દેશમાં ફરી એકવાર કોરોનાના કેસ ઝડપથી વધી રહ્યા છે. છેલ્લા 24 કલાકમાં કોરોનાના 3,303 નવા કેસ નોંધાયા છે અને પોઝિટીવીટી રેટમાં પણ વધારો થયો છે.
દેશમાં ફરી વધ્યા કોરોનાનાં કેસ
પોઝિટીવીટી રેટ પણ વધ્યો
છેલ્લા 24 કલાકમાં 3000થી વધારે નવા કેસ
દેશમાં ફરી એકવાર કોરોનાના કેસ ઝડપથી વધી રહ્યા છે. દરરોજ આંકડામાં વધારો થઈ રહ્યો છે, જે લોકોની ચિંતામાં વધારો કરી રહ્યો છે. છેલ્લા 24 કલાકમાં કોરોનાના 3,303 નવા કેસ નોંધાયા છે, જે પછી એક્ટિવ કેસની સંખ્યા વધીને 16 હજાર 980 થઈ ગઈ છે.
પોઝિટીવીટી રેટ પણ વધ્યો
દૈનિક પોઝિટીવીટી રેટ પણ વધીને (0.66%) થયો છે. રિપોર્ટ અનુસાર છેલ્લા 24 કલાકમાં 2563 નવા દર્દીઓ સાજા પણ થયા છે.
જો કુલ આંકડાઓ પર નજર કરીએ તો, કોરોનાથી સંક્રમિત લોકોની સંખ્યા વધીને 4 કરોડ 25 લાખ 28 હજાર 126 થઈ ગઈ છે. આ સિવાય મહામારીના કારણે 5 લાખ 23 હજાર 693 લોકોના મોત થયા છે. સરકારી આંકડા મુજબ છેલ્લા 24 કલાકમાં કોરોનાને કારણે 39 લોકોએ જીવ ગુમાવ્યા છે.
દિલ્હીમાં ઝડપથી કેસ વધી રહ્યા છે
રાજધાની દિલ્હીમાં કોરોના વાયરસનો કહેર વધી રહ્યો છે. કોવિડના નવા કેસોની સંખ્યા દરરોજ વધી રહી છે, છેલ્લા 24 કલાકમાં બુધવારે કોવિડના 1,367 નવા કેસ નોંધાયા છે. હાલમાં દિલ્હીમાં કોવિડના એક્ટિવ પેશન્ટ્સની સંખ્યા 4800ને વટાવી ગઈ છે. અગાઉ 6 ફેબ્રુઆરીએ દિલ્હીમાં 1,410 નવા કેસ નોંધાયા હતા. દિલ્હીમાં સતત છઠ્ઠા દિવસે કોવિડના 1,000 થી વધુ કેસ નોંધાયા છે.
દેશમાં અત્યાર સુધી કોરોના ટેસ્ટ
છેલ્લા 24 કલાકમાં કુલ 4,97,669 કોવિડ-19 ટેસ્ટ કરવામાં આવ્યા છે. ભારતે અત્યાર સુધીમાં 83.64 કરોડ (83,64,71,748) ટેસ્ટ કર્યા છે. દેશમાં વિકલી પોઝિટીવીટી રેટ હાલમાં 0.61% છે અને દૈનિક પોઝિટીવીટી રેટ પણ 0.66% હોવાના અહેવાલ છે.
દેશમાં રસીકરણના આંકડા
28 એપ્રિલ, સવારે 7 વાગ્યા સુધીમાં ભારતમાં COVID-19 રસીકરણ 188.40 કરોડ (1,88,40,75,453) ને વટાવી ગયું છે. 12-14 વર્ષની વય જૂથ માટે કોવિડ-19 રસીકરણ 16 માર્ચ, 2022 ના રોજ શરૂ કરવામાં આવ્યું હતું. અત્યાર સુધીમાં, 2.78 કરોડ (2,78,64,432) થી વધુ કિશોરોને COVID-19 રસીનો પ્રથમ ડોઝ આપવામાં આવ્યો છે. તેવી જ રીતે, 18-59 વર્ષની વય જૂથ માટે COVID-19 પ્રિકોશન ડોઝ પણ 10 એપ્રિલ, 2022 થી શરૂ થયો.