી કરી છે.
ઉત્તર ગુજરાતમાં વરસાદની એન્ટ્રી
મેઘરાજાએ હવે ઉત્તર ગુજરાતને ઘમરોળ્યું છે. ગઇકાલે મોડી રાત્રે શરૂ થયેલો વરસાદ અત્યારે હાલ પણ ધીમી ધારે ચાલુ છે. ઉત્તર ગુજરાતના પાટણ, મહેસાણા, બનાસકાંઠામાં મેઘરાજાની સવારી આવી પહોંચતા ખેડૂતોના ચહેરા પર રોનક જોવા મળી હતી. આ તરફ મહેસાણામાં પણ ભારે વરસાદને કારણે ઠેર ઠેર પાણી ભરાઇ ગયા છે. તો પાટણ જિલ્લામાં પણ સારો વરસાદ આવ્યો છે. જિલ્લામાં સૌથી વધુ વરસાદ રાધનપુરમાં 6 ઈંચ જેટલો પડ્યો છે. આ સાથે બનાસકાંઠા જિલ્લામાં પણ ભારે વરસાદને કારણે રસ્તા ઉપર પાણી ભરાઈ ગયા છે.
મહેસાણામાં ભારે વરસાદથી અનેક વિસ્તારો જળમગ્ન
મહેસાણા જિલ્લામાં ગઈકાલે રાતથી શરૂ થયેલો વરસાદ હજી પણ રોકાવાનું નામ નથી લઈ રહ્યો. મહેસાણામાં વરસાદ સારો એવો વરસતા શહેરના અનેક વિસ્તારોમાં પાણી ભરાઇ ગયા. શહેરના નાગલપુર અને મોઢેરા ચોકડી બસ પોર્ટમાં પાણી ભરાઇ જતા મહેસાણા-અમદાવાદ હાઈ-વે ઉપર પાણી ભરાઇ ગયા. જેના લીધે વાહનવ્યવહારને પણ અસર થઇ છે.
આ સાથે મહેસાણાના ગોપીનાળામાં પણ કમર સુધી પાણી ભરાઈ ગયા હતા.
પાટણ જિલ્લામાં સૌથી વધુ વરસાદ રાધનપુરમાં
પાટણ જિલ્લામાં પણ ગઇકાલે રાત્રે 9 વાગ્યા આસપાસથી શરૂ થયેલો વરસાદ આજે વહેલી સવાર સુધી યથાવત રહ્યો હતો. આ સાથે અત્યારે હાલ પણ જિલ્લામાં ધીમીધારે વરસાદ ચાલુ છે. જોકે ગઇકાલ રાતથી લઈ અત્યાર સુધી જિલ્લાનો સૌથી વધુ વરસાદ રાધનપુરમાં 6 ઇંચથી વધુ નોંધાયો છે. આ સાથે પાટણ શહેર અને હારીજમાં 3-3 ઇંચ તો સિધ્ધપુરમાં 3.5 ઇંચ અને સાંતલપુરમાં 2 ઇંચથી વધુ વરસાદ નોંધાયો છે.
બનાસકાંઠામાં વરસાદ બાદ ઠેર-ઠેર પાણી ભરાયા
હવામાન વિભાગની આગાહી મુજબ બનાસકાંઠા જિલ્લામાં પણ ઠેર ઠેર વરસાદ પડતાં અનેક વિસ્તારોમાં વરસાદી પાણી ભરાઈ ગયા છે. આ સાથે નીચાણવાળા વિસ્તારમાં પાણી ભરાતા પરેશાની ઊભી થઈ છે. આ તરફ રસ્તા ઉપર પાણી ભરાતા વાહનચાલકો પણ પરેશાન થઈ રહ્યા છે. વિગતો મુજબ જિલ્લાના ડીસા, ભાભર, સુઈગામમાં વ્યાપક વરસાદ નોંધાયો છે. તો વળી ભાભર સુઇગામમાં 4 ઇંચ જેટલો વરસાદ નોંધાયો છે.