ક્રિકેટ / ધોની સહિત આ સિનિયર ખેલાડીઓને પણ BCCIએ બહારનો માર્ગ દેખાડ્યો; આ યુવાઓની એન્ટ્રી

BCCIનું કોન્ટ્રાકટ લિસ્ટ 

ગ્રેડ A+ (7 કરોડ રૂપિયા)

વિરાટ કોહલી , રોહિત શર્મા , જસપ્રીત બુમરાહ 

ગ્રેડ A (5 કરોડ રૂપિયા)

આર અશ્વિન, ભુવનેશ્વર કુમાર, રવિન્દ્ર જાડેજા , ઇશાંત શર્મા, કુલદીપ યાદવ, મહોમ્મ્દ શમી, ચેતેશ્વર પુજારા , અજિંક્ય રહાણે, કે એલ રાહુલ, શિખર ધવન, રિષભ પંત 

ગ્રેડ B (3 કરોડ રૂપિયા)

રિદ્ધિમાન સહા, ઉમેશ યાદવ, યુઝવેન્દ્ર ચહલ, હાર્દિક પંડ્યા, મયંક અગ્રવાલ

ગ્રેડ C (1 કરોડ રૂપિયા)

કેદાર જાધવ, મનીષ પાંડે, હનુમા વિહારી, શ્રેયસ ઐયર, દિપક ચહર, નવદીપ સૈની, શાર્દુલ ઠાકુર, વોશિંગ્ટન સુંદર

BCCIએ ગુરુવારે ખેલાડીઓ માટેના વાર્ષિક કરારની જાહેરાત કરી, જેમાં 27 ખેલાડીઓ શામેલ છે. આ યાદીમાં મહેન્દ્રસિંહ ધોનીનું નામ સામેલ નથી જેથી ચાહકો સૌથી વધુ આશ્ચર્યચકિત થઈ ગયા છે. જોકે, ધોની એકમાત્ર એવા ખેલાડી નથી કે જેને આ કરારમાં બહાર મૂકાયા હોય. કેટલાક સિનિયર ખેલાડીઓ આ યાદીમાંથી બહાર થયા છે, ત્યારે કેટલાક યુવા ખેલાડીઓ પ્રથમ વખત આ યાદીમાં ઉમેરાયા છે.

ચાર ખેલાડીઓને બહારનો રસ્તો બતાવવામાં આવ્યો 

નવા કોન્ટ્રાકટ અનુસાર મહેન્દ્રસિંહ ધોની ઉપરાંત બેટ્સમેન દિનેશ કાર્તિક, ફાસ્ટ બોલર ખલીલ અહેમદ અને બેટ્સમેન અંબાતી રાયડુને BCCIએ તેના વાર્ષિક કરારમાંથી બાકાત રાખવામાં આવ્યા છે.

આ ત્રણેય ખેલાડીઓ વાર્ષિક એક કરોડ રૂપિયાના કરારમાં BCCI સાથે સંકળાયેલા હતા. ત્રણેય ખેલાડીઓને તેમના ખરાબ પ્રદર્શનના કારણે બહાર કાઢવામાં આવ્યા છે. રાયડુએ તો વર્લ્ડ કપમાં સિલેક્ટ ન થવાના કારણે નિવૃત્તિ જાહેર કરી હતી જો કે ત્યાર બાદ તેણે આ નિવેદન ફેરવી તોળવ્યું હતું.

આ ખેલાડીઓ પ્રથમ વખત કરાર યાદીમાં જોડાયા 

ગયા વર્ષે ડેબ્યુ કરનાર ફાસ્ટ બોલર નવદીપ સૈની, શાર્દુલ ઠાકુર, દિપક ચહર, બેટ્સમેન શ્રેયસ ઐયર અને વોશિંગટન સુંદરનો પહેલી વાર BCCIના કરારમાં સમાવેશ કરાયો છે. આ ખેલાડીઓને ગ્રેડ C હેઠળ વર્ષે 1 કરોડ રૂપિયા મળશે. ગયા વર્ષે શાનદાર પ્રદર્શન કરનાર મયંક અગ્રવાલને સીધા ગ્રેડ Bમાં સામેલ કરવામાં આવ્યો હતો અર્થાત તેને વાર્ષિક 3 કરોડ રૂપિયા મળશે.

રિદ્ધિમાન સાહા અને કે એલ રાહુલને પ્રમોશન 

ટેસ્ટમાં લાંબા સમય પછી વાપસી કરનાર રિદ્ધિમાન સાહા અને ઓપનર બેટ્સમેન કે એલ રાહુલને પ્રમોશન મળ્યું, જેમાં તેઓ ગ્રેડ Cમાંથી ગ્રેડ Bમાં જોડાયા છે. બંને ખેલાડીઓને ગયા વર્ષે 1 કરોડ રૂપિયા મળતા હતા, જ્યારે આ વર્ષે તેમને 3 કરોડ આપવામાં આવશે.