રેલવેમાં મુસાફરી કરતા મુસાફરો માટે રાહતના સમાચાર છે. ઓક્ટોમ્બર 2019થી ભારતીય રેલવે દરરોજ 4 લાખ જેટલી રિઝર્વેશન સીટોમાં વધારો કરશે. રેલવે ઓક્ટોમ્બરમાં નવી ટેક્નોલોજીનો ઉપયોગ કરવા જઈ રહી છે.
જેમાં રેલવે ઓક્ટોબર સુધીમાં તમામ એલએચબી કોચમાં હેડ ઓન જનરેશન સિસ્ટમ્સ ઇન્સ્ટોલ કરશે. એલએચબી કોચમાં HOG સિસ્ટમના અમલીકરણ સાથે ટ્રેનમાં વીજળી પૂરી પાડવામાં આવશે.
5 હજાર વધારાના કોચ લગાડાશે
ઉલ્લેખનીય છે કે, આ વીજ પુરવઠાનો ઉપયોગ કરીને એસી કોચમાં લાઇટ અને અન્ય સાધનો ચલાવવામાં આવશે. આ ટેક્નોલાજીના ઉપયોગને કારણે રેલવેને દર વર્ષે ઇંધણના ખર્ચમાં રૂપિયા 6 હજાર કરોડની બચત થશે અને આ બચતમાંથી 5 હજાર વધારાના કોચ લગાડવામાં આવશે.
આપને જણાવી દઇએ કે, હાલ પાવર સપ્લાય માટે ટ્રેનની આગળ અને પાછળ બે પાવર કાર જનરેટર હોય છે. જેના ઉપયોગ દ્વારા નોન એસી કોચમાં વીજળીના સપ્લાય માટે 40 લીટર પ્રતિ કલાક ડીઝલ જ્યારે એસી કોચમાં 65 થી 70 લીટર પ્રતિ કલાક ડીઝલનો વપરાશ થાય છે.
નવી ટેકનીક ઇકો-ફ્રેંડલી
ત્યારે HOG સિસ્ટમનો ઉપયોગના કારણે ટ્રેનોમાંથી પાવર કાર જનરેટર્સ દૂર કરાશે અને ડિઝલની બચત થશે અને આ બચત દ્વારા રેલવે યાત્રિકોની સીટ વધારશે. આ નવી ટેકનીક ઇકો -ફ્રેંડલી છે અને તેનાથી વાયુ પ્રદુષણ તેમજ ધ્વનિ પ્રદુષણ થશે નહીં. હાલ રાજધાની એક્સપ્રેસ ટ્રેનમાં HOG સિસ્ટમનો ઉપયોગ કરવામાં આવી રહ્યો છે.