રાજ્યના મોટાભાગના વિસ્તારોમાં વરસાદી વાતાવરણ વચ્ચે દાહોદ જિલ્લામા આકાશી આફત ત્રાટકી હતી. જેમાં વીજળી પડતાં 3 વ્યક્તિઑના મોત થયા હોવાનું સામે આવ્યું છે.
દાહોદ જિલ્લામાં વિજળી પડતા 3 ના મોત
વરસાદમા અમદાવાદમાં ઠેર ઠેર ભરાયા પાણી
હવામાન વિભાગ દ્વારા વરસાદની આગાહી
હવામાન વિભાગ દ્વારા રાજ્યમાં 5 દિવસની વરસાદની આગાહી કરવામાં આવી છે. જેને પગલે આજે મોટાભાગના વિસ્તારોમાં છૂટોછવાયો વરસાદ વરસ્યો હતો. આ દરમીયાન દાહોદ જિલ્લામાં કરુણાંતિકા સામે આવી છે. જેમાં વીજળી પડતા 3 લોકોના કમકમાટીભર્યા મોત નિપજ્યાં પંથકમાં સનસનાટી મચી ગઇ હતી. ઝાલોદના ચણાશર,પાવડી અને કાળી ગામમાં વીજળી પડવાની ઘટના ઘટી હતી. જેમાં અવકાશી વીજળી ત્રાટકતા એક મહિલા અને બે પુરૂષના મોત થયા હતા.
પૂર્વ અને પશ્ચિમ અમદાવાદમાં વરસાદી માહોલ જામ્યો
અમદાવાદમાં મીની વાવાઝોડા જેવી સ્થિતિ સાથે વરસાદની શરૂઆત થઇ હતી. આજે શનિવારે બપોર બાદ અમદાવાદમાં અચાનક જ વાતાવરણ પલટો આવ્યો હતો. ધૂળની ડમરીઑ વચ્ચે કડાકા ભડાકા સાથે મેઘરાજાનું લાંબા સમય બાદ ફરી આગામન થયું હતું. જેને લઇને અનેક વિસ્તારોમાં પાણી ભરાયા હતા. વધુમાં બપોર બાદ કાળા વાદળો વચ્ચે ગાંધીનગરમાં પણ ધોધમાર વરસાદ પડ્યો હતો.બીજી તરફ દ્વારકાના ખંભાળિયામાં બે ઇંચ જેટલો વરસાદ ખાબક્યો હતો. તો ડાંગ જિલ્લામાં સાર્વત્રિક વરસાદી માહોલ છવાયો છે.
નર્મદા, સુરતમાં ધોધમાર વરસાદ
સુરતના અડાજણ, પાલમાં ધોધમાર વરસાદ પડ્યો હતો. વધુમાં અચાનક વાતાવારણમાં પલટા વચ્ચે વીજળીના કડાકા સાથે રાંદેર, પારલે પોઇન્ટ સહિતના વિસ્તારોમાં વરસ્યો વરસાદ પડ્યો હતો.એ જ રીતે નર્મદા જિલ્લામાં પણ સવારથી ઉકળાટ ભર્યા વાતાવરણ વચ્ચે સાજે વરસાદનું આગમન થયું હતુ.જેમાં રાજપીપલા શહેરમાં ધોધમાર વરસાદ ખાબકયો હતો.વધુમાં નડિયાદના પીપલગ,ઉત્તરસંડા,ડભાણ, ટુંડેલ,ડુમરાલ ઉપરાંત નવસારી, જલાલપોર,ગણદેવી, ચીખલીમાં મેઘમહેર જોવા મળી હતી.
માળીયા હાટીનામાં ગાજવીજ સાથે 1 કલાકમાં દોઢ ઇંચ વરસાદ
આ ઉપરાંત ગીરસોમનાથના તાલાળા ગીર અને વેરાવળમાં પણ મેઘરાજાનું ફરી આગમન થયું છે. જૂનાગઢના માળીયા હાટીનામાં ગાજવીજ સાથે વરસાદ 1 કલાકમાં દોઢ ઇંચ જેટલો વરસાદ નોંધાયો હતો. અરવલ્લી અને ભાવનગર તથા મહેસાણા જિલ્લાના વિસનગર-વડનગર, આણંદ જિલ્લાના બોરસદ અને પોરબંદર બરડા પંથકમાં સતત બીજા દિવસે વરસાદ પડ્યો હતો.
હવામાન વિભાગ દ્વારા 5 દિવસ વરસાદની આગાહી
લાંબા સમયના વિરામ બાદ રાજ્યમાં ફરી મેઘો સટાસટી બોલાવે તેવા એંધાણ વર્તાઇ રહ્યા છે. હવામાન વિભાગ દ્વારા રાજ્યમાં આગામી 5 દિવસ વરસાદની આગાહી કરવામાં આવી છે. કચ્છ, સૌરાષ્ટ્ર અને દક્ષિણ ગુજરાતમાં વરસાદ પડી શકે તેવી શક્યતાને લઈને ખેડૂતોને પણ સોનેરી આશા બંધાઈ છે. બંગાળમાં લો પ્રેશર સર્જાવાને કારણે વરસાદની સંભાવના વ્યક્ત કરાઇ રહી છે. દક્ષિણ ગુજરાતમાં 13 તારીખે ભારે વરસાદની વકી છે. જ્યારે વલસાડ, નવસારી, દમણ, ડાંગ, નર્મદા, ભરૂચમાં ભારે વરસાદની આગાહી કરવામાં આવી છે. ગાજવીજ સાથે સમગ્ર ગુજરાતમાં અતિભારે વરસાદ ખાબકી શકે છે.