ભારતમાં કોરોનાના કેસો 56 હજારનો આંકડો વટાવી ચૂક્યા છે, પરંતુ રાહતની વાત એ છે કે અહીં મૃત્યુઆંક બીજા ઘણા દેશોની સરખામણીએ ઓછો છે. કોરોનાથી પીડિત એવા દેશો પણ છે જ્યાં ભારત કરતા ઓછા કેસો છે, પરંતુ મૃત્યુની સંખ્યા ઘણી વધારે છે.
ભારતમાં કોરોનાના ફેલાવાને રોકવા માટે દેશમાં 40 દિવસ સુધી સંપૂર્ણ લોકડાઉન લાગુ કરવામાં આવ્યું હતું જેની અસર પણ હવે દેખાય છે. જો કે દેશમાં કોરોના કેસ વધી રહ્યા છે અને અત્યાર સુધી 56,342 કેસ નોંધાયા છે, જેમાં 1,886 લોકોનાં મોત નીપજ્યાં છે.
અહીં મોતનો આંકડો ઘણો વધારે છે
ભારત સિવાયના એવા દેશોની વાત કરવામાં આવે જ્યાં કોરોનાનો ચેપ ભારત કરતા ઓછો છે પરંતુ મૃત્યુઆંક વધારે છે, તો યુરોપિયન દેશ બેલ્જિયમમાં કોરોનાના 52,011 કેસ નોંધાયા છે, પરંતુ અહીં 8,521 લોકો મૃત્યુ પામ્યા છે.
જોન હોપકિન્સ યુનિવર્સિટીના એક અહેવાલ મુજબ, બેલ્જિયમની જેમ નેધરલેન્ડ પડોશી રાજ્યમાં પણ આવી જ સ્થિતિ છે. અહીં 42,292 કોરોના કેસ નોંધાયા છે, પરંતુ આ લોકોમાંથી 5,377 દર્દી મૃત્યુ પામ્યા છે.
મેક્સિકોમાં પણ સ્થિતિ ખરાબ છે
અમેરિકાના દેશ મેક્સિકોમાં મોતના ભયજનક આંકડા સામે આવે છે. મેક્સિકોમાં 29,616 કેસોમાં 2,961 લોકોનાં મોત થયાં છે. જો સંક્રમણ અને મૃત્યુના આંકડા વચ્ચેના તફાવત પર નજર કરીએ તો સ્વીડનમાં પરિસ્થિતિ નાજુક દેખાઈ રહી છે કારણ કે અહીં ચેપના વધુ કેસો નથી પરંતુ મૃત્યુઆંક ઝડપથી વધી રહ્યો છે. સ્વીડનમાં 25,265 કેસ નોંધાયા છે, જેમાં 3,175 લોકોએ જીવ ગુમાવ્યો છે.
પર્યટન માટે પ્રખ્યાત સ્વિટ્ઝર્લેન્ડ માં ભારત કરતાં કોરોનાથી ઓછા મૃત્યુ થયા છે પરંતુ આંકડા જોતા આ સ્થિતિમાં ભયજનક લાગે છે કેમ કે આ દેશમાં ચેપના કેસોની સંખ્યા 30,207 છે જ્યારે મૃત્યુઆંક 1,810 પર પહોંચી ગયો છે.