ગુરૂગ્રામ: હરિયાણાના ગુરૂગ્રામમાં અસામાજિક તત્વોનો આતંક સામે આવ્યો છે. ગુરૂગ્રામના ભૂપસિંહનગર વિસ્તારમાં એક નજીવી બાબતને લઈને વિવાદ થતા 30થી 35 શખ્સો હાથમાં લાકડીઓ અને તલવાર લઈને એક પરિવાર પર તૂટી પડ્યા. આ તમામ શખ્સોનો લાકડીઓ અને તલવારથી હુમલાનો વીડિયો પણ સોશિયલ મીડિયામાં ખૂબ વાયરલ થયો છે.
ઘટનાની વિગત એવી છે કે, એક પરિવારના કેટલાક બાળકો પોતાના ઘરની બહાર ક્રિકેટ રમી રહ્યા હતા. જે વાત આ શખ્સોને ગમ્યુ નહીં અને પરિવાર સાથે પહેલા બોલાચાલી કરી.
બાદમાં ઉશ્કેરાયેલા આ તમામ શખ્સો લાકડીઓ અને તલવાર લઈને પરિવારના ઘરમાં ઘૂસી આવ્યા અને બાળકો, મહિલાઓ, વૃદ્ધોને પણ બેરહેમીપૂર્વક માર માર્યો. પરિવારના બાળકો અને મહિલાઓ તથા વૃદ્ધો લોકો બૂમો પાડતા રહ્યા પણ કોઈ મદદે આવ્યું નહીં. તો પોલીસે પણ પીડિત પરિવારની ફરિયાદ બાદ ગુનો નોંધીને વધુ તપાસ હાથ ધરી છે.