છેલ્લાં થોડાં વર્ષોથી થર્ટી ફર્સ્ટની ઉજવણી શહેરો અને યુવાનોમાં જાણે કે ફરજિયાત થઈ ગઈ છે. આ દિવસે ઉજવણીકારો શહેરોને બાનમાં લે છે. ઓફિશિયલી સાંજ પછી કેટલાક રસ્તા વાહનો માટે બંધ કરી દેવાય છે. સાંજ ઢળે એટલે ઉજવણી ઘેલાં અને મનોરંજન ભૂખ્યાં ટોળાં રસ્તા પર ઉતરી પડે છે. કાનના પડદા ઢીલા થઈ જાય એવું સંગીત ફૂટે છે. આંખો અંજાઈ જાય એવી આતશબાજી થાય છે. આનંદ મેળવવા ફાંફાં અને વલખાં મારતાં આ ટોળાંઓ ચિચિયારીઓ પાડે છે નાચે છે કૂદે છે બૂમાબૂમ કરે છે અહીંથી ત્યાં રખડે છે અંદરઅંદર ખખડે છે. હવે ઉજવણી પજવણી બની ગઈ છે. મારે આનંદ લેવો છે એટલે હું બીજા કોઈનો વિચાર નહીં કરૂ. આરોગ્યને અસર કરે તેવો ઘોંઘાટ કે પછી વૃદ્ધ કે બિમાર વ્યક્તિને તકલીફમાં મૂકે તેવું વાતાવરણ કેવી રીતે ઉજવણી બની શકે?
અમદાવાદના સી.જી. રોડ કે એસ.જી. રોડ કે બોડકદેવના કોઈ રોડ પર આવા હજારો લોકો ઉજવણી કરતા હોય છે એ જ વખતે એ રોડ પર રહેતી કોઈ વ્યક્તિને એટેક આવી જાય અને તેને ઈમરજન્સીમાં દવાખાને જવું હોય તો શું થાય? આપણે ત્યાં હેલિકોપ્ટર સર્વિસ તો છે નહીં. એ વાત જુદી છે કે ઉપરથી વૈકુંઠથી આવેલું વિમાન કે યમલોકથી પાડા પર આવેલા યમરાજ તેમને લઈ જાય.
આજના સુધરેલા કે આધુનિક કે પ્રગતિશીલ જણને આનંદ કોને કહેવાય એની કોઈ ગતાગમ નથી. આજનો યુવાન માને છે કે બસ હુ જે કરૂ એ મસ્ત છે અને એમાંજ આનંદ છે પરંતું સાચા આનંદની પ્રતીતિ આ ભાઈ કે બુનને કદી થઈ જ નથી. રંજન કે મનોરંજનના નામે તે હવાતિયાં મારે છે. કારણ કે તણાવે તેને તડપાવ્યો છે સ્પર્ધાએ તેને શેકી નાખ્યો છે દોડાદોડે તેને દબાવ્યો છે તેથી તે હવામાં બાચકાં ભરતો હોય તેમ મનોરંજન મેળવવા વલખાં મારે છે. આવું તો બીજું કોઈ પ્રાણી કરતું નથી.
દેખાદેખીએ દાડો દીધો છે. મુગ્ધ કિશોરો અને અપરિપક્વ યુવાનો એવું માને છે કે નશો કરીએ એટલે ઉજવણી થાય. ઘોંઘાટીયું સંગીત સાંભળીએ એટલે આપણને કંઈક મળે. ખોટો ખેલ છે આ બધો. વ્યર્થ છે આ બધું. વ્યય છે હજારો યુવાનોના લાખો કલાકોનો. અંદરની શાંતિ ખોવાઈ ગઈ છે એટલે આજનો માણસ બહાવરો થયો છે. અંદરની એકલતા અંદરનો ખાલીપો અંદરની શૂન્યતા વિકરાળ થઈ ગઈ છે. મનોરંજનના નામે અને બહાને આ ખાલીપો ભરવા માટે લોકો આ બધું કરે છે.
આજનો માણસ શાંતિથી ગભરાઈ ગયો છે. શાંતિની તેને સૌથી વધુ બીક લાગે છે. જો તમારા મન કે હૃદયમાં સાચી શાંતિ નથી તો તમને કોઈ દિવસ આનંદ મળે જ નહીં. મુરખનો સરદાર શાંતિ ખોઈ બેઠો છે અને કોઈપણ ભોગે મનમાં શાંતિ પ્રવેશ ના કરે તેની તે કાળજી રાખે છે. થર્ટી ફર્સ્ટની ઉજવણી આવી જ તેની કાળજીનો એક ભાગ છે. થર્ટી ફર્સ્ટની ઉજવણી માટે લોકો જે વલખાં મારી રહ્યા છે તે જોઈને મને લાગે છે કે જો મનોરંજન આટલું જલદ છે તો પ્રજાની પીડા કેટલી ગહન હશે. પીડા વધી રહી છે એટલે મનોરંજન જલદ ઉગ્ર અને છીછરૂં થઈ રહ્યું છે.
થર્ટી ફર્સ્ટની ઉજવણી દરેકની પીડાને ઓછી કરે તેવી શુભકામના.