અમરેલી પંથકની ભાડ ગામની નદીમાં પુર આવ્યું, રસ્તા પર ફરી વળ્યાં પાણી
હવામાન વિભાગની આગાહી મુજબ આજે દિવસભર ગુજરાતના અનેક વિસ્તારોમાં વરસાદ પડ્યો હતો. આજે ભાવનગર, રાજકોટ, અમરેલી, નવસારી, જેતપુર અને દ્વારકા સહિતના વિસ્તારોમાં વરસાદ આવ્યો હતો. અમરેલી પંથકમાં ભારે વરસાદને કારણે ભાડ ગામની નદીમાં પુર આવ્યું છે. આ સાથે અનેક વિસ્તારોમાં રોડ ઉપર પાણી ફરી વળ્યા હતા. નોંધનિય છે કે, છેલ્લા 24 કલાકમાં 190 તાલુકામાં વરસાદ થયો હતો.
આજથી રાજ્યમાં ફરી વરસાદનું જોર વધવાની સંભાવના સાથે આજથી 4 દિવસ રાજ્યમાં વરસાદની આગાહી કરવામાં આવી છે. આજે રાજ્યના 3 જિલ્લાઓમાં ભારે વરસાદની આગાહી કરવામાં આવી છે, જ્યારે 7 અને 8 ઓગસ્ટે અતિભારે વરસાદની આગાહી કરવામાં આવી છે. 7 ઓગસ્ટે 5 જિલ્લામાં ભારે વરસાદની આગાહી કરવામાં આવી છે, જ્યારે 8 ઓગસ્ટે 9 જિલ્લામાં ભારે વરસાદની આગાહી કરવામાં આવી છે. હવામાન વિભાગની આગાહી અનુસાર, બનાસકાંઠા, પાટણ, મહેસાણા, ગાંધીનગર, ખેડા, પંચમહાલ, દાહોદ, છોટા ઉદેપુર અને નર્મદામાં ભારે વરસાદની આગાહી કરવામાં આવી છે.
ભાવનગર-રાજકોટમાં વરસાદ
ભાવનગરના મહુવા પંથકમાં ધોધમાર વરસાદ વરસ્યો છે. જેમાં બગદાણા, મોણપર, કોજળી, ખારી, ધરઇમાં વરસાદ વરસતા નીચાણવાળા વિસ્તારોમાં પાણી ભરાયા છે. આજે મહુવા પંથકમાં 3 ઇંચ જેટલો વરસાદ પાડ્યો છે. આ સાથે રાજકોટ શહરેમાં થોડા દિવસના વિરામ બાદ ફરીથી આજે મેધરાજા મહેરબાન થયા છે. શહેરમાં ધીમીધારે વરસાદની શરૂઆત થઇ છે. બપોર બાદ શહેરના કાલાવડ રોડ, યુનિવર્સિટી રોડ, યાજ્ઞિક રોડ, અમીન માર્ગ સહિતના વિસ્તારોમાં વરસાદનું આગમન થતાં લોકોએ બફારાથી રાહત મેળવી છે.
અમરેલીમાં ભારે વરસાદથી નદીમાં પૂર
અમરેલી જિલ્લામાં ફરી મેઘરાજાએ એન્ટ્રી કરી છે. અમરેલી જિલ્લાના સાવરકુંડલામાં અને ખાંભા ગીરના ગ્રામ્ય વિસ્તારમાં વરસાદી માહોલ છવાયો છે. ગીરના ગામડાઓમાં પણ મેઘો મંડાયો છે. ભાડ, વાંકિયા, ઇંગોરાળા સહિત ગામોમાં ધોધમાર વરસાદ વરસ્યો છે. જેને લઈ ભાડ ગામની સ્થાનિક નદીમાં પૂર આવ્યું છે. ધોધમાર વરસાદથી અનેક વિસ્તારોમાં રોડ રસ્તાઓ ઉપર પાણી ફરી વળ્યા છે. સારા વરસાદથી ઘરતી પુત્રોમાં ખુશીનો માહોલ છે.
નવસારી અને જેતપુરમાં પણ વરસાદનું આગમન
હવામાન વિભાગની આગાહીના પગલે નવસારીમાં વરસાદ પડ્યો છે. શહેરમાં વિઠ્ઠલ મંદિર, ભક્તિનગર વિસ્તાર અને શિવાજી ચોક સહિત સમગ્ર શહેરના અનેક વિસ્તારોમાં વરસાદ આવ્યો છે. આ સાથે જેતપુર શહેર અને ગ્રામ્યમાં ધોધમાર વરસાદનું આગમન થયું છે. અજે જેતપુર તાલુકામાં વહેલી સવારે દોઢ ઈંચ વરસાદ નોંધાયો છે. પેઢલા, સમઢિયાળા, રબારીકા, ગઢાળા, ખાખી જાળીયા, સેવંત્રા, મોજીરા અને નવાપરામાં વરસાદ નોંધાયો છે.
દ્વારકામાં વરસાદ આવતા ખેતરોમાં પાણી ભરાયા
હવામાન વિભાગની આગાહી મુજબ દ્વારકા પંથકમાં વરસાદ આવતા ખેતરોમાં પાણી ભરાયા છે. દ્વારકામાં વહેલી સવારથી ધીમીધારે વરસાદ થયો હતો. આ તરફ વરસાદ શરુ થતા દ્વારકાધીશના દર્શને આવેલ યાત્રિકોને હાલાકી પડી હતી. નોંધનિય છે કે, હવામાન વિભાગે રાજ્યમાં વરસાદને લઇ આગાહી કરી હતી. જેને લઈને છેલ્લા 24 કલાકમાં રાજ્યના 190 તાલુકામાં વરસાદ થયો છે.
છેલ્લા 24 કલાકમાં રાજ્યના 190 તાલુકામાં વરસાદ
જેમા સૌથી વધુ સુરેન્દ્રનગરના વઢવાણ તાલુકામાં 5 ઈંચ વરસાદ થયો છે, જ્યારે ધ્રાંગધ્રામાં સવા 4 ઈંચ અને બોટાદમાં પોણા 4 ઈંચ વરસાદ થયો છે. સાથે ઉના અને ગઢડામાં 3.5 ઈંચ વરસાદ તથા મહુધા, મહુવા અને સુરતમાં 3-3 ઈંચ વરસાદ થયો છે, ઉપરાંત લિંબડી, જોટાણા, વલ્લભીપુર, માતર અને માંડલમાં 2.5 ઈંચ વરસાદ થયો છે, જ્યારે અંજાર, ગીર ગઢડા, સુબિર અને બેચરાજીમાં સવા 2 ઈંચ વરસાદ થયો છે.