પડોશમાં રહેતી વિધવા મહિલાના ડોક્યુમેન્ટનો ઉપયોગ કરીને રેણુકા માતા મલ્ટી સ્ટેટ અર્બન ક્રેડિટ કો ઓપરેટિવ સોસાયટીમાં બોગસ એકાઉન્ટ ખોલાવીને પડોશીએ ૪૧.ર૧ કરોડ રૂપિયાનું ટ્રાન્જેકશન કર્યું હોવાનો ચોકાવનારો કિસ્સો નરોડામાં સામે આવ્યો છે. અજાણ મહિલાના ઘેર જ્યારે ઇન્કમટેક્ષ વિભાગે સમન્સ મોકલ્યો ત્યારે સમગ્ર મામલો સામે આવ્યો છે. નોટબંધી બાદ ઇન્કમટેકસ વિભાગે કરોડો રૂપિયાનાં ટ્રાન્જેકશનની તપાસ શરૂ કરી હતી જેમાં આ ભાંડો ફૂટ્યો હતો.
વિધવા મહિલાના દસ્તાવેજ ઉપર લીધી કરોડની લોન
બેંક એકાઉન્ટ ખોલાવી આચર્યુ કૌભાંડ
આવકવેરા ખાતના દરોડામાં બહાર આવી વાત
નરોડા વિસ્તારમાં આવેલ પંચતીર્થ સોસાયટીમાં રહેતા શિલ્પાબહેન મનીષભાઇ અમીને નરોડા પોલીસ સ્ટેશનમાં પડોશમાં રહેતા પંકજ રામી, વંદના રામી, દિનેશ રામી અને નીલેશ દવે વિરુદ્ધમાં ફરિયાદ કરી છે. માર્ચ મહિનામાં શિલ્પાબહેન અમીનને ઇન્કમટેક્સ વિભાગ દ્વારા હાજર થવા સમન્સ મોકલાયો હતો. સમન્સ મળતાં જ શિલ્પાબહેન તેમના પુત્ર સાથે ઇન્કમટેક્સ વિભાગના આસિસ્ટન્ટ કમિશનર કવિતાબહેન યાદવને મળ્યાં હતાં.
લોન લેનાર મહિલાનું કોઈ બેક એકાઉન્ટ જ નહતુ
આસિસ્ટન્ટ કમિશનર શિલ્પાબહેન અમીનને બાપુનગર વિસ્તારમાં આવેલ રેણુકા માતા મલ્ટી સ્ટેટ અર્બન ક્રેડિટ કો. ઓપરેટિવ સોસાયટીમાં તેમના ખાતામાં થયેલ ૪૧.ર૧ કરોડના ટ્રાન્જેક્શનના મામલે પૂછપરછ કરી હતી. શિલ્પાબહેન આ સાંભળીને ચોંકી ગયાં હતાં અને તેમનું કોઇ આવું ખાતું રેણુકા માતા મલ્ટી સ્ટેટ અર્બન ક્રેડિટ કો. ઓપરેટિવ સોસયટીમાં નહીં હોવાનું કહ્યું હતું.
ખાતુ ખોલવવા મહિલાના દસ્તાવેજનો ઉપયોગ
આસિસ્ટન્ટ કમિશનરે ક્રેડિટ સોસાયટીમાં ખાતું ખોલાવવા માટે જમા કરાવાયેલા શિલ્પાબહેનના તમામ ડોક્યુમેન્ટ બતાવ્યા હતા. ત્યારબાદ કવિતાબહેને પંકજ રામી બાબતે પૂછતાં શિલ્પાબહેને જણાવ્યું હતું કે તે પડોશના મકાનમાં રહે છે અને અમારું મકાન ખાલી હોવાના કારણે ત્રણેક વર્ષ પહેલાં તેમની ભાણી વંદના અને ભાણેજ જમાઇ દિનેશ રામીને રહેવા માટે આપ્યું હતું. કવિતાબહેને પંકજ મામલે પૂછપરછ કરતાં શિલ્પાબહેને તેમના મામલે કેમ પૂછપરછ કરો છો તેમ પૂછ્યું હતું. ૪૧.ર૧ કરોડના બેનામી ટ્રાન્જેક્શનમાં પંકજનું નામ પણ છે તેમ આસિસ્ટન્ટ કમિશનરે જણાવ્યું હતું.
પાડોશીએ જ છેતરી
પંકજએ તેમની ભાણી વંદના અને દિનેશની મદદથી કોઇ રીતે શિલ્પાબહેનના ડોક્યુમેન્ટ મેળવીને રેણુકા માતા મલ્ટી સ્ટેટ અર્બન ક્રેડિટ કો ઓપરેટિવ સોસાયટીમાં બોગસ ખાતું ખોલાવીને આઠ મહિનામાં ૪૧.ર૧ કરોડ રૂપિયાનું ટ્રાન્જેક્શન કર્યું હતું. ગઇ કાલે મોડી રાત્રે શિલ્પાબહેને આ મામલે નરોડા પોલીસ સ્ટેશનમાં ફરિયાદ કરી છે. જેમાં પોલીસે ગુનો દાખલ કરીને તપાસ શરૂ કરી છે.