કરૂણ / સુરેન્દ્રનગરમાં 12 જ કલાકમાં ચાર અકસ્માત: અખિયાનાના પાટિયા પાસે ત્રણ લોકોના મૃત્યુ, ચોટીલા અને લીંબડીમાં પણ એક્સિડેન્ટ

• સુરેન્દ્રનગરમાં માર્ગ અકસ્માતની ઘટનાઓ વધી
• 12 કલાકમાં જુદા-જુદા 4 અકસ્માત 
• પાટડીમાં ટ્રેક્ટર પર આખેઆખી ચડી ગઇ ટ્રક 

સુરેન્દ્રનગર જિલ્લામાં માર્ગ અકસ્માતની ઘટનાઓ વધી છે. જિલ્લામાં છેલ્લા 12 કલાકમાં જુદા-જુદા 4 અકસ્માતના બનાવો બન્યા છે. આ દુર્ઘટનામાં ત્રણ લોકોના મૃત્યુ થયા છે. સુરેન્દ્રનગર જિલ્લાના પાટડીના અખિયાણા ગામ નજીક મજૂરો ભરીને ખેતરે જઇ રહેલા ટ્રેક્ટર અને ટ્રક વચ્ચે ગોઝારો અકસ્માત સર્જાતો હતો. આ ગમખ્વાર અકસ્માતમાં ટ્રેક્ટર ઉપર આખેઆખી ટ્રક ચડી જતાં 3 લોકોના કમકમાટીભર્યા મોત નિપજ્યાં હતા. જ્યારે ટ્રેક્ટરમાં સવાર 15 જેટલા મજૂરો ઇજાગ્રસ્ત થયા હતા. ટ્રક અને ટ્રેક્ટર વચ્ચેના અકસ્માતના પગલે ટ્રાફિક જામના દ્રશ્યો સર્જાયા હતા. 

લીંબડી નજીક કાર પલટી મારીજ જતા ત્રણને ઈજા
ચોટીલા હાઇવે પર બસ-આઇસર વચ્ચે અકસ્માત સર્જાયા હતો. જોકે, સદનસીબે આ અકસ્માતમાં કોઈ જાનહાની થઈ નહોતી. આ ઉપરાંત વધુ એક અકસ્માત લીંબડી નજીક સર્જાયો હતો. 
લીંબડીમાં કાર પલટી મારી જતાં ત્રણ વ્યક્તિ ઈજાગ્રસ્ત થયા હતા. જેથી તેઓને તાત્કાલિક સારવાર માટે લીંબડીની સરકારી હોસ્પિટલમાં ખસેડવામાં આવ્યા હતા. આ ઉપરાંત લીંબડી પાસે બાઈક-રિક્ષા વચ્ચે અકસ્માત સર્જાયો હતો. જેમાં 4 લોકો ઈજાગ્રસ્ત થયા હતા.