કરુણાંતિકા / લોહીલુહાણ થયો હાઈવે: ખેડાના ભાનેર પાસે કન્ટેનર અને મોટરસાયકલ વચ્ચે ગમખ્વાર અકસ્માત, એક કિશોર અને 2 યુવકોના કરૂણ મોત

• ખેડાના ભાનેર ગામ પાસે અકસ્માતમાં 3 વ્યક્તિના મૃત્યુ
• કન્ટેનર અને મોટરસાયકલ વચ્ચે ગમખ્વાર અકસ્માત
• અકસ્માતમાં એક કિશોર અને બે યુવાનોના ઘટના સ્થળે મૃત્યુ

ગુજરાતમાં સતત માર્ગ અકસ્માતની ઘટનાઓ વધી રહી છે. રોજબરોજ ક્યાંક ને ક્યાંક અકસ્માતમાં કોઇકના મોત થયાના સમાચાર સામે આવતા જ રહે છે. ત્યારે આજે વધુ એક અકસ્માતનો બનાવ ખેડા જિલ્લોમાં બન્યો છે. જેમાં ત્રણ લોકોના મોત થયા છે.

ઘટનાસ્થળે દોડી આવી પોલીસની ટીમ
મળતી માહિતી અનુસાર, ખેડાના કઠલાલ-કપડવંજ રોડ ઉપર આવેલા ભાનેર ગામ પાસે કન્ટેનર અને મોટરસાયકલ વચ્ચે ભયાનક અકસ્માત સર્જાયો હતો. આ ગમખ્વાર અકસ્માતને પગલે રાહદારીઓના ટોળેટોળા એકઠા થઈ ગયા હતા. આ અકસ્માતની જાણ પોલીસને કરવામાં આવતા પોલીસની ટીમ પણ તાત્કાલિક ઘટનાસ્થળે દોડી આવી હતી.

એક કિશોર અને બે યુવકોના મોત
આ દુર્ઘટનામાં મોટરસાયકલ પર સવાર એક કિશોર અને બે યુવાનોના ઘટના સ્થળે મોત થયા છે. ત્રણેય કઠલાલ તાલુકાના લાડવેલ ગામના વતની હોવાનું સામે આવ્યું છે. હાલ પોલીસ દ્વારા ટ્રાફિક ક્લિયર કરાવીને ત્રણેયના મૃતદેહોને પોસ્ટમોર્ટમ અર્થે ખસેડવાની તજવીજ હાથ ધરવામાં આવી છે. 
 
મૃતકોના નામ
- અશ્વિનભાઈ દશરથભાઈ પરમાર (ઉ.વ 18, રહે. લાડવેલ)
- કિશનસિંહ રાભાભાઇ રાઠોડ (ઉ.વ 19, રહે. લાડવેલ)
- કિશનભાઇ વિક્રમભાઈ ચાવડા (ઉ.વ 14, રહે. લાડવેલ)