રાજસ્થાનના જયપુરમાં એક જ ઘરમાં પરિણીત 3 બહેનોએ એક સાથે ટૂંકાવ્યુ જીવન, સાસરિયાના ત્રાસથી મોતને વ્હાલુ કર્યુ હોવાનો આરોપ
એક જ પરિવારની ત્રણ બહેનોએ કરી આત્મહત્યા
સાસરિયાઓના ત્રાસથી મોતને કર્યુ વ્હાલુ
ત્રણેય બહેનો ભણવામાં હતી હોંશિયાર
રાજસ્થાનમાંથી એક ચકચારી ઘટના સામે આવી છે. એક જ પરિવારની 3 બહેનોએ તેમના 2 બાળકો સાથે આત્મહત્યા કરી છે. વળી ચોંકાવનારી વાત તો એ છે કે બે બહેનો તો ગર્ભવતી હતી. ત્રણેયની ઉંમર 25, 23 અને 20 વર્ષની જ્યારે એક બાળક 4 વર્ષનો હતો અને બીજો માત્ર 27 દિવસનો હતો.
શું બની હતી ઘટના ?
રાજસ્થાનાન જયપુરની આ ઘટના છે. ડુડુના મીના મહોલ્લામાંથી 27 વર્ષની કાલુ દેવી, 23 વર્ષની મમતા મીના અને 20 વર્ષની કમલેશ મીના ગુમ થઈ ગઈ હતી. આ પછી જ્યારે પોલીસે આ મામલાની તપાસ કરી તો શનિવારે સવારે ત્રણેય બહેનો અને તેમના બાળકોના મૃતદેહ દૂર નરૈના રોડ પર એક ખેતરમાં બનેલા કૂવામાંથી મળી આવ્યા હતા. ઘટનાની જાણ થતાં જ સમગ્ર વિસ્તારમાં ચકચાર મચી ગઈ હતી. ત્રણેય મહિલાઓના પરિવારજનોને આ બાબતની જાણ થઈ તો પિયર પક્ષે આ બાબતે સાસરિયાઓ પર આરોપ લગાવ્યો.સાસરિયાઓએ જણાવ્યું કે તેમની ત્રણેય દીકરીઓના લગ્ન એક જ પરિવારમાં થયા છે. આ પરિવાર તેને માર મારતો અને હેરાન કરતો હતો.
વોટ્સએપ ચેટમાં સામે આવ્યુ આત્મહત્યાનું કારણ
પરિવારના સભ્યોએ સૌથી નાની બહેન કમલેશનું વોટ્સએપ સ્ટેટસ જોયુ તો તેમાંથી મોતનું કારણ જાણવા મળ્યું. તેમાં લખ્યું હતું કે "અમે હવે જઈ રહ્યા છીએ, ખુશ રહો, અમારા મૃત્યુનું કારણ અમારા સાસરિયાં છે, રોજ રોજ મરવા કરતા એકવાર મરી જવુ સારું. તેથી અમે સાથે મરવાનું નક્કી કર્યું છે, અમારા આગામી જીવનમાં અમે સાથે જન્મ લઈશું."
ત્રણેય બહેનો ભણવામાં હતી હોંશિયાર
મળતી માહિતી મુજબ ત્રણેય બહેનો અભ્યાસમાં ખૂબ જ સારી હતી. તે પણ જીવનમાં આગળ વધવા માટે સખત મહેનત કરતી હતી, પરંતુ તેણે પતિ અને સાસરિયાઓના જુલમ સામે હાર માની લીધી હતી. મીડિયા રિપોર્ટ્સ અનુસાર, કમલેશે જયપુરની મહારાણી કોલેજમાં અભ્યાસ કર્યા બાદ સેન્ટ્રલ યુનિવર્સિટીમાં પ્રવેશ મેળવ્યો હતો. જ્યારે મમતા પોલીસ કોન્સ્ટેબલની પરીક્ષામાં પસંદગી પામી હતી. મોટી બહેન કાલુ બી.એ.ના અંતિમ વર્ષમાં અભ્યાસ કરતી હતી, જ્યારે આ ત્રણેય બહેનોનો આરોપી પતિ માત્ર પાંચમા-છઠ્ઠા ધોરણ સુધી જ ભણતો હતો. પૈતૃક જમીન વેચીને તે પોતાનું જીવન ગુજારતો હતો અને કોઈ કામ કરતો ન હતો.