'મનોરંજન મેળો'ના નામે ચાલતા જુગારધામ પર દરોડા 31 શકુની ઝડપાયા

રાજકોટ: જુગાર રમવાના શોખીનો કોઈ પણ જગ્યાએ જુગાર રમવા પહોંચી જતા હોય છે. ત્યારે આવા જુગારીઓને વિવિધ જુગાર રમાડતા શખ્સો દ્વારા વિવિધ સુવિધા પણ આપવામાં આવે છે.

ત્યારે રાજકોટના ધોરાજીમાં ખુલ્લા રોડ પર ચાલી રહેલા જુગારધામ પર સ્ટેટ વિજિલન્સની ટીમે દરોડા પાડીને જુગારધામ ઝડપી પાડ્યુ છે. આ સિવાય 31 જુગારીઓની અને કુલ રૂપિયા 1 લાખ 78 હજારની રોકડ રકમ પણ જપ્ત કરી છે. 

ઉલ્લેખનીય છે કે ધોરાજીના ઉપલેટા રોડ પર ખુલ્લામાં આ જુગારધામ ચાલતુ હતુ અને તેને મનોરંજન મેળો એવું નામ આપવામાં આવ્યું હતું. પહેલા બહારથી જોઈએ તો એવું લાગે કે મેળો છે. કમ્પાઉન્ડની અંદરની બાળકો માટે ચકરડી અને વિવિધ રમતોની રાઈડ પણ લગાવવામાં આવી છે. 

પરંતુ અંદર તંબુમાં વિવિધ રંગના ટેબલ પણ ગોઠવવામાં આવ્યા હતા. જેના પર જુગાર ધામ ચાલતુ હતું. અહીં લાલ પીળા અને લીલાનો જુગાર ચાલતો હતો. જેમાં લોકોને એકના ડબલ અને ત્રણ ગમા જીતવાની લાલચ આપવામાં આવી હતી. અહીં વિવિધ પ્રકારના જુગારનો સમાવેશ હતો. 

અહીં અંદર જુગાર રમવા માટે બારી પરથી ટોકન પણ લેવું ફરજિયાત રાખવામાં આવી હતી. આ જુગારીઓને જુસબ નામનો શખ્સ તમામ સુવિધા પૂરી પાડતો હતો. જેની પણ પોલીસે ધરપકડ કરી છે. પોલીસે આ મામલે કુલ 31 જુગારીઓની ધરપકડ અને રોકડ રકમ જપ્ત કરીને કાર્યવાહી હાથ ધરી છે.