દહેગામમાં જય અંબે કોલ્ડ સ્ટોરેજમાં બ્લાસ્ટ થયો છે. એમોનિયમ ગેસની લાઇટ પાઇપ ફાટતા બ્લાસ્ટ થયો છે. બ્લાસ્ટમાં 4 લોકોનાં મોત થયાં છે. બેથી વધુ ઇજાગ્રસ્ત લોકોને સારવાર માટે ખસેડવામાં આવ્યા છે.
ઘણી વખત અહેવાલો મળ્યાં છે કે કોલ્ડ સ્ટોરેજમાં સેફ્ટી માટેના પૂરતા પગલાં લેવાતા નથી પરિણામે આવી હોનારત સર્જાય છે. ત્યારે મહત્વનું છે કે દહેગામ કોલ્ડ સ્ટોરેજનાં બ્લાસ્ટ મામલે તેનાં માલિક સામે પણ ફરીયાદ નોંધાઇ છે. જે સમયે સમારકામ થઇ રહ્યું હતું તેવાં સમયે આ ઘટના ઘટી હતી.
ઉલ્લેખનીય છે કે ડીસા અને દહેગામ બટાકાના કોલ્ડ સ્ટોરેજ માટે જાણીતાં છે. સૌથી વધુ ડીસા અને ત્યાર બાદ દહેગામમાં કોલ્ડ સ્ટોરેજ છે. બટાકાના સંગ્રહ માટેના કોલ્ડ સ્ટોરેજની સંખ્યા દિન-પ્રતિદિન વધતી જાય છે.
જો કે કોલ્ડ સ્ટોરેજની મશીનરીમાં વપરાતો એમોનિયમ ગેસ માનવ સ્વાસ્થ્ય માટે અત્યંત ઝેરી અને હાનિકારક હોવા છતાં ગેસ ગળતરની ઘટના વખતે તેને રોકવા કોઇ પણ પ્રકારનાં સેફટીનાં સાધનો પાલિકાના ફાયર વિભાગ કે વહીવટીતંત્રનાં ડિઝાસ્ટર મેનેજમેન્ટ પાસે નથી જેથી ભવિષ્યમાં પ્રકારની કોઇ ઘટના બને તો તે મોટી હોનારત સર્જે તેવી સ્થિતી છે.
અગાઉ ડીસાનાં ભીલડી ગામ પાસેના કોલ્ડ સ્ટોરેજમાં ગેસ લીકેજ થતાં નાસભાગ મચી ગઇ હતી. ગેસ લીકેજની અસર ગામલોકોને થતાં ગામ બહાર સ્થળાંતર કરવાની સુચના આપવામાં આવી હતી. જો કે જિલ્લાભરમાંથી આવી ગયેલી ફાયર બ્રિગેડની ટીમે જિલ્લા વહિવટીતંત્રની કવાયતથી મોડીરાત સુધીમાં ગેસ લિકેજ પર કાબુ મેળવાતા તંત્ર સહિત ગામલોકોએ રાહતનો શ્વાસ લીધો હતો. ભીલડીના ધનલક્ષ્મી કોલ્ડ સ્ટોરેજમાં આ ઘટના બની હતી.