દાની ડેટા એપ કૌભાંડ મામલે CID ક્રાઇમ દ્વારા વધુ ત્રણ આરોપીઓની ધરપકડ કરવામાં આવી છે. ફૂટબોલની મેચ પર સટ્ટો રમાડવાના કરોડોના કૌભાંડમાં અત્યાર સુધીમાં 9 પકડાયા છે.
દાની ડેટા એપ કૌભાંડમાં વધુ 3 આરોપીની ધરપકડ
CID ક્રાઈમે 3 આરોપીની ધરપકડ કરી
અત્યાર સુધી 9 આરોપીની ધરપકડ
'જ્યાં લોભિયા હોય ત્યાં ધુતારા ભૂખે ના મરે.' અનેકવાર ઓનલાઇન એપ અને ગેમમાં પૈસા ડબલ કરવાની લાલચમાં પૈસા રોકવાથી લોકોને અનેક રૂપિયા ગુમાવાનો વારો આવતો હોય છે. ત્યારે આવી જ એક ઓનલાઈન App દાની ડેટા (Dani Data) બંધ થઇ જતા અનેક લોકોના કરોડો રૂપિયા સલવાઇ ગયા હતા. બનાસકાંઠા સહિત રાજ્યભરના લોકોએ Dani Data નામની ઓનલાઈન એપમાં પૈસા રોક્યા હતા. જે અચાનક આ App 2 જૂનના રોજ રાત્રે બંધ થઈ જતા લોકોને રાતા પાણીએ રોવાનો વારો આવ્યો હતો. ત્યારે દાની ડેટા એપ કૌભાંડ મામલે સીઆઈડી ક્રાઈમે આકરી કાર્યવાહી કરી છે. CID ક્રાઈમે વધુ 3 આરોપીઓ મનોજકુમાર ભાણાભાઈ પટેલ(નવસારી), વૃષભ હર્ષદભાઈ મકવાણા(વેજલપુર) અને વિજયકુમાર જદન રામ(દિલ્હી)ની ધરપકડ કરી છે.
ED દ્વારા પણ તપાસ કરાશે
આ મામલે અત્યાર સુધી 9 આરોપીની ધરપકડ કરવામાં આવી છે. આ ટોળકીએ કુલ રૂ.2300 કરોડના ટ્રાન્ઝેક્શન કર્યા હોવાની માહિતી બહાર આવી છે. જેના આધારે સીઆઈડી ક્રાઈમે 89 બેન્ક એકાઉન્ટમાં થયેલા રૂ.2300 કરોડના ટ્રાન્ઝેક્શન અંગે એનફોર્સમેન્ટ ડિપાર્ટમેન્ટ(ઈડી) ને જાણ કરી છે. 2 હજાર 300 કરોડના વ્યવહારની ED દ્વારા પણ તપાસ કરવામાં આવશે. આરોપીઓએ ફૂટબોલની મેચમાં સટ્ટો રમાડીને કરોડોનું કૌભાંડ આચર્યું હતું. દાની ડેટા એપ ડાઉનલોડ કરાવીને કૌભાંડ આચર્યું હતું. 89 બેંક એકાઉન્ટમાંથી ડમી કંપનીઓમાં રૂપિયાની હેરાફેરી કરાઈ હતી. આરોપીઓએ દેશના વિવિધ શહેરોમાં ડમી કંપનીઓ શરૂ કરી હતી. 1100થી વધુ વ્યક્તિઓ એપ્લિકેશનમાં રોકાણ કરી લાલચનો ભોગ બન્યા હોવાનું બહાર આવ્યું હતું.
5 આરોપીઓ પોલીસ પકડથી દૂર
સીઆઈડી ક્રાઈમના વડા આર.બી.બ્રહ્મભટ્ટે જણાવ્યું કે, આ કૌભાંડમાં હજુ પણ 5 આરોપી નાસતા ફરતા હોવાથી તેમને પકડવા તજવીજ શરૂ કરવામાં આવી છે. આ કૌભાંડનો મુખ્ય આરોપી ચાઈનિઝ નાગરિક છે. જ્યારે અન્ય બે આરોપીઓ પણ વિદેશમાં જ રહે છે. તેમની વિરુદ્ધ લૂક આઉટ નોટિસ જારી કરવામાં આવી છે. જ્યારે આ કૌભાંડમાં સંડોવાયેલા લીલા ચમીરા ભાટા અને અંકિત ઉમેશ ગોસ્વામી પણ હજુ નાસતા ફરે છે.
કેવી રીતે કૌભાંડ થયું?
- ઓનલાઇન એપ્લિકેશન દ્વારા ગેમ ડાઉનલોડ કરાવાતી હતી.
- મોબાઇલ નંબર રજિસ્ટ્રેશન કરીને તેમાંથી બેંકમાંથી રકમ નાખવામાં આવતી હતી.
- લિંક ઓપન કરવાથી હોમસ્ક્રીન પર લેવાતી હતી.
- મોબાઇલ નંબર અને પાસવર્ડ નાખીને કોડ અને કેપ્ચા કોડ નાખ્યા બાદ રજિસ્ટ્રેશન થતું હતું.
- બાદમાં ઓટોમેટીક પાસવર્ડ પણ સેવ થતો હતો.
- નાણાંકીય એપ્લિકેશનથી બેંક દ્વારા 400, 1200, 3600નું રિચાર્જ કરીને રમવાનું ચાલુ કરવામાં આવતું હતું.
- અમુક ગેમ્સમાં રમવાનું ચાલુ હોય તો જ નફો થતો હતો.
- પરંતુ અમુકમાં ન હોય તો પણ રૂપિયા વધવાનું ચાલુ રહેતું હતું.
- એક મહિના સુધી જેટલા રૂપિયા નાખ્યા હોય તે રૂપિયા ડબલ થઇ જતા હતાં.
- આવી રીતે થોડા પૈસા રોક્યા બાદ વધુ લાલચ આવતા લોકોએ થોડા-થોડા કરીને કરોડો રૂપિયાનું રોકાણ કર્યું હતું.
- એકાએક દાની ડેટા એપ્સમાંથી ઓટોમેટીક ખાતામાં આવતું પેમેન્ટ વિડ્રો થવાનું બંધ થઇ ગયું હતું.
- બાદમાં લિંક પણ કામ કરતી બંધ થઇ ગઇ હતી.
- અનેક લોકોના લાખો રૂપિયા ડૂબી ગયા હતા.