રાજ્ય (Gujarat) માં છેલ્લા કેટલાંક દિવસથી વરસાદ બંધ થવાનું નામ નથી લઇ રહ્યો, ત્યારે હવામાન વિભાગે રાજ્યમાં હજુ 4 દિવસ વરસાદની આગાહી કરી છે.
આજથી ચાર દિવસ સુધી રાજ્ય (Gujarat) માં વરસાદની આગાહી
આજે સૌરાષ્ટ્ર, મધ્ય ગુજરાત, દ. ગુજરાતમાં વરસાદની શકયતા
રાજ્યમાં છેલ્લા 24 કલાકમાં 180 તાલુકામાં વરસાદ વરસ્યો
હવામાન વિભાગની આગાહી અનુસાર, આજથી ચાર દિવસ સુધી રાજ્યમાં વરસાદ પડી શકે છે. આજે સૌરાષ્ટ્ર, મધ્ય ગુજરાત, દક્ષિણ ગુજરાતમાં વરસાદની શકયતા છે, જ્યારે આગામી દિવસોમાં પણ દક્ષિણ ગુજરાત, મધ્ય ગુજરાત અને સૌરાષ્ટ્રમાં વરસાદ વરસી શકે છે.
રાજ્યમાં છેલ્લા 24 કલાકમાં 180 તાલુકામાં વરસાદ વરસ્યો
રાજ્યમાં છેલ્લા 24 કલાકમાં 180 તાલુકામાં વરસાદ થયો છે. જેમાં સૌથી વધુ વલસાડના કપરાડામાં 5.5 અને ઉમરપાડામાં 5 ઈંચ વરસાદ થયો છે. સાથે ધરમપુરમાં 4.5 ઈંચ, ડાંગમાં 4 ઈંચ, સંખેડામાં 4 ઈંચ, તિલકવાડામાં પોણા 4 ઈંચ અને વાંસદામાં પોણા 4 ઈંચ વરસાદ થયો છે. જ્યારે સુબિરમાં 3.5 ઈંચ, ગરુડેશ્વરમાં 3.5 ઈંચ, ઉચ્છલમાં સવા 3 ઈંચ, ખેરગામમાં સવા 3 ઈંચ અને સોજીત્રામાં 3 ઈંચ વરસાદ થયો છે. ઉપરાંત ચિખલી અને વઘઈમાં 3 ઈંચ, જ્યારે સિનોરમાં પોણા ત્રણ ઈંચ વરસાદ થયો છે.
આગામી 10થી 15 જુલાઈ સુધી સમગ્ર રાજ્યમાં અતિભારે વરસાદ વરસે તેવી સંભાવના
ઉલ્લેખનીય છે કે, હવામાન નિષ્ણાંત અંબાલાલ પટેલે પણ વરસાદને લઈને આગાહી કરી છે કે, આગામી 10 થી 15 જુલાઈ સુધી સમગ્ર રાજ્યમાં ભારેથી અતિભારે વરસાદ વરસે તેવી સંભાવના છે. છેલ્લા ત્રણ દિવસોથી સમગ્ર રાજ્યભરમાં મેઘરાજા મન મૂકીને વરસી રહ્યાં છે. જેને લઈને રાજ્યના 228 તાલુકાઓમાં મેઘમહેર થઈ છે. ત્યારે હવામાન નિષ્ણાંત અંબાલાલ પટેલ દ્વારા ચોમાસા અંગે વધુ એક મોટી આગાહી કરવામાં આવી છે. હવામાન નિષ્ણાંત અંબાલાલ પટેલે જણાવ્યું હતું કે, અરબ સાગર અને બંગાળની ખાડીમાં વરસાદી સિસ્ટમ સક્રિય થતાં સમગ્ર રાજ્યમાં વરસાદી માહોલ સતત છવાયેલો રહેશે.જેને લઈને સમગ્ર રાજ્યમાં આગામી 10 થી 15 જુલાઈ સુધી ભારે વરસાદની સંભાવના છે.
ભારે વરસાદની આગાહી વચ્ચે પોરબંદર જિલ્લામાં SDRFની ટીમો તૈનાત
મહત્વનું છે કે, રાજ્યમાં ભારે વરસાદની આગાહી વચ્ચે પોરબંદર જિલ્લામાં સતત વરસાદથી તંત્ર એલર્ટ કરવામાં આવ્યું છે. સંભવિત પૂરની સ્થિતિના કારણે 600 લોકોનું સ્થળાંતર કરવામાં આવ્યું છે. કુતિયાણાના ભાદરકાંઠા સહિતના વિસ્તારોમાંથી સ્થળાંતર કરવામાં આવ્યું છે. SDRFની ટીમો પણ રેસ્ક્યુની કામગીરી માટે ખડેપગે તૈનાત કરી દેવામાં આવી છે.