મહામારી / ફરી ચિંતા વધી: દેશમાં કોરોનાના કેસ ઘટ્યા પરંતુ આજે નોંધાયેલા મોતના આંકડા ચિંતાજનક

• દેશભરમાં સતત ઘટ્યું કોરોના સંકટ 
• 24 કલાકમાં 42,766 નવા કેસ નોંધાયા
• ગત 24 કલાકમાં નોંધાયેલા મોતના આંકડા ચિંતાજનક

શનિવારે આરોગ્ય મંત્રાલયે જાહેર કરેલા આંકડા મુજબ, દેશમાં છેલ્લા 24 કલાકમાં કોરોના વાયરસના 42,766 નવા કેસ નોંધાયા છે. તે જ સમયગાળામાં, કોવિડ 19 ને કારણે દેશમાં 1206 લોકોના મોત થયા છે.

45,254 લોકોએ કોરોનાને આપી મ્હાત

છેલ્લા 24 કલાકમાં 45,254 લોકોને દેશની હોસ્પિટલમાંથી રજા આપવામાં આવી છે. અત્યાર સુધીમાં, દેશમાં કુલ 2.99 કરોડથી વધુ લોકોએ કોરોનાને મ્હાત આપી છે. શનિવારે જાહેર થયેલા ડેટા પછી, દેશમાં કોરોના ચેપના કુલ કેસો હવે વધીને 3,07,95,716 પર પહોંચી ગયા છે. તે જ સમયે, દેશમાં કુલ મૃત્યુઆંક હવે વધીને 4,07,145 પર પહોંચી ગયો છે. હાલમાં, ભારતમાં કોરોનાના કુલ સક્રિય કેસ હવે 4,55,033 છે.

લૈમ્બડા સ્વરૂપનો ભારતમાં એકપણ કેસ નહીં 

તો સરકારે શુક્રવારે કહ્યું કે, ભારતમાં અત્યાર સુધી સાર્સ-સીઓવી-2ના લૈમ્બડા સ્વરૂપનો કોઈપણ કેસ નોંધાયો નથી. આરોગ્ય મંત્રાલયના સંયુક્ત સચિવ લવ અગ્રવાલે કહ્યું કે, ઈન્ડિયન સાર્સ COV-2 જીનોમિક્સ કંસોર્ટિયમ સ્વરૂપ પર ખાસ નજર રાખવામાં આવી રહી છે. 

મોતના આંકડાએ વધારી ચિંતા 

જ્યારે 1206 દર્દીઓ મૃત્યુ પામ્યા હતા. કોરોનાથી મૃત્યુ પામેલા આ લોકોની સંખ્યા 9 દિવસ પછી 1000 ને વટાવી ગઈ છે. આ અગાઉ 30 જૂને, 1,002 કોરોના દર્દીઓએ પોતાનો જીવ ગુમાવ્યો હતો. આના એક દિવસ પહેલા, 43,393 નવા દર્દીઓ મળી આવ્યા હતા અને 911 લોકો મૃત્યુ પામ્યા હતા.

કેરળ અને મહારાષ્ટ્રમાં આવી છે સ્થિતિ

જો કે સૌથી વધારે મુશ્કેલીમાં મૂકનારી વાત એ છે કે મહારાષ્ટ્ર હજુ સુધી બીજી લહેરના કેસમાં પહેલાની સ્થિતિમાં આવ્યું નથી. આ સાથે તેનો પીક 2.5 મહિના પહેલા પસાર થઈ ચૂક્યો હતો. તો કેરળમાં કોરોનાને લઈને ફરીથી કેસમાં વધારો નોંધાયો છે. 8 જુલાઈના રોજ છેલ્લા મહિને 2 વાર કેસ 15000ને પાર પહોંચ્યા હતા.  

આ જિલ્લામા પણ સ્થિતિ હજુ પણ ચિંતાજનક

કેરળમાં મલ્લપુરમ, કોટ્ટયમ, કાસરહોડ, કોઝિકોડ અને થિસૂરમાં આંકડા ચિંતાજનક છે. કેરળના 14 જિલ્લામાં સૌથી વધારે અડધાથી વધારે જિલ્લામાં ગયા મહિને કેસ વધી રહ્યા છે. જ્યારે કોટ્ટયમ, મલ્લપુરમ, કાસરગોડમાં કેસ નિયમિત રીતે વધી રહ્યા છે. કોટ્ટયમ અને થિસૂરમાં કેસ ન તો વધી રહ્યા છે અને ન ઘટી રહ્યા છે.