દુનિયાભરમાં કોરોના મહામારીનો કેર સતત વધી રહ્યો છે. આમાં પણ અમેરિકા હાલ દુનિયામાં કોરોના વાઈરસનુ કેન્દ્ર બની ગયું છે. અહીં મહામારી સતત ભયાનક સ્વરૂપ ધારણ કરી રહી છે.
એક જ દિવસમાં અમેરિકામાં 22104 નવા પોઝિટિવ કેસ
આખી દુનિયાના લગભગ એક તૃતીયાંશ કોરોના દર્દીઓ એકલા અમેરિકામાં જ
ન્યૂયોર્કમાં જ 30281 લોકો કોરોનાના કારણે માર્યા ગયા
ન્યૂયોર્ક, ન્યૂજર્સી, કેલિફોર્નિયા, ફ્લોરિડામાં કોરોનાના સૌથી વધુ કેસ
ગઈકાલે ગુરુવારે એક જ દિવસમાં અમેરિકામાં 22104 નવા પોઝિટિવ કેસ નોંધાયા છે, અને ૧,૦૩૧ કોરોના પીડિતોનાં મોત થયાં છે. સૌથી ચોંકાવનારી વાત એ છે કે, આખી દુનિયાના લગભગ એક તૃતીયાંશ કોરોના દર્દીઓ એકલા અમેરિકામાં જ છે. અહીં કુલ ૧૯.૨૪ લાખથી વધુ કોરોનાગ્રસ્ત લોકો છે. ન્યૂયોર્ક, ન્યૂજર્સી, કેલિફોર્નિયા, ફ્લોરિડામાં કોરોનાના સૌથી વધુ કેસ જોવા મળી રહ્યાં છે.
ન્યૂયોર્કમાં કોરોનાએ કાળો કેર વર્તાવ્યો
વર્લ્ડોમીટર અનુસાર, અમેરિકામાં કોરોના વાઈરસના દર્દીઓની સંખ્યા આજે સવાર સુધીમાં વધીને ૧૯,૨૪,૦૫૧ થઈ ગઈ છે. બીજી તરફ, કુલ ૧,૧૦,૧૭૩ લોકોનાં મોત થઇ ચૂક્યાં છે. કુલ છ ટકા કોરોના સંક્રમિત લોકોનાં મોત થઇ ચૂક્યાં છે, જ્યારે ૩૩ ટકા લોકો આ મહામારીથી સાજા પણ થઇ ચૂક્યા છે. અમેરિકાના ન્યૂયોર્ક શહેરમાં સૌથી વધુ ૩,૮૩,૮૯૯ કેસ સામે આવ્યા છે. માત્ર ન્યૂયોર્કમાં જ 30281 લોકો કોરોનાના કારણે માર્યા ગયા છે. ત્યારબાદ ન્યૂજર્સીમાં ૧,૬૪,૫૧૯ કોરોના દર્દીઓમાંથી ૧૨,૦૦૬ લોકોનાં મોત થયાં છે. આ ઉપરાંત મેસેચ્યૂએટ્સ, ઇલિનોયસ પણ કોરોનાથી સૌથી વધુ પ્રભાવિત થયા છે.
દુનિયામાં 67 લાખ કેસઃ અમેરિકા કરતાં બ્રાઝિલમાં કેસ વધી રહ્યા છે
દુનિયાના ૨૧૩ દેશમાં ફેલાયેલા કોરોનાના છેલ્લા ૨૪ કલાકમાં ૧.૨૯ લાખથી વધુ નવા કેસો નોંધાયા છે અને મૃતકોની સંખ્યામાં ૫,૪૯૯ લોકોનો વધારો થયો છે.
વર્લ્ડોમીટર અનુસાર, દુનિયાભરમાં અત્યાર સુધીમાં લગભગ ૬૬.૯૨ લાખ લોકો કોરોનાથી સંક્રમિત થઇ ચૂક્યા છે. આમાંથી ૩.૯૨ લાખ લોકોનાં મોત થઇ ચૂક્યાં છે. ચોંકાવનારી વાત એ છે કે, હવે રોજ બ્રાઝિલમાં અમેરિકાથી વધુ નવા કેસ અને મોત નોંધાઇ રહ્યાં છે. છેલ્લા ૨૪ કલાકમાં બ્રાઝિલમાં ૩૧,૮૯૦ નવા કેસ અને ૧,૪૯૨ મોત થયાંં છે, જ્યારે અમેરિકામાં છેલ્લા ૨૪ કલાકમાં ૨૨,૧૦૪ નવા કેસ નોંધાયા છે અને ૧,૦૩૧ લોકોનાં મોત થયાં છે.