કાર્યવાહી / સૌરાષ્ટ્ર ભાજપના નેતાનો પુત્ર ડ્રગ્સ સાથે ઝડપાયો: પોલીસે ભૂરા અને ટકો પરસાણા સહિત 4ની કરી ધરપકડ

• ભાજપના નેતાનો પુત્ર ઝડપાયો ડ્રગ્સ સાથે
• રાજકોટ તાલુકા ભાજપના મંત્રી સુરેશ રૈયાણીનો પુત્ર
• આણંદ પોલીસ દ્વારા 4 લોકોની કરાઇ ધરપકડ

ગુજરાતમાં બોટાદ લઠ્ઠાકાંડ બાદ એક બાદ એક દારૂબંધીની પોલ ખોલતી ઘટના બની રહી છે. મહાનગરો સહિત ગામોમાં પણ દેશી દારૂના અડ્ડા ધમધમી રહ્યા હોવાનું સામે આવી રહ્યુ છે. ક્યાંક યુવાનો દારૂપીને છાકટા બન્યા છે તો ક્યાંક પોલીસ જ દારૂપાર્ટી કરતા રંગે હાથ ઝડપાઇ છે. ક્યાંક તંત્ર દ્વારા કાર્યવાહી કરવામાં આવી રહી છે તો ક્યાંક હજી પણ આંખ આડા કાન કરીને બીજી લઠ્ઠાકાંડની ઘટના બને તેવી રાહ જોવાઇ રહી છે. આ તમામ વચ્ચે ભાજપ નેતાનો પુત્ર ડ્રગ્સ સાથે ઝડપાતા ખળભળાટ મચ્યો. 

સુરેશ રૈયાણીના પુત્ર સહિત 4ની ધરપકડ

બોટાદ લઠ્ઠાકાંડમાં 55થી વધુ લોકોના મોત થતા રાજ્યની પોલસી સફાળી જાગી છે. ત્યારે  આણંદ પોલીસે રાજકોટ તાલુકા ભાજપના મંત્રી સુરેશ રૈયાણીના પુત્ર સહિત 4 લોકોની ધરપકડ કરી છે. સુરેશ રૈયાણીના પુત્ર સહિત 4 લોકો 1.96 લાખનું ડ્રગ્સ લઇને આવી રહ્યા હતા. જેને લઇ આણંદ પોલીસે તમામ લોકોની ધરપકડ કરી છે. પોલીસે સુરેશ રૈયાણાની પુત્ર રોહન રૈયાણી, તૃષાર ઉર્ફે ભૂરો સાંગાણી, રોહન વસોયા અને મોહિત ઉર્ફે ટકો પરસાણાની ધરપકડ કરી છે. જે બાદ આગળની કાર્યવાહી હાથ ધરી છે.

પોલીસે ગુનો નોંધીને હાથ ધરી તપાસ 

મહત્વનું છે કે આણંદ જિલ્લાના સોજિત્રાના ડભોઇ ગામ પાસેથી એસઓજીએ ડ્રગ્સ ઝડપી પાડ્યુ હતું.  મળતી માહિતી અનુસાર પોલીસને બાતમી મળતા કાર રોકીને ચેકિંગ કરતા તેઓ પાસેથી ડ્રગ્સ મળી આવ્યું. કારમાં 4 લોકો સવાર હતા.  આ ચારેય લોકો રાજકોટથી ડિલીવરી આપવા સોજિત્રા આવ્યા હોવાની શંકા સેવાઇ રહી છે. હાલ તો પોલીસે ગુનો નોંધીને વધુ તપાસ હાથ ધરી છે.