VTV વિશેષ / હવે દેશની ત્રણ મહત્વની અને પાવરફૂલ સંસ્થાની કમાન ગુજરાત કૅડરના આ ત્રણ અધિકારીઓના હાથમાં

મોદી સરકારે TRAI (telecom regulatory authority of india) ના ચેરમેન તરીકે P D વાઘેલાની વરણી કરી છે. દેશમાં હાલ ચાલી રહેલા AGR વિવાદ મુદ્દે TRAI દેશની ખૂબ મહત્વની સંસ્થા બની ગઈ છે અને ટેલિકોમ ડિપાર્ટમેન્ટ અને દેશની ટેલિકોમ કંપનીઓ વચ્ચેનું એક મહત્વનું અંગ છે.

આ ઉપરાંત સરકારના કામો ઉપર નજર રાખતી, તેમના આર્થિક અને વહીવટી કાર્યોનું ઓડિટ કરતી વોચડોગ સંસ્થા CAGમાં કોમ્પ્ટ્રોલર એન્ડ ઓડિટર જનરલ ઓફ ઇન્ડિયા તરીકે ગુજરાત કેડરના G C મુર્મુની નિમણુંક કરવામાં આવી છે. 

આ સાથે દેશના વિદ્યુત ઉત્પાદન અને વિતરણના મહત્વના Central Electricity Regulatory Commissionના ચેરમેન તરીકે P K પૂજારીને મુકવામાં આવ્યા છે. 

કોણ છે IAS P D વાઘેલા

વિરમગામ તાલુકાના ઉખલોડ ગામના વતની ગુજરાત રાજયના IAS અધિકારી પી.ડી. વાઘેલાની 2019માં ડિપાર્ટમેન્ટ ઓફ ફાર્માસ્યુટિકલ્સ, મિનિસ્ટ્રી ઓફ કેમિકલ્સ એન્ડ ફર્ટિલાઇઝર્સનાં સેક્રેટરી તરીકે નિમણૂંક કરાઈ હતી. 1986 બેચના IAS પી.ડી. વાઘેલા ચીમનભાઈ પટેલના શાસનમાં મુખ્યમંત્રીના ડેપ્યુટી સચિવ તરીકે રહી ચૂક્યાં છે. 

કંડલા પોર્ટ ટ્રસ્ટ અને નાગરિક પુરવઠા વિભાગથી લઈને ટેક્સ કમિશનર સહિત અલગ અલગ વિભાગોમાં ફરજ બજાવી ચૂક્યા છે. વર્ષ 2019થી કેન્દ્રમાં નરેન્દ્ર મોદી સરકારમાં કામ કરી રહ્યાં હતાં. 2018માં ગુજરાતના વેચાણવેરા કમિશનર તરીકે પી.ડી. વાઘેલાને સમગ્ર દેશમાં GST જાગૃતિ અંગેની શ્રેષ્‍ઠ કામગીરી બદલ ઍવોર્ડથી નવાજવામાં આવ્‍યા હતા. કેન્દ્રમાં ગયા પહેલા તેઓ રાજ્યના વેરા વિભાગમાં મુખ્ય કમિશનર તરીકે ફરજ બજાવતા હતા. તેઓને હવે TRAIના ચેરમેન તરીકે મુકવામાં આવ્યા છે.  

કોણ છે IAS G C મુર્મુ

G C મુર્મુ ગુજરાત કેડરના 1985ની બેચના IAS અધિકારી છે. તેઓ ગુજરાતમાં નરેન્દ્ર મોદીના CM હોવાના ગાળામાં રિલીફ કમિશનર, ગુજરાત મેરીટાઈમ બોર્ડના MD તરીકે ફરજ બજાવી ચુક્યા છે. 

તેઓને 2004માં ગૃહખાતાના જોઈન્ટ સેક્રેટરી બનાવવામાં આવ્યા હતા. તેમણે અમિત શાહ જેલમાં હતા તે સમયે કેસ પેપર્સ તૈયાર કર્યા હતા. ત્યાર બાદ તેઓને મોદી સરકાર કેન્દ્રમાં આવ્યા બાદ 2019માં જમ્મુ કાશ્મીરના કેન્દ્ર શાસિત પ્રદેશના પહેલા લેફ્ટેનન્ટ ગવર્નર તરીકે મુકવામાં આવ્યા હતા અને ત્યાર બાદ 8 ઓગસ્ટના રોજ તેમને CAGનું પદ આપવામાં આવ્યું હતું.

કોણ છે IAS P K પૂજારી

P K પૂજારી 1981ની બેચના ગુજરાત કેડરના IAS અધિકારી છે. તેમણે ગુજરાતમાં અને કેન્દ્ર સરકારમાં પાવર, કોમર્શયલ ટેક્સ, ફાઇનાન્સ, ઇન્ડસ્ટ્રીઝ જેવા મહત્વના ખાતા સાંભળ્યા છે. તેઓએ 36થી વધુ વર્ષ સુધી પોતાની સેવાઓ આપી છે. 

તેઓને ફેબ્રુઆરી 2018માં Central Electricity Regulatory Commissionના ચેરમેન તરીકે મુકવામાં આવ્યા હતા.