રાજકોટમાં ભારે વરસાદને પગલે ઠેર-ઠેર પાણી ભરાયા હતા. જેમાં સિવિલ હોસ્પિટલના ઇમરજન્સી વોર્ડમાં વરસાદી પાણી ભરાતા દર્દીઓ પરેશાન થયા હતા.
રાજકોટમાં ભારે વરસાદને પગલે પાણી ભરાયા
સિવિલ હોસ્પિટલમાં પણ પાણી ભરાયા
શહેરને પાણી પૂરું પાડતો આજીડેમ ઓવરફ્લો
હવામાન વિભાગની આગાહીને લઇને છેલ્લા બે દિવસથી રાજકોટમાં છૂટોછવાયો વરસાદ પડી રહ્યો છે. ત્યારે આજે સાંબેલાધાર વરસાદ ખાબક્યો હતો. આથી મુખ્ય માર્ગો જળમગ્ન થયા હતા. વધુમાં રાજકોટમાં ભારે વરસાદને પગલે ઠેર-ઠેર પાણી ભરાયા હતા. શહેરમાં સવા બે કલાકમાં 3 ઈંચ વરસાદ નોંધાયો હતો. સિવિલ હોસ્પિટલમાં પણ વરસાદી પાણી ઘૂસતા દર્દીઑને હાલાકી ભોગવવાનો વારો આવ્યો હતો. ઇમરજન્સી વોર્ડમાં પાણી ભરાયા હતા જેને પગલે તંત્ર દોડતું થયું હતું. બીજી તરફ 150 ફૂટ રિંગ રોડ પર પણ પાણી ભરાયા હતા.
આજીડેમ ઓવરફ્લો થયો
રાજકોટના ઇસ્ટ ઝોનમાં 68 એમએમ, સેન્ટ્રલ ઝોનમાં 70 એમએમ અને વેસ્ટ ઝોનમાં 50 એમએમ વરસાદ નોંધાયો છે. તો ઉપરવાસમાં વરસાદને લઈને રાજકોટનો હાર્દ સમો શહેરને પાણી પૂરું પાડતો આજીડેમ ઓવરફ્લો થયો હતો. બીજી બાજુ રાજકોટ જિલ્લાના પડધરી તાલુકામાં ન્યારી 2 ડેમ ભરાઈ જતા ડેમના બે દરવાજા એક ફૂટ ખોલવામાં આવ્યા છે.આથી નીચાણવાળા વિસ્તારના ગ્રામજનોને સતર્ક રહેવા સૂચના આપવામાં આવી હતી.
હવામાન વિભાગ દ્વારા 5 દિવસ વરસાદની આગાહી
હવામાન વિભાગ દ્વારા રાજ્યમાં આગામી 5 દિવસ વરસાદની આગાહી કરવામાં આવી છે. કચ્છ, સૌરાષ્ટ્ર અને દક્ષિણ ગુજરાતમાં વરસાદ પડી શકે તેવી શક્યતાને લઈને ખેડૂતોને પણ સોનેરી આશા બંધાઈ છે. બંગાળમાં લો પ્રેશર સર્જાવાને કારણે વરસાદની સંભાવના વ્યક્ત કરાઇ રહી છે. દક્ષિણ ગુજરાતમાં 13 તારીખે ભારે વરસાદની વકી છે. જ્યારે વલસાડ, નવસારી, દમણ, ડાંગ, નર્મદા, ભરૂચમાં ભારે વરસાદની આગાહી કરવામાં આવી છે.