અમદાવાદમાં સવા મહિનાના બાળકનું 48 કલાકમાં ત્રણ વાર હૃદય બંધ થયું હતું અને 6 વાર હૃદય પર કરંટ આપ્યા બાદ આજે તે હસતુંરમતું થયું છે.
સવા મહિનાના બાળકને હાર્ટબીટ 300
બાળક કોમામાં સરી પડ્યું હતું
48 કલાકમાં ત્રણવાર હૃદય બંધ થયું
જે જિંદગી લખાવીને જ આવ્યું છે. તે મોતને પણ મહાત આપીને જીવે છે. આવી જ એક ઘટના અમદાવાદમાં સામે આવી છે. જેમાં એક સવા મહિનાના બાળકનું 48 કલાકમાં ત્રણવાર હૃદય બંધ થયું અને 6 વાર હૃદય પર કરંટ આપ્યા બાદ આજે તે હસતુંરમતું થયું છે. પરંતુ આવું શક્ય કેવી રીતે બન્યું. આ કોઈ ચમત્કાર છે કે, સાયન્સની કમાલ આવો જાણીએ આ રિપોર્ટમાં.
બાળકનું હૃદય ત્રણ-ત્રણ વાર બંધ થઈ ગયું હતું
કહે છે કે જિંદગી હોય તો ગમે તેવી બીમારીને પણ મહાત આપી માણસ બેઠો થઈ જાય છે. ડોક્ટરને લોકો ભગવાનનું રૂપ માને છે અને જ્યારે દર્દીનો જીવ બચે છે ત્યારે પરિવારજનો ડોક્ટરને ક્યારેય ભૂલતા નથી. અમદાવાદમાં પણ આવો જ કાંઈક ચમત્કાર થયો છે. કારણ કે, માત્ર સવા મહિનાના હિયાન શાહ નામના બાળકનું હૃદય ત્રણ-ત્રણ વાર બંધ થઈ ગયું હતું. હૃદયના ધબકારા 100ને બદલે 300થી વધુ હતા. ખેંચ, શ્વાસ લેવામાં તકલીફ જેવી સમસ્યાઓ સાથે બાળક કોમામાં સરી પડ્યું હતું. જે બાદ તેને અમદાવાદની ડિવાઇન ચાઈલ્ડ હોસ્પિટલમાં સારવાર માટે ખસેડવામાં આવ્યો હતો. જ્યાં ડો. હાર્દિક પટેલ અને તેમની ટીમે બાળકને તાત્કાલિક વેન્ટિલેટર પર રાખી સારવાર ચાલુ કરી હતી. સવા મહિનાના બાળકને છ-છ વખત હૃદય પર કરંટ આપીને ધબકારા નિયમિત કરવામાં આવ્યા હતા. 18 દિવસની સારવાર બાદ બાળકને હસતારમતા ઘરે મોકલવામાં આવ્યું હતું.
બાળકનો ડોક્ટરોએ બચાવી લીધો જીવ
બાળકના માતા-પિતાના જણાવ્યા પ્રમાણે, તેમનો પુત્ર જ્યારે સવા મહિનાનો હતો ત્યારે એક રાત્રે અચાનક દૂધ પીવામાં તકલીફ પડવા લાગી, વધારે રડવા લાગ્યો, શ્વાસ લેવામાં ઘણી તકલીફ પડવા લાગી, ભાન ગુમાવવા લાગ્યો અને છેવટે કોમામાં સરી પડ્યો. આવી અતિગંભીર પરિસ્થિતિમાં અમે અમારા પુત્રને હોસ્પિટલ ખસેડ્યો જ્યાં ડિવાઇન હોસ્પિટલના ડોક્ટરોની ટીમ દ્વારા પુત્રને તરત જ વેન્ટિલેટર સપોર્ટ પૂરો પાડવામાં આવ્યો હતો. હૃદયનું પમ્પિંગ મજબૂત કરવા માટે 4 અલગ અલગ પ્રકારનાં ઇન્જેક્શન સતત ચાલુ કરવામાં આવ્યાં હતાં. બાળકને આવતી ખેંચો બંધ કરવા 3 અલગ અલગ પ્રકારની દવાઓ ચાલુ કરવામાં આવી અને તેનાં લિવર અને કિડની જેવાં મહત્ત્વનાં અંગોને સપોર્ટ કરવા માટેની દવાઓ પણ ચાલુ કરવામાં આવી હતી. આમ તેમના પુત્રનો ડોક્ટરોએ જીવ બચાવી લીધો.
મહત્વનું છે કે, સવા મહિનાનું તે બાળક આજે એક વર્ષનું થઈ ગયું છે. અને 1 વર્ષ સુધી ડોક્ટરો દ્વારા તેની નિયમિતપણે તપાસ કરવામાં આવી. જે બાદ હવે તમામ પ્રકારની દવાઓ બંધ કરી દેવામાં આવી છે. અને હાલ આ બાળક હસતુંરમતું થયું છે. બાળકને મળેલા આ જીવનદાનને સાયન્સનો ચમત્કાર કહો કે, કુદરતનો પરંતુ આજે હિયાન એકદમ સ્વસ્થ જિંદગી જીવી રહ્યો છે.