સચિન GIDC વિસ્તારમાં ATM મશીનમાં રૂપિયા ભરતી વખતે એક યુવક સાથે લાખો રૂપિયાની રોકડ રકમ લૂંટી ત્રણ શખ્સો ફરાર થઇ ગયા.
સચિન GIDC વિસ્તારમાં લૂંટનો બનાવ
ATMમાં રૂપિયા ભરતી વખતે યુવકને લૂંટી લેવાયો
લૂંટની ઘટના સીસીટીવી કેમેરામાં થઈ કેદ
જો તમે ATMમાં પૈસા ભરવા જતા હોવ તો સાવધાન થઈ જજો. કારણ કે કેટલાંક ATM મશીનમાં સુરક્ષાના અભાવે તમારી સાથે લૂંટની ઘટના બની શકે છે.. તાજેતરની લૂંટની ઘટના સુરતની સામે આવી છે. સચિન GIDC વિસ્તારમાં ATM મશીનમાં રૂપિયા ભરતી વખતે એક યુવક સાથે લાખો રૂપિયાની રોકડ રકમ લૂંટી ત્રણ શખ્સો ફરાર થઇ ગયા. જેના CCTV ફૂટેજ પણ સામે આવ્યા છે. યુવક જ્યારે ATM મશીનમાં પૈસા ભરવા આવે છે તે દરમિયાન ત્રણ શખ્સો મોંઢા પર રૂમાલ બાંધી ATMમાં પ્રવેશે છે. ત્યાર બાદ ધારદાર હથિયાર બતાવી યુવક પાસેથી લાખો રૂપિયાની રોકડ રકમ લઈ ત્યાંથી નાસી છૂટે છે. તો સમગ્ર ઘટનાના પગલે સચિન GIDC પોલીસે CCTV ફૂટેજના આધારે આગળની કાર્યવાહી હાથ ધરી છે.
લૂંટ CCTVમાં કેદ થઈ જતાં પોલીસે તપાસ હાથ ધરી
વિગતવાર જણાવીએ કે, સુરતના સચિન GIDC વિસ્તારમાં યુવક વરાછા કો-ઓપરેટિવ બેંકના ATMમાં રૂપિયા જમા કરાવવા માટે ગયો હતો. એ દરમિયાન ત્રણ શખ્સો ATMમાં એવાં સમયે પ્રવેશ કરે છે કે જ્યારે યુવક પૈસા ભરી રહ્યો હતો. ત્યારે તેની આસપાસ ત્રણ શખ્સો ગોઠવાઈ જઈને ચપ્પુ જેવું તીક્ષ્ણ હથિયાર બતાવીને લૂંટ ચલાવે છે. ચહેરા પર માસ્ક અને રૂમાલ બાંધીને આવેલા લૂંટારાઓના ચહેરાથી યુવક તેમને ઓળખી ન હોતો શક્યો. પરંતુ આ લૂંટ CCTVમાં કેદ થઈ જતાં પોલીસે આ મામલે વધુ તપાસ હાથ ધરી છે.
કોઇ જાણભેદુ દ્વારા જ આ પ્રકારની ઘટનાને અંજામ આપવામાં આવ્યો હોઇ શકે
લૂંટની ઘટનાના CCTV સામે આવ્યા બાદ સચિન GIDC પોલીસ સ્ટેશનના ઉચ્ચ અધિકારીઓએ તપાસનો ધમધમાટ શરૂ કરી દીધો છે. પોલીસ સૂત્રો પાસેથી મળતી માહિતી અનુસાર, કોઇ જાણભેદુ દ્વારા જ આ પ્રકારની ઘટનાને અંજામ આપવામાં આવ્યો હોય એવું લાગી રહ્યું છે. હાલમાં CCTVના આધારે સચિન GIDC પોલીસે ગુનો નોંધીને લૂંટારાઓનું પગેરું મેળવવાના તમામ પ્રયાસો હાથ ધર્યા છે.