આ બેઠક પર ટિકિટ ફાળવણી બાદ કોંગ્રેસમાં મોટું ભંગાણ, 3 પૂર્વ MLA સહિત 1 હજાર કાર્યકર્તાઓના રાજીનામા

પાટણ લોકસભાની કોંગ્રેસની ટિકિટ પાટણ કોંગ્રેસના પૂર્વ સાંસદ જગદીશ ઠાકોરને મળતા પાટણ કોંગ્રેસમાં ભંગાણની સ્થિતિ સર્જાવા પામી છે. કોંગ્રેસ દ્વારા પાટણ લોકસભા બેઠકની ટિકિટ પાટણ કોંગ્રેસના પૂર્વ સાંસદ જગદીશ ઠાકોરને આપવામાં આવી છે. જેને લઈને 3 પૂર્વ MLA સહિત 1 હજારથી વધુ કાર્યકર્તાઓએ કોંગ્રેસમાંથી રાજીનામાં આપ્યા છે. જેમાં પાટણ વાગડોદ કોંગ્રેસના પૂર્વ ધારાસભ્ય જોધાજી ઠાકોર અને ચમનજી ઠાકોર તથા ધારસિંહ ઠાકોરનો સમાવેશ થાય છે.



મળતી માહિતી મુજબ જોધાજી ઠાકોરે જગદીશ ઠાકોર સામે અપક્ષ ઉમેદવાર તરીકે ચૂંટણી લડવાની જાહેરાત કરી છે. જો કે જોધાજી ઠાકોર ભાજપનો કેસરીયો ધારણ કરે એવી પણ શક્યતા સેવાઈ રહી છે.



મહત્વનું છે કે, પાટણ જિલ્લામાં ઠાકોર સમાજનું પ્રભુત્વ છે. પરંતુ જોધાજી ઠાકોર દ્વારા અગાઉ પણ આયાતી ઉમેદવાર અલ્પેશ ઠાકોરનો વિરોધ કરવામાં આવ્યો હતો. ત્યારે હવે કોંગ્રેસ દ્વારા જગદીશ ઠાકોરની સત્તાવાર જાહેરાત થતા ઠાકોર સમાજ બે ભાગમાં વહેંચાઇ ગયો છે. 



જો કે હાલ તો પાટણ જિલ્લા કોંગ્રેસના આગેવાનો નારાજ જોધાજી ઠાકોરને મનાવવા બંધબારણે મિટિંગો કરી રહ્યા છે. તો જોધાજી આજ સવારથી જ અમદાવાદ જવા નીકળી ગયા છે.