ગુજરાતમાં વધતી જતી ટ્રાફિક સમસ્યા માથાનો દુખાવો બની છે. તો બીજી તરફ અકસ્માતના બનાવો પણ વધી રહ્યા છે. ક્યારેક ઓવરસ્પીડના ચક્કરમાં તો ક્યારેય રોન્ગ સાઇડને કારણે અકસ્માતો બનતા હોય છે ત્યારે પંચમહાલના હાલોલમાં ટોલનાકા નજીક ગમખ્વાર અકસ્માત સર્જાયો.
પાવાગઢ દર્શને જતા 3 વિદ્યાર્થીઓનો અકસ્માત
હાલોલ ટોલનાકા નજીક ટેન્કર પાછળ બાઇક ઘુસી જતા 3 વિદ્યાર્થીઓના મોત નીપજ્યા છે. મળતી માહિતી મુજબ આ ત્રણેય વિદ્યાર્થીઓ પાવાગઢ દર્શન કરવા જઇ રહ્યા હતા તે સમયે જ આ ઘટના બની. ઘટનાને પગલે રોડ પર ટ્રાફિક જામના દ્રશ્યો સર્જાયા હતા. પોલીસ પણ ઘટના સ્થળે આવી પહોંચી હતી. હાલમાં ત્રણેયના મૃતદેહને હાલોલની સરકારી હોસ્પિટલમાં પીએમ માટે લઇ જવાયા. ઘટનાને પગલે પરિવારમાં ભારે દુઃખની લાગણી જોવા મળી રહી છે. સમગ્ર ઘટનાને લઇને પોલીસે પણ વધુ કામગીરી હાથ ધરી છે.
વડોદરામાં અભ્યાસ કરતા હતા ત્રણેય વિદ્યાર્થીઓ
ઘટનાની વિગતે વાત કરીએ તો વડોદરાથી 5 મિત્રો બાઇક પર પાવાગઢના દર્શને નીકળ્યા હતા. તે સમયે અકસ્માત સર્જાતા 3 વિદ્યાર્થીઓના મોત નીપજ્યા. મૃતક યુવકોમાં એક દેવાગઢ બારિયા, એક લુણાવાડા અને એક દાહોદના ગરબાડાનો રહેવાસી હતો. એક વિદ્યાર્થી રોનક પરમાર વડોદરામાં માતા પિતા સાથે ભાડાના મકાનમાં રહેતો હતો.જ્યારે અન્ય બે યુવકો હોસ્ટેલમાં રહીને અભ્યાસ કરતા હતા. ઘટનાની જાણ થતા મૃતકોના પરિવારજનો હોસ્પિટલ દોડી આવ્યા હતા. જુવાનજોધ દિકરાના મોત થતા પરિવાર હૈયાફાટ રૂદન કરતા માહોલ ગમગીન બન્યો હતો. વિરેન્દ્ર ગોહિલ અને રોનક પરમાર વડોદરાની સિગ્મા કોલેજમાં અભ્યાસ કરતા હતા, જ્યારે જયેન્દ્ર પટેલ વડોદરાની સુમનદીપ કોલેજમાં અભ્યાસ કરતો હતો. 5 જુલાઇએ બે ટ્રક વચ્ચે અકસ્માત
પાલનપુર-અમદાવાદ હાઈવે ઉપર બે ટ્રક વચ્ચે ગંભીર અકસ્માત સર્જાયો હતો. જેમાં ટ્રકમાં સવાર 3 લોકોના મોત નિપજ્યાં હતા. ટ્રક રાજસ્થાનથી પશુઓને લઈને અમદાવાદ તરફ આવી રહી હતી. જો કે, આ ઘટના ઘટતાની સાથે આસપાસના સ્થાનિક લોકો ઘટનાસ્થળે એકત્ર થઇ ગયા હતાં. પોલીસનો કાફલો પણ ઘટનાની જાણ થતા તુરંત ઘટનાસ્થળે હાજર થઇ ગયો હતો. પાલનપુર તાલુકા પોલીસે આ સમગ્ર મામલે વધુ તપાસ હાથ ધરી હતી.
દાહોદમાં એસ.ટીબસ-ટ્રક વચ્ચે અકસ્માત
દાહોદ જિલ્લામાં લીમખેડાના જુનાવડીયા ગામે એસ.ટી.બસ અને ટ્રક વચ્ચે અકસ્માત થયો હતો. મળતી માહિતી મુજબ આ એસ.ટી.બસ ઝાલોદ થી સુરત જતી હતી.અકસ્માતમાં બસના ડ્રાઈવર સહિત 15 મુસાફરોને સામન્ય ઈજા પહોચી હતી. ઈજાગ્રસ્ત મુસાફરોને લીમખેડા સીવીલ હોસ્પિટલમાં ખસેડવામાં આવ્યા હતા. ઘટનાની જાણ લીમખેડા પોલીસને થતા પોલીસ ઘટના સ્થળ પર પહોચી વધુ તપાસ હાથ ધરી હતી.