બનાસકાંઠામાં મેઘાવી માહોલ વચ્ચે વરસાદ પડી રહ્યો છે. તેવામાં પૂરની સ્થિતિ વચ્ચે નદીના જળપ્રવાહમાં જુદા-જુદા સ્થળોએ પાંચ લોકો ડૂબ્યાં હોવાની દુર્ઘટના સામે આવી છે.
જુના ડીસા વિસ્તારમાં નદીમાં 3 યુવકો ડૂબ્યાં
અમીરગઢની બનાસ નદીમાં ડૂબી જતાં બાળકનું મોત
ડીસા નજીક બનાસ નદીમાં વૃદ્ધ તણાયા
બનાસકાંઠાના પાલનપુર, અમીરગઢ, ડીસા, થરાદ સહીતના વિસ્તારોમાં વરસાદ ખાબક્યો હતો. હવામાન વિભાગ દ્વારા કરવામાં આવેલી આગાહીને લઇને કયાંક ધોધમાર તો કાયક ધીમીધારે વરસાદ ખાબકી રહ્યો છે. તેવામાં મેઘમહેરને લઇને નદી-નાળામાં ઘોડાપૂર ઉમટ્યા છે આવી સ્થિતિ વચ્ચે ડીસાના જુનાડીસા, અમીરગઢ સહીત જિલ્લામાં પાંચ વ્યક્તિઑ એક જ દિવસમાં પાણીમાં ડૂબવાની ઘટના સામે આવતા તંત્ર દોડતું થયું છે.
ડીસાના જુનાડીસા વિસ્તારમાં નદીમાં ડૂબ્યા 3 યુવકો
આ અંગે જાણવા મળતી વિગત અનુસાર બનાસકાંઠા જિલ્લાના ડીસાના જુનાડીસા વિસ્તારમાં નદીમાં 3 યુવકો ડૂબ્યાં હોવાનું સામે આવ્યું છે. ભારે વરસાદને લઇને નદીમાં પુર આવતા યુવાનો નદી જોવા ગયા હતા આ દરમિયાન નદીમાં ન્હાવા ગયેલા 3 યુવકો ડૂબ્યા હોવાની આશંકા વ્યક્ત કરાઇ રહી છે. જે ઘટનાની જાણ થતાં સ્થાનિક મામલતદાર અને TDO સહિતની ટિમના આગેવાનો દોડી આવ્યા હતા અને સ્થાનિક તરવૈયાઓની મદદથી યુવકોને શોધવા પ્રયાસ હાથ ધરવામાં આવ્યા છે.
બનાસ નદીમાં ન્હાવા પડેલા વૃદ્ધ લાપતા
બીજી તરફ ડીસા નજીક બનાસ નદીમાં ભારે વરસાદની સ્થિતી વચ્ચે એક વૃદ્ધ ન્હાવા પડ્યા હતા જે નદીના જળ પ્રવાહમાં લાપતા બન્યા હતા. આ અંગે જાણ થતાં સ્થાનિક તરવૈયા દ્વારા બનાસ નદીમાં વૃદ્ધની શોધખોળ હાથ ધરાઇ હતી. જોકે 3 કલાકની શોધખોળ બાદ પણ વૃદ્ધની કોઇ ભાળ મળી નથી. નોંધનીય છે કે વૃદ્ધ નદીમાં ડૂબતા હોય તેનો વીડિયો પણ સામે આવ્યો છે.
અમીરગઢની બનાસ નદીમાં ડૂબતા બાળકનું મૃત્યુ
વધુમાં આવી જ એક કરુણ ઘટના બનાસકાંઠાના અમીરગઢ ગામે સામે આવી હતી. જેમાં બનાસ નદીના ઊંડા પાણીમાં બાળક નહાવા પડ્યો હતો. જે દરમિયાન બાળક પાણીમાં ડૂબવા લાગ્યો હતો. આ ઘટનાની જાણ થતાં સ્થાનિક તરવૈયાઓ દોડી આવ્યાં હતા અને ભારે જહેમત બાદ બાળકનો મૃતદેહ હાથ લગતા અરેરાટી મચી જવા પામી હતી. મહત્વનું છે કે અમીરગઢ મામલતદાર દ્વારા નદીના પટ્ટમાં અવરજવર ન કરવા સૂચના આપવા છતાં લોકો જીવન જોખમે જઇ રહ્યા છે. જેને લઇને આવી દુર્ઘટના સામે આવી રહી છે.