ચેકડેમમાં ન્હાવા ગયેલી ત્રણેય યુવતીનું ડૂબી જતા મૃત્યુ
શાપર વેરાવળ નજીક કાગશીયાળી ગામની દૂર્ઘટના
રાજકોટ જિલ્લાના શાપર વેરાવળના કાંગશીયાળી ગામે ચેકડેમમાં ન્હાવા પડેલા 5 લોકો પૈકી 3 યુવતીના મોત થતા શોકમય વાતાવરણ ફેલાયું હતું. ઘટનાની જાણ થતા સ્થાનિક પોલીસ અને ફાયરબ્રિગેડ પણ ઘટનાસ્થળે પહોંચ્યું હતું. ચેક ડેમમાં એકસાથે 5 લોકો પડ્યા હતા. જેમાંથી ત્રણ યુવતીઓએ જીવ ગુમાવ્યો છે. દેવીપૂજક પરિવારની કોમલ દેવીપૂજક, જેની ઉંમર માત્ર 18 વર્ષ હતી. તો 24 વર્ષની સોનલ અને 35 વર્ષના મિઢુરબેનનું પણ મોત નિપજ્યું છે. આ ચેકડેમ ઢોલરા-કાંગશીયાલી નજીક આવેલો છે.
જો કે, ત્રણેય યુવતીઓ કેવી રીતે અચાનક ડૂબી ગઈ તેને લઈ ચર્ચા હતી. જો કે, ફાયર વિભાગે અન્ય બે મહિલાઓને સલામત રીતે બહાર કાઢી હતી. ત્રણેય યુવતીઓના મોતની જાણ તેમના પરિવારને કરાઈ હતી. ત્રણેયના પરિવારમાં એકાએક માતમનું વાતાવરણ છવાયું છે.
રાજકોટના એક હોટલમાં પણ બાળકનું ડૂબવાથી થયું મોત
રાજકોટમાં વિઠલાણી પરિવારમાં એકના એક દિકરાના મોતથી શોકનું વાતાવરણ છવાયું છે. 13 વર્ષના દિકરાનું સ્વિમિંગ પુલમાં ડૂબી જવાથી મોત થયું છે. રાજકોટ જિલ્લાના કાલાવડ રોડ પર એક જાણીતું ક્લબ છે. એમેરાલ્ડ નામના ક્લબના સ્વિમિંગ પુલમાં એર ટ્યુબના આધારે ન્હાવા માટે 13 વર્ષનો દિકરો ગયો હતો. જેનું નામ મૌર્ય હતું. મૌર્ય સાથે આવી દુર્ઘટના સર્જાશે તેવું કલ્પનામાં પણ કોઈએ વિચાર્યું હશે નહીં. આનંદ માણવા માટે ઊંડા સ્વિમિંગ પુલમાં એર ટ્યુબના આધારે મૌર્ય સ્વિમિંગ કરી રહ્યો હતો. જો કે, પરિવાર પણ સ્વિમિંગ પુલમાં પડ્યો હતો. પરંતુ અચાનક શું થયું કે, ટ્યુબના આધારે સ્વિમિંગ કરતો મૌર્ય પાણીમાં ગરકાવ થઈ ગયો હતો. પરિવારના સદસ્યને જાણ થતા તુરંત તેને હોસ્પિટલ ખસેડાયો હતો.
વિઠલાણી પરિવારના એકને એક ચિરાગ 13 વર્ષના મૌર્યને લઈ તેમના પિતા નિકેશભાઈ રાજકોટ હોસ્પિટલ પહોંચ્યા હતા. પરંતુ સમય વિતિ ગયો હતો. હાજર તબીબો દ્વારા તેમને મૃત જાહેર કરાયો હતો. આંનદનો અનુભવ થોડીક ક્ષણમાં શોકમાં બદલાઈ ગયો છે. પરિવારનો એકને એક લાડકો દુનિયા છોડીને જતો રહ્યો છે. આમ તો પરિવાર માટે હજુ પણ વાત ગળે ઉતરે તેવી નથી. અને તેમની માતા ક્યારેય પણ આ વાત ગળે ઉતારી પણ શકશે નહીં. કે તેમનો લાડકવાયો દિકરો આ દુનિયામાં નથી.