PFRDA નો આ નિયમ 1 ઓક્ટોબરથી અમલમાં આવશે. આવી સ્થિતિમાં જો તમે ટેક્સપેયર હોવા છતાં અટલ પેન્શન યોજનાનો લાભ લેવા માંગો છો, તો તમારી પાસે માત્ર 8 દિવસ બાકી છે.
ફાઈનાન્શિયલ રૂલ્સમાં થશે ફેરફાર
30 સપ્ટેમ્બર પહેલા પતાવી લો આ કામ
નહીં તો બાદમાં થઈ શકે છે મુશ્કેલી
સપ્ટેમ્બર મહિનો પૂરો થવામાં હવે થોડા દિવસો બાકી છે. આવી સ્થિતિમાં આ મહિનાના અંત સુધીમાં કેટલાક નાણાકીય નિયમોમાં ફેરફાર થવા જઈ રહ્યા છે. જો તમે પણ ઈચ્છો છો કે તમને ભવિષ્યમાં કોઈ પણ પ્રકારની આર્થિક સમસ્યાનો સામનો ન કરવો પડે, તો તમારે 30 સપ્ટેમ્બર 2022 પહેલા આ નાણાકીય કામો જરૂર પુરા કરી લેવા જોઈએ.
આ કામ બને તેટલા જલ્દી કરી લો પુરા
આ મહત્વપૂર્ણ કાર્યોમાં ડીમેટ ખાતા માટે ટૂ-ફેક્ટર ઓથેન્ટિકેશન ઈનેબલ કરવું, ક્રેડિટ અને ડેબિટ કાર્ડ ટોકનાઇઝેશન, અટલ પેન્શન યોજના માટે નોંધણી વગેરેનો સમાવેશ થાય છે. જો તમે હજી સુધી આ કામો પુરા નથી કર્યા તો તેને શક્ય તેટલી વહેલી તકે પૂર્ણ કરો.
ડીમેટ ખાતાધારકો રાખો આ ધ્યાન
નવા નિયમો અનુસાર ડીમેટ ખાતાધારકો પાસે તેમના ખાતાનું ટૂ-ફેક્ટર ઓથેન્ટિકેશન ઈનેબલ કરવા માટે 30 સપ્ટેમ્બર 2022 ની સમયમર્યાદા છે. આમ ન કરવા પર 1લી ઑક્ટોબર 2022 થી તમારા ટ્રેડિંગ એકાઉન્ટમાં લૉગિન નહીં કરી શકાય. હવે ડીમેટ યુઝર્સે તેમના એકાઉન્ટમાં લોગીન કરવા માટે બાયોમેટ્રિક ઓથેન્ટિકેશન કરવું પડશે. આ ઉપરાંત તમારે ફક્ત તમારો પાસવર્ડ અથવા પિન એન્ટર કરીને જ એકાઉન્ટમાં લોગિન કરવું પડશે.
અટલ પેન્શન યોજનાના નિયમમાં ફેરફાર
1 ઓક્ટોબરથી અટલ પેન્શન યોજનાના નિયમોમાં પણ ફેરફાર થવા જઈ રહ્યો છે. પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA)એ નિર્ણય લીધો છે કે હવે ટેક્સપેયર્સ આ પેન્શન યોજનામાં જોડાઈ શકશે નહીં.
પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA)નો આ નિયમ 1 ઓક્ટોબરથી અમલમાં આવશે. એવામાં જો તમે કરદાતા હોવા છતાં અટલ પેન્શન યોજનાનો લાભ લેવા માંગો છો, તો તમારી પાસે માત્ર 8 દિવસ બાકી છે. તમે આ સ્કીમ માટે શક્ય તેટલી વહેલી તકે કોઈપણ બેંક અથવા પોસ્ટ ઓફિસની મુલાકાત લઈને અરજી કરી શકો છો.
કાર્ડ દ્વારા પેમેન્ટ બનશે વધુ સુરક્ષિત
જો તમે ક્રેડિટ અને ડેબિટ કાર્ડનો ઉપયોગ કરો છો તો જાણી લો કે હવે કાર્ડ દ્વારા પેમેન્ટ કરવું વધુ સુરક્ષિત બનશે. રિઝર્વ બેંક ઓફ ઈન્ડિયા 1 ઓક્ટોબરથી કાર્ડ ટોકનાઈઝેશનનો નિયમ લાગુ કરવા જઈ રહી છે. હવે તમારે કાર્ડ દ્વારા પેમેન્ટ કરવા માટે વેપારીની વેબસાઇટ પર કાર્ડ નંબર, CVV નંબરને બદલે ટોકન દાખલ કરવું પડશે.
તમારે એકવાર ટોકન ક્રિએટ કરવું પડશે અને આગળના કોઈપણ ટ્રાન્ઝેક્શન માટે તમારે ટોકન નંબર દાખલ કરીને પેમેન્ટ કરવું પડશે. આવી સ્થિતિમાં કાર્ડ ટોકનાઇઝેશનના કામને શક્ય તેટલી વહેલી તકે પુરૂ કરો.